ప్రపంచ దేశాల కంటే భారత యువత సాంకేతికతలో ముందుంది: పీయూష్ గోయల్

కొత్త నైపుణ్యాలు, కొత్త సాంకేతికతలు, కొత్త పని విధానాలకు అనుగుణంగా మారడంలో అభివృద్ధి చెందిన అనేక దేశాల కంటే భారతదేశంలో యువత టెక్-ఫ్రెండ్లీ (సాంకేతికతకు స్నేహపూర్వక) గా ఉండటం వలన గణనీయమైన ప్రయోజనం ఉందని కేంద్ర వాణిజ్యం పరిశ్రమల శాఖ మంత్రి పీయూష్ గోయల్ శుక్రవారం అన్నారు.

ఢిల్లీలో జరిగిన ఎఫ్ఐసిసిఐ 98వ వార్షిక సర్వసభ్య సమావేశంలో పీయూష్ గోయల్ మాట్లాడుతూ, వేగంగా మారుతున్న ప్రపంచంలో, ముఖ్యంగా ఉద్భవిస్తున్న సాంకేతికతలు, కృత్రిమ మేధస్సు ద్వారా ప్రపంచం రూపుదిద్దుకుంటున్న సమయంలో, భారతదేశ జనాభా బలం, వేగవంతమైన డిజిటల్ స్వీకరణతో, దేశాన్ని పటిష్టంగా నిలబెడుతుందని అన్నారు.

చాలా అభివృద్ధి చెందిన దేశాలు వృద్ధాప్య జనాభాతో సతమతమవుతున్న సమయంలో భారతదదేశంలో యువతలో "నైపుణ్యాభివృద్ధి వల్ల (స్కిల్లింగ్) పెద్ద ప్రయోజనం" ఉందని గోయల్ అన్నారు. వృద్ధాప్య సమాజాలు గల దేశాలు సంబంధిత సవాలును ఎదుర్కొంటున్నాయని ఆయన పేర్కొన్నారు. అంటే ఒక నిర్దిష్ట పని విధానానికి అలవాటు పడిన పరిణతి చెందిన శ్రామిక శక్తిని కలిగి ఉండటం దేశానికి అవసరం అన్నారు.

అలాగే "భారతదేశంలో యువ జనాభా, చాలా చిన్న వయస్సులోనే తెలివైన పిల్లలు నెట్‌కు కనెక్ట్ అవ్వడం, ఒక బిలియన్ ఇంటర్నెట్ వినియోగదారులు ఉండటం వలన, చాలామంది డిజిటల్‌ అవగాహన కలిగి ఉండటం, ప్రపంచవ్యాప్తంగా ఏమి జరుగుతుందో చూడటం, కొత్త ఆలోచనలతో ప్రయోగాలు చేయడం, నేర్చుకోవడానికి సుముఖత కలిగి ఉండటం గొప్ప అవకాశాలలో ఒకటి."అని పేర్కొన్నారు.

నిత్య జీవిత అనుభవాలను పోల్చుతూ, యువ తరాలు కొత్త సాంకేతికతలను చాలా వేగంగా స్వీకరిస్తాయని ఆయన చెప్పారు. “మన పిల్లలు సాంకేతికతను అలవర్చుకుంటారు, వారు మనకంటే చాలా వేగంగా అందిపుచ్చుకుంటారు," అని ఆయన అన్నారు.

అనేక అభివృద్ధి చెందిన దేశాలలో, మారుతున్న సాంకేతికతలు, పని విధానాలకు అనుగుణంగా మారలేకపోవడం వలన క్రమంగా ఎక్కువ మంది ప్రజలు సామాజిక సంక్షేమ వ్యవస్థల్లోకి మారుతున్నారని ఆయన తెలిపారు.

భారతదేశం యొక్క బలాన్ని వివరిస్తూ, యువ భారతీయులు డిజిటల్‌గా అవగాహన కలిగి ఉన్నారని, ప్రపంచ పరిణామాలకు ఎక్స్పోజ్ అయ్యారని, కొత్త ఆలోచనలతో ప్రయోగాలు చేస్తున్నారని, నేర్చుకోవడానికి సుముఖతతో ఉన్నారని మంత్రి అన్నారు.

దేశంలో ఏఐ సాధనాలను వేగంగా స్వీకరించడాన్ని కూడా గోయల్ ప్రస్తావించారు. "ప్రపంచంలో రెండవ అతిపెద్ద వినియోగదారుల స్థావరం ఈ రోజు భారతదేశంలో ఉందని మనందరికీ తెలుసు," అని ఆయన పేర్కొన్నారు.

అప్లైడ్ ఆర్టిఫిషియల్ ఇంటెలిజెన్స్ (అనువర్తిత కృత్రిమ మేధస్సు) ను తెలివిగా ఉపయోగిస్తే, అది దేశ యువతను మార్చగలదని, వారికి ఆధునిక సాంకేతికతలలో త్వరగా నైపుణ్యం ఇవ్వగలదని, ప్రపంచ సాంకేతిక రంగంలో భారతదేశం ప్రభావవంతమైన ఉనికిని కనబరచడానికి ముందుంటుందని ఆయన అన్నారు.

తన వ్యక్తిగత అనుభవాన్ని పంచుకుంటూ, గోయల్ తన నియోజకవర్గమైన ముంబైలో ఒక నైపుణ్యాభివృద్ధి కేంద్రాన్ని నడుపుతున్నానని, అది ఇటీవల తన మొదటి సంవత్సరాన్ని పూర్తి చేసిందని చెప్పారు. యువతీ యువకులు సాంప్రదాయ వృత్తులు, "సృజనాత్మక, భవిష్యత్తు కార్యకలాపాలు" రెండింటినీ నేర్చుకోవడంలో చూపిస్తున్న ఉత్సాహంపై ఆయన సంతోషం వ్యక్తం చేశారు. నైపుణ్య కార్యక్రమాలలో పరిశ్రమ భాగస్వామ్యం యొక్క ప్రాముఖ్యతను ఆయన గుర్తుచేశారు. బ్లూ స్టార్ సంస్థ శీతలీకరణ సాంకేతికతలపై యువతకు శిక్షణ ఇస్తుందని, సంస్థాపన, మరమ్మతులు, నిర్వహణలో నైపుణ్యం కలిగిన మానవశక్తిని సృష్టిస్తుందని ఆయన తెలిపారు. ఐటిసి సంస్థ ఆతిథ్యం (హాస్పిటాలిటీ) రంగంలో యువతకు శిక్షణ ఇస్తుందని, ఇదొక భవిష్యత్తు రంగమని, ఇక్కడ సాంప్రదాయ విధానాలు సరిపోవని ఆయన అన్నారు.

ఈ నమూనాను దేశవ్యాప్తంగా పెంచవచ్చని గోయల్ అన్నారు. "ఎఫ్ఐసిసిఐ, దీనిని ఒక మిషన్‌గా తీసుకుంటే, పరిశ్రమ భాగస్వామ్యంతో దేశవ్యాప్తంగా నైపుణ్యాభివృద్ధి కేంద్రాలను ఏర్పాటు చేస్తే," భారతదేశం తన నైపుణ్య ప్రభావాన్నిప్రపంచానికి చూపించగలదని ఆయన పేర్కొన్నారు.