ప్రధాని మోడీకి ఇథియోపియా అత్యున్నత పురస్కారం

తొలిసారిగా ఇథియోపియాలో పర్యటించిన భారత ప్రధానమంత్రి నరేంద్ర మోడీకి ఆ దేశం తన అత్యున్నత పౌర పురస్కారంతో అపూర్వ గౌరవాన్ని అందించింది. ఇథియోపియా ప్రభుత్వం ఆయనను దేశ అత్యున్నత పురస్కారమైన ‘‘గ్రేట్‌ ఆనర్‌ నిషాన్‌ ఆఫ్‌ ఇథియోపియా’’తో సత్కరించింది. అదిస్ అబాబాలో జరిగిన కార్యక్రమంలో ఇథియోపియా ప్రధానమంత్రి డాక్టర్ అబి అహ్మద్ అలీ స్వయంగా ఈ పురస్కారాన్ని మోడీకి ప్రదానం చేశారు. ఇరు దేశాల మధ్య ద్వైపాక్షిక సంబంధాలను బలోపేతం చేయడంలో, అంతర్జాతీయ స్థాయిలో మోడీ పోషిస్తున్న కీలక పాత్రను గుర్తిస్తూ ఇథియోపియా ప్రభుత్వం ఈ గౌరవాన్ని కల్పించింది. ఈ ప్రతిష్టాత్మక పురస్కారాన్ని అందుకున్న మొట్టమొదటి ప్రపంచ దేశాధినేత ప్రధాని మోడీయే కావడం విశేషం.

ఇథియోపియా పార్లమెంట్‌‌లో ప్రసంగం

భారత్, ఇథియోపియాలు ప్రాంతీయ శాంతి, భద్రత, అనుసంధానతను (కనెక్టివిటీ) పెంపొందించడంలో సహజ భాగస్వాములని ప్రధాన మంత్రి నరేంద్ర మోడీ అభివర్ణించారు. బుధవారం ఇథియోపియా పార్లమెంట్ సంయుక్త సమావేశాన్ని ఉద్దేశించి ప్రసంగిస్తూ, రెండు దేశాల మధ్య ఉన్న దృఢమైన సంబంధాలను ఆయన నొక్కి చెప్పారు. ప్రపంచవ్యాప్తంగా మరింత న్యాయమైన, సమానమైన, శాంతియుతమైన వాతావరణాన్ని నెలకొల్పేందుకు భారత్, ఇథియోపియాలు కలిసి పనిచేస్తున్నాయని ఆయన స్పష్టం చేశారు. పరస్పర సహకారంతో ఉమ్మడి ప్రయోజనాలను సాధించడమే కాకుండా, అంతర్జాతీయ వేదికపై కూడా ఇరు దేశాలు కీలక పాత్ర పోషిస్తున్నాయని ప్రధాని ఈ సందర్భంగా వెల్లడించారు.

ప్రధానమంత్రి నరేంద్ర మోడీ తన తొలి ద్వైపాక్షిక పర్యటనలో భాగంగా మంగళవారం ఇథియోపియాలో అడుగుపెట్టారు. ఈ సందర్భంగా అక్కడి పార్లమెంట్ సభ్యులను ఉద్దేశించి ప్రసంగిస్తూ, స్థానిక భాషలో “తేనా యిస్తిలిన్, సలామ్” అంటూ పలకరించి అందరినీ ఆకట్టుకున్నారు. “సింహాల దేశమైన ఇథియోపియాలో ఉండటం ఎంతో ఆనందంగా ఉంది. నా స్వస్థలం గుజరాత్ కూడా సింహాలకు నిలయమే కావడంతో ఇక్కడ ఇంట్లో ఉన్నట్టే అనిపిస్తోంది” అని ఆయన అన్నారు. ప్రధాని మోడీ ఒక విదేశీ పార్లమెంట్‌ను ఉద్దేశించి ప్రసంగించడం ఇది 18వ సారి కావడం విశేషం. ఈ ప్రసంగం ద్వారా ఇరు దేశాల మధ్య ఉన్న సాంస్కృతిక, దౌత్య సంబంధాలను ఆయన మరింత బలోపేతం చేశారు.

భారత్, ఇథియోపియాలు భౌగోళికంగా అత్యంత కీలకమైన స్థానాల్లో ఉన్నాయని ప్రధానమంత్రి నరేంద్ర మోడీ తన ప్రసంగంలో స్పష్టం చేశారు. ఇథియోపియా ఆఫ్రికా ఖండానికి కేంద్రబిందువుగా ఉంటే, భారత్ హిందూ మహాసముద్ర ప్రాంతానికి కీలక కేంద్రంగా ఉందని ఆయన పేర్కొన్నారు. ఈ భౌగోళిక ప్రాధాన్యత వల్లే ప్రాంతీయ శాంతి, భద్రత, అనుసంధానతను పెంపొందించడంలో ఇరు దేశాలు సహజ భాగస్వాములని ఆయన అభివర్ణించారు. ముఖ్యంగా ఈ ఏడాది కుదిరిన రక్షణ సహకార ఒప్పందం రెండు దేశాల మధ్య భద్రతా బంధాన్ని మరింత బలోపేతం చేసిందని, దీని ద్వారా సైనిక సహకారం, సైబర్ భద్రత, రక్షణ పరిశోధనలు, శిక్షణ వంటి రంగాల్లో ఉమ్మడిగా ముందుకు సాగుతామని ప్రధాని వివరించారు.

పహల్గాం ఉగ్రదాడి జరిగిన అనంతరం భారత్‌కు ఇథియోపియా అందించిన తిరుగులేని మద్దతుకు ప్రధానమంత్రి నరేంద్ర మోడీ హృదయపూర్వక కృతజ్ఞతలు తెలిపారు. ఉగ్రవాదం అనేది మానవాళికి పెను ముప్పు అని పేర్కొంటూ, దానిని ఎదుర్కోవడంలో ఇథియోపియా అవలంబిస్తున్న "రాజీలేని" విధానాన్ని ఆయన కొనియాడారు. అంతర్జాతీయ ఉగ్రవాదాన్ని నిర్మూలించడంలో ఇరు దేశాల మధ్య ఉన్న ఏకాభిప్రాయం, భద్రతా పరమైన నిబద్ధత ఈ పర్యటన ద్వారా మరోసారి స్పష్టమైందని ప్రధాని తన ప్రసంగంలో నొక్కి చెప్పారు.

గ్లోబల్ సౌత్‌పై ఉమ్మడి దృష్టి

గ్లోబల్ సౌత్ దేశాల ఎదుగుదల మరియు భవిష్యత్తు గురించి ప్రధాని నరేంద్ర మోడీ ఆశాభావం వ్యక్తం చేస్తూ, ఈ దేశాలు తమ భవిష్యత్తును తామే నిర్ణయించుకుంటున్నాయని స్పష్టం చేశారు. గ్లోబల్ సౌత్ ప్రస్థానం ఏ దేశానికో వ్యతిరేకం కాదని, ఇది అందరి అభివృద్ధిని కాంక్షించే ఒక సానుకూల పరిణామమని ఆయన వివరించారు. న్యాయమైన అభివృద్ధి, అందరికీ అందుబాటులో ఉండే సాంకేతికత, ప్రతి దేశ సార్వభౌమత్వానికి గౌరవం లభించే ప్రపంచాన్ని నిర్మించడమే భారత్-ఇథియోపియా ఉమ్మడి లక్ష్యమని మోడీ పేర్కొన్నారు. ఈ దిశగా భారత్ ప్రతిపాదించిన 'గ్లోబల్ డెవలప్‌మెంట్ కాంపాక్ట్' గురించి ఆయన వివరిస్తూ, ఇది ప్రధానంగా సాంకేతిక పరిజ్ఞానాన్ని పంచుకోవడం, రాయితీతో కూడిన రుణాలు, సామర్థ్య నిర్మాణం, వాణిజ్య పెంపునకు అత్యంత ప్రాధాన్యత ఇస్తుందని వెల్లడించారు.

ఇథియోపియా ప్రధానితో విస్తృత చర్చలు

ఇథియోపియా ప్రధాని అబీ అహ్మద్‌తో జరిగిన చర్చల తర్వాత, భారత్-ఇథియోపియా సంబంధాలను ‘వ్యూహాత్మక భాగస్వామ్యం’ స్థాయికి పెంచామని మోడీ వెల్లడించారు. దీంతో టెక్నాలజీ, ఆవిష్కరణలు, గనులు, కీలక ఖనిజాలు, శుభ్రమైన శక్తి, ఆహార భద్రత, సామర్థ్య నిర్మాణం, రక్షణ, భద్రత వంటి రంగాల్లో రెండు దేశాల మధ్య సహకారం మరింత పెరుగుతుందని చెప్పారు. కోవిడ్ సమయంలో భారత్ 150కి పైగా దేశాలకు టీకాలు పంపిందని, ఇథియోపియాకు 40 లక్షలకుపైగా డోసులు అందించడం గర్వకారణమని తెలిపారు. భారత కంపెనీలు ఇథియోపియాలో 5 బిలియన్ డాలర్లకు పైగా పెట్టుబడులు పెట్టాయని, దాంతో 75 వేలకుపైగా స్థానిక ఉద్యోగాలు ఏర్పడ్డాయని ప్రధాని తెలిపారు.

భారత్, ఇథియోపియా రెండూ ప్రజాస్వామ్య దేశాలేనని, ప్రజాస్వామ్యం కేవలం వ్యవస్థ కాదు, జీవన విధానమని మోడీ అన్నారు. భారత రాజ్యాంగం “మేము, భారత ప్రజలు” అని ప్రారంభమైతే, ఇథియోపియా రాజ్యాంగం “మేము, ఇథియోపియా ప్రజలు” అని మొదలవుతుందని చెప్పారు. రెండింటి సందేశం ఒక్కటేనని – మన భవిష్యత్తు మన చేతుల్లోనే ఉందని తెలిపారు. ఈ సందర్భంగా ఇథియోపియా అత్యున్నత పురస్కారమైన ‘గ్రేట్ హానర్ నిషాన్ ఆఫ్ ఇథియోపియా’ను అందుకోవడం తనకు దక్కిన గొప్ప గౌరవమని ప్రధాని మోడీ పేర్కొన్నారు.

ఇథియోపియాను ప్రాచీన నాగరికతగా పేర్కొన్న మోడీ, పాత సంప్రదాయాలు ఆధునిక ఆశయాల కలయికే ఈ దేశ బలం అన్నారు. మోడీ ప్రసంగం అనంతరం పార్లమెంట్ సభ్యులు నిలబడి చప్పట్లతో అభినందించారు. అనంతరం ప్రధాని మోడీ ఇథియోపియా పార్లమెంట్‌లో ‘ఏక్ పేడ్ మా కే నామ్’ కార్యక్రమంలో భాగంగా పార్లమెంట్‌లో మొక్క నాటారు. అంతకుముందు, ఆయన అడ్వా విజయ స్మారక చిహ్నాన్ని సందర్శించి నివాళులర్పించారు. ఈ స్మారకం ఇథియోపియా ప్రజల ధైర్యానికి, ఐక్యతకు ప్రతీక ఆయన కొనియాడారు.