ప్రతీకారం తీర్చుకుంటాం: ఇరాన్ కొత్త సుప్రీం లీడర్

మధ్యప్రాచ్య పోరు గురువారానికి 13వ రోజుకు చేరుకున్న తరుణంలో ఇరాన్ నూతన సుప్రీం లీడర్ అయతుల్లా మోజ్తబా ఖమేనీ అత్యంత కఠినమైన వైఖరిని ప్రకటించారు. బాధ్యతలు చేపట్టిన తర్వాత తొలిసారి దేశ ప్రజలను ఉద్దేశించి ప్రసంగించిన ఆయన.. అమెరికా, ఇజ్రాయెల్‌లకు మున్ముందు తగిన గుణపాఠం చెబుతామని హెచ్చరించారు. ప్రపంచ చమురు రవాణాకు జీవనాడి వంటి హోర్ముజ్ జలసంధిపై దిగ్బంధనాన్ని మరింత ఉధృతం చేయాలని, ఈ వ్యూహాత్మక అస్త్రాన్ని శత్రువులకు గుణపాఠం చెప్పేందుకు నిరంతరం వాడాలని తన దళాలకు పిలుపునిచ్చారు.

కొత్త యుద్ధ క్షేత్రాలు సిద్ధం.. ప్రతీకారం తప్పదు!

శత్రువుకు ఏమాత్రం అనుభవం లేని, బలహీనంగా ఉన్న ప్రాంతాల్లో కొత్త యుద్ధ క్షేత్రాలను తెరిచేందుకు తాము అన్ని అధ్యయనాలు పూర్తి చేశామని మోజ్తబా ఖమేనీ వెల్లడించారు. యుద్ధం ఇలాగే కొనసాగితే ఆయా ప్రాంతాల్లో దాడులు ప్రారంభిస్తామని హెచ్చరించారు. తన తండ్రి (అలీ ఖమేనీ) మరణానికి ప్రతీకారం తీర్చుకుంటానని శపథం చేసిన ఆయన.. కేవలం తన తండ్రి రక్తానికే కాకుండా, శత్రువుల చేతిలో మరణించిన ప్రతి ఇరాన్ పౌరుడి రక్తం బొట్టుకూ లెక్క సరిచేస్తామని స్పష్టం చేశారు. వచ్చే ఖుద్స్ దినోత్సవం నాటికి శత్రువును దెబ్బతీసేలా ప్రజలందరూ సిద్ధం కావాలని పిలుపునిచ్చారు.

గల్ఫ్ దేశాలకు హెచ్చరిక

తమ పొరుగున ఉన్న గల్ఫ్ దేశాలకు మోజ్తబా ఒక స్పష్టమైన హెచ్చరిక జారీ చేశారు. "శాంతిని నెలకొల్పుతామన్న అమెరికా మాటలన్నీ పచ్చి అబద్ధాలని ఇప్పటికే మీకు అర్థమై ఉంటుంది. మీ దేశాల్లో ఉన్న అమెరికా సైనిక స్థావరాలను వెంటనే మూసివేయండి" అని ఆయన డిమాండ్ చేశారు. ఇరాన్‌పై దాడులు చేయడానికి ఆయా దేశాల్లోని స్థావరాలను వాడుకుంటున్నారని, అందుకే తాము వాటిని లక్ష్యంగా చేసుకుంటున్నామని వివరించారు. పొరుగు దేశాల భూభాగంపై తమకు ఎలాంటి కన్ను లేదని, కేవలం అమెరికా స్థావరాలనే దెబ్బతీస్తామని ఆయన స్పష్టం చేశారు.

చమురు రవాణాపై నీలి నీడలు

హోర్ముజ్ జలసంధి గుండా రోజుకు సుమారు 2 కోట్ల బ్యారెళ్ల ముడి చమురు రవాణా అవుతుంది. ఇది ప్రపంచ వినియోగంలో ఐదో వంతు. అయితే, ఇరాన్ తాజాగా కొన్ని కొత్త ఆంక్షలు పెట్టింది. దీని ప్రకారం.. అమెరికా, ఇజ్రాయెల్‌లకు మద్దతు ఇవ్వని నౌకలను మాత్రమే తమ సముద్ర మార్గం గుండా వెళ్లనిస్తామని ఇరాన్ స్పష్టం చేస్తోంది. ఈ అనిశ్చితి వల్ల అంతర్జాతీయ మార్కెట్లో చమురు సరఫరా వ్యవస్థలు, ఆర్థిక మార్కెట్లు తీవ్ర ఒత్తిడికి లోనవుతున్నాయి. చమురు ధరలు బ్యారెల్‌కు 100 డాలర్ల మార్కును దాటడంతో ప్రపంచ దేశాలు ఆందోళన చెందుతున్నాయి.