‘ప్రజా పాలన - ప్రగతి ప్రణాళిక’: జీహెచ్ఎంసీ కమిషనర్ ఆకస్మిక తనిఖీలు
గ్రేటర్ హైదరాబాద్ నగరంలో పారిశుధ్యం, పౌర సేవల నిర్వహణపై ప్రత్యేక దృష్టి సారిస్తూ జీహెచ్ఎంసీ కమిషనర్ ఆర్.వి. కర్ణన్ ఆకస్మిక తనిఖీలు నిర్వహించారు. రాష్ట్ర ప్రభుత్వం చేపట్టిన 99 రోజుల “ప్రజాపాలన – ప్రగతి ప్రణాళిక” కార్యక్రమం భాగంగా ఈ తనిఖీలు చేపట్టారు. నగరంలోని పలు ప్రాంతాల్లో పారిశుధ్య పరిస్థితులు, మురుగు నిర్వహణ, చెత్త సేకరణ వంటి అంశాలను ఆయన ప్రత్యక్షంగా పరిశీలించారు.
ఈ సందర్భంగా ఖైరతాబాద్ జోనల్ కమిషనర్ ప్రియాంక అలాతో కలిసి జూబ్లీహిల్స్, బంజారాహిల్స్ ప్రాంతాల్లో పర్యటించి అక్కడ జరుగుతున్న పారిశుధ్య పనులను సమీక్షించారు. బంజారాహిల్స్లోని అపోలో ఆస్పత్రి సమీపంలోని ఎన్బీటీ నగర్, గార్బేజ్ వల్నరబుల్ పాయింట్స్ (జీవీపీలు) వద్ద పరిస్థితులను పరిశీలించారు. చెత్త పేరుకుపోయే ప్రాంతాలను పూర్తిగా తొలగించి పారిశుధ్యాన్ని మెరుగుపరచాలని అధికారులకు ఆదేశాలు ఇచ్చారు.
అలాగే ఖైరతాబాద్ జోన్ పరిధిలోని జూబ్లీహిల్స్ సర్కిల్లో జరుగుతున్న పారిశుధ్య కార్యక్రమాలను కూడా సమీక్షించారు. చెత్త సేకరణ, వీధుల శుభ్రత, మురుగు పారుదల వంటి పనులు సమర్థంగా జరుగుతున్నాయా అనే అంశాలను పరిశీలించి అవసరమైన సూచనలు చేశారు.
ఇదిలా ఉండగా ఎమ్మెల్యే కాలనీలో ఖాళీగా ఉన్న భూమిని కూడా కమిషనర్ పరిశీలించారు. ఆ ప్రదేశాన్ని ప్రజలకు ఉపయోగపడే విధంగా అభివృద్ధి చేసి పార్క్గా మార్చాలని సంబంధిత అధికారులకు సూచించారు. స్థానిక ప్రజలకు విశ్రాంతి, వినోదానికి అనువుగా ఉండేలా పార్క్ అభివృద్ధి చేయాలని చెప్పారు.
ఈ సందర్భంగా 99 రోజుల కార్యక్రమం లక్ష్యాలను దృష్టిలో ఉంచుకుని నగరంలో పారిశుధ్య నిర్వహణ మరింత సమర్థంగా ఉండేలా చర్యలు తీసుకోవాలని అధికారులకు కమిషనర్ సూచించారు. చెత్త పేరుకుపోయే ప్రదేశాలను పూర్తిగా తొలగించి నగర పరిశుభ్రతను మెరుగుపరచడంపై ప్రత్యేక దృష్టి పెట్టాలని ఆయన ఆదేశించారు.