ప్రజలపై భారం పడకుండా అమరావతి అప్పులు తీర్చుతాం: మంత్రి నారాయణ

నవ్యాంధ్ర రాజధాని అమరావతి నిర్మాణం కోసం చేసే అప్పులను ప్రజలు కట్టే పన్నుల నుండి కాకుండా, రాజధాని భూముల విక్రయం ద్వారానే తీరుస్తామని పురపాలక శాఖ మంత్రి పి.నారాయణ స్పష్టం చేశారు. రాజధాని అభివృద్ధి కోసం ప్రభుత్వం అనుసరిస్తున్న వినూత్న వ్యూహాన్ని ఆయన వివరించారు. అమరావతిలో కేటాయించిన భూముల విలువ భవిష్యత్తులో భారీగా పెరగనుందని, తద్వారా వచ్చే ఆదాయంతోనే రుణ విముక్తి సాధ్యమవుతుందని ధీమా వ్యక్తం చేశారు.

5 వేల ఎకరాల విక్రయంతో రుణ విముక్తి

రాజధాని రుణాల చెల్లింపుపై మంత్రి నారాయణ ఒక ప్రకటన విడుదల చేస్తూ.. "అమరావతి కోసం చేసిన అప్పులను ప్రజల పన్నుల ఆదాయంతో చెల్లించం. ఇందుకోసం ప్రత్యేకంగా 5 వేల ఎకరాల భూమిని కేటాయించాం. రాజధాని నిర్మాణం పూర్తయ్యే నాటికి ఇక్కడ ఎకరం ధర రూ.20 కోట్లకు చేరుతుందని అంచనా వేస్తున్నాం" అని పేర్కొన్నారు. ముఖ్యమంత్రి చంద్రబాబు నాయుడు విజన్ వల్లే ఇది సాధ్యమవుతుందని, ప్రజలపై పైసా భారం పడకుండా రాజధానిని నిర్మిస్తామని వివరించారు. ఇప్పటివరకు రాజధానిపై రూ.10 వేల కోట్లు ఖర్చు చేశామని, మరో రూ.51 వేల కోట్ల పనులకు టెండర్లు పిలిచామని వెల్లడించారు.

రైతులకు ప్లాట్ల పంపిణీ

రాజధాని నిర్మాణం కోసం రైతులు ముందుకు రావడంపై మంత్రి సంతోషం వ్యక్తం చేశారు. ఇప్పటివరకు సుమారు 31 వేల మంది రైతులు స్వచ్ఛందంగా 35 వేల ఎకరాల భూమిని ప్రభుత్వానికి ఇచ్చారు. వీరికి తిరిగి ఇవ్వాల్సిన ప్లాట్లలో ఇప్పటికే 98 శాతం పంపిణీ పూర్తయ్యింది. మొత్తం 62,942 ప్లాట్లను రిజిస్ట్రేషన్ చేయగా, సుమారు 30 వేల మంది రైతులు తమ ప్లాట్లను అందుకున్నారు. కేవలం కొన్ని కోర్టు కేసుల వల్ల పెండింగ్‌లో ఉన్న 651 మంది రైతులకు కూడా త్వరలోనే ప్లాట్లు అందజేస్తామని మంత్రి వివరించారు.

ప్రతిపక్షాల విష ప్రచారంపై ధ్వజం

అమరావతిపై వైసీపీ నేతలు చేస్తున్న విమర్శలను మంత్రి నారాయణ తీవ్రంగా ఖండించారు. రాజధాని పనులు శరవేగంగా జరుగుతుండటంతో ఓర్వలేక వై.ఎస్. జగన్ విష ప్రచారం చేస్తున్నారని ధ్వజమెత్తారు. "అమరావతి అంటే అంతర్జాతీయ స్థాయి నగరం. ఆధునిక వసతులతో కూడిన నగరాన్ని నిర్మిస్తుంటే, గత ప్రభుత్వం కాలయాపన చేసి నిర్మాణ వ్యయాన్ని విపరీతంగా పెంచింది" అని ఆయన ఆరోపించారు. వై.ఎస్.జగన్ ప్రతిపాదించిన 'మావిగన్‌' (మచిలీపట్నం, విజయవాడ, గుంటూరు) కారిడార్ ఆచరణ సాధ్యం కాదని ఆయన కొట్టిపారేశారు. 2019 తర్వాత గత ప్రభుత్వ వైఖరి వల్ల ప్రాజెక్టు ఆలస్యమైందని, ప్రస్తుతం అభివృద్ధిని పరుగులు పెట్టిస్తున్నామని మంత్రి నారాయణ పునరుద్ఘాటించారు.