పూలే ఆశయాలే ప్రభుత్వానికి స్ఫూర్తి: ముఖ్యమంత్రి రేవంత్ రెడ్డి

మహోన్నత సామాజిక విప్లవకారుడు, కులవివక్ష వ్యతిరేక పోరాట యోధుడు మహాత్మా జ్యోతిరావు పూలే జయంతి వేడుకలు తెలంగాణ రాష్ట్రవ్యాప్తంగా ఘనంగా జరిగాయి. ముఖ్యమంత్రి ఎ. రేవంత్ రెడ్డితో పాటు కేంద్ర మంత్రులు, పలువురు రాజకీయ నేతలు పూలేకు ఘన నివాళులర్పించారు.

ప్రస్తుతం ఢిల్లీ పర్యటనలో ఉన్న ముఖ్యమంత్రి ఎ. రేవంత్ రెడ్డి, తన నివాసంలో పూలే చిత్రపటానికి పూలమాల వేసి నివాళులర్పించారు. సామాజిక న్యాయం, అందరికీ సమాన అవకాశాలు అనే పూలే ఆశయాలే తమ ప్రభుత్వానికి స్ఫూర్తి అని ఆయన 'ఎక్స్' వేదికగా పేర్కొన్నారు. కేంద్ర మంత్రి కిషన్ రెడ్డి బీజేపీ కార్యకర్తలతో కలిసి అంబర్‌పేటలోని పూలే విగ్రహానికి పూలమాలలు వేసి శ్రద్ధాంజలి ఘటించారు. పూలే బాల్య వివాహాలకు వ్యతిరేకంగా, కుల వివక్షకు వ్యతిరేకంగా చేసిన పోరాటాన్ని కేంద్ర మంత్రి బండి సంజయ్ కొనియాడారు. అయితే, రాష్ట్రంలో అక్షరాస్యత జాతీయ సగటు కంటే తక్కువగా ఉండటంపై ఆయన ఆందోళన వ్యక్తం చేస్తూ, కాంగ్రెస్ పాలన పూలే ఆశయాలకు విరుద్ధంగా సాగుతోందని విమర్శించారు.

మహారాష్ట్రలోని సతారా జిల్లా కట్గున్ గ్రామంలో 1827 ఏప్రిల్ 11న జన్మించిన జ్యోతిరావు పూలే, అణగారిన వర్గాల విద్య, సాధికారత కోసం జీవితాంతం కృషి చేశారు. ఆయన చేసిన పోరాటం నేటికీ సమాజానికి మార్గదర్శకంగా నిలుస్తోందని నేతలు గుర్తుచేసుకున్నారు.