పుంజుకున్న స్టాక్ మార్కెట్లు

దేశీయ స్టాక్ మార్కెట్లు గురువారం మొదట భారీ నష్టాల్లోకి జారుకున్నప్పటికీ చివరికి అద్భుతంగా కోలుకుని లాభాల్లో ముగిశాయి. ఐటీ, బ్యాంకింగ్ షేర్లలో బలమైన కొనుగోళ్లు జరగడం, రూపాయి విలువ గణనీయంగా పుంజుకోవడం వల్ల మార్కెట్లకు ఊతం లభించింది. రోజంతా తీవ్ర ఒడిదుడుకులు ఎదుర్కొన్న బీఎస్‌ఈ సెన్సెక్స్‌ చివరికి 185.23 పాయింట్లు (0.25 శాతం) లాభపడి 73,319.55 వద్ద ముగిసింది. ఉదయం ట్రేడింగ్‌లో సూచీ 1,588 పాయింట్లు పడిపోయి 71,545.81 వద్ద కనిష్ఠాన్ని తాకింది. అయితే చివర్లో భారీ కొనుగోళ్లు రావడంతో 73,568.54 వరకు ఎగబాకింది. అలాగే ఎన్‌ఎస్‌ఈ నిఫ్టీ 50 కూడా ఇదే తరహాలో కోలుకుంది. ప్రారంభంలో 496.85 పాయింట్లు (2.19%) పడిపోయిన సూచీ, చివరకు 33.70 పాయింట్లు (0.15%) లాభపడి 22,713.10 వద్ద ముగిసింది.

ఐటీ, బ్యాంకింగ్ షేర్ల బలం

ఐటీ కంపెనీల్లో పెట్టుబడిదారులు భారీగా కొనుగోళ్లు జరిపారు. ముఖ్యంగా హెచ్‌సీఎల్‌ టెక్నాలజీస్‌, టాటా కన్సల్టెన్సీ సర్వీస్, ఇన్ఫోసిస్ షేర్లు గణనీయంగా పెరిగాయి. అలాగే బ్యాంకింగ్ రంగంలో హెచ్‌డీఎఫ్‌సీ, ఐసీఐసీఐ షేర్లలో కొనుగోళ్లు పెరగడం మార్కెట్ల పునరాగమనానికి తోడ్పడింది.

రూపాయి బలపడటంతో

రిజర్వ్‌ బ్యాంక్‌ ఆఫ్‌ ఇండియా తీసుకున్న చర్యలతో రూపాయి విలువ కూడా గణనీయంగా పెరిగింది. డాలర్‌కు వ్యతిరేకంగా రూపాయి ఒక దశలో 188 పైసలు బలపడుతూ 92 స్థాయికి చేరింది. ఇది పెట్టుబడిదారుల్లో విశ్వాసాన్ని పెంచింది. మరోవైపు అంతర్జాతీయ పరిస్థితులు మాత్రం మార్కెట్లపై ఒత్తిడిని కొనసాగించాయి. అమెరికా అధ్యక్షుడు డోనాల్డ్‌ ట్రంప్‌ ఇరాన్‌పై కఠిన చర్యలు కొనసాగుతాయని ప్రకటించడంతో ముడి చమురు ధరలు ఒక్కసారిగా పెరిగాయి. అంతర్జాతీయ మార్కెట్లో బ్రెంట్ క్రూడ్ ధర బ్యారెల్‌కు 108 డాలర్లకు పైగా చేరింది.

విదేశీ పెట్టుబడుల భారీ ఉపసంహరణ

పశ్చిమ ఆసియా ఉద్రిక్తతల నేపథ్యంలో విదేశీ పెట్టుబడిదారులు (ఎఫ్‌ఐఐస్‌) భారీగా అమ్మకాలు చేస్తున్నారు. మార్చి నెలలోనే వారు రూ.1.22 లక్షల కోట్ల విలువైన షేర్లను విక్రయించినట్లు మార్కెట్ గణాంకాలు సూచిస్తున్నాయి. ఆసియా మార్కెట్లు ఎక్కువగా నష్టాల్లో ముగిశాయి. దక్షిణ కొరియా కోస్పి, జపాన్ నిక్కీ, హాంకాంగ్ హాంగ్‌సెంగ్ సూచీలు పడిపోయాయి. యూరప్ మార్కెట్లు కూడా నష్టాల్లో ట్రేడయ్యాయి. ఇక శుక్రవారం గుడ్‌ ఫ్రైడే సందర్భంగా ఈక్విటీ, ఫారెక్స్ మార్కెట్లు మూసివేస్తారు.