పీఎం ఏక్తా మాల్ టెండర్లలో భారీ కుంభకోణం: కేటీఆర్

తెలంగాణలో కాంగ్రెస్‌ ప్రభుత్వం ప్రతిష్ఠాత్మకంగా చేపడుతున్న పీఎం ఏక్తా (యూనిటీ) మాల్‌ టెండర్‌ ప్రక్రియలో భారీ కుంభకోణం జరిగిందని బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ ఆరోపించారు. ప్రజాధనానికి నష్టం కలిగించేలా, ప్రైవేట్‌ డెవలపర్‌కు అనుచిత ప్రయోజనం చేకూరే విధంగా టెండర్‌ నిబంధనలు రూపొందించారని ఆయన పేర్కొన్నారు. ఈ వ్యవహారంపై స్వతంత్ర దర్యాప్తు జరిపించాలని కేంద్ర ఆర్థిక మంత్రి నిర్మలా సీతారామన్‌ను కోరారు. అయితే కేటీఆర్‌ ఆరోపణలను రాష్ట్ర పరిశ్రమల శాఖ మంత్రి డి.శ్రీధర్‌బాబు తీవ్రంగా ఖండించారు. టెండర్‌ ప్రక్రియలో ఎలాంటి అవకతవకలు జరగలేదని స్పష్టం చేశారు.

కేంద్ర ఆర్థిక మంత్రికి కేటీఆర్ లేఖ

పీఎం ఏక్తా మాల్‌కు సంబంధించిన టెండర్‌ను వెంటనే రద్దు చేసి, ప్రాజెక్టుకు కేంద్రం నుంచి తదుపరి నిధుల విడుదలను నిలిపివేయాలని కేటీఆర్‌ కేంద్ర ఆర్థిక మంత్రికి రాసిన లేఖలో కోరారు. తెలంగాణలో ముఖ్యమంత్రి ఎ.రేవంత్‌రెడ్డి నేతృత్వంలోని కాంగ్రెస్‌ ప్రభుత్వం రూపొందించిన టెండర్‌ నిబంధనలు అనుమానాస్పదంగా ఉన్నాయని ఆయన ఆరోపించారు. రాయదుర్గంలోని అత్యంత విలువైన 6.30 ఎకరాల ప్రభుత్వ స్థలంలో దాదాపు 27 లక్షల చదరపు అడుగుల బిల్ట్-అప్ ఏరియాతో పీఎం ఏక్తా మాల్ ప్రాజెక్టును ప్రతిపాదించారు. భూమి విలువ మినహాయించి ఈ ప్రాజెక్ట్ అంచనా వ్యయం రూ. 2,059.81 కోట్లు కాగా, దీనికి కేంద్ర ప్రభుత్వం నుంచి రూ. 202 కోట్ల మేర ఆర్థిక సాయం అందింది.

ఈ ప్రాజెక్టులో ప్రభుత్వానికి లభించే కనీస వాటా కేవలం 9 లక్షల చదరపు అడుగులు మాత్రమేనని, అయితే ప్రైవేట్ డెవలపర్‌కు ఏకంగా 18 లక్షల చదరపు అడుగులు కేటాయించేలా నిబంధనలు రూపొందించారని కేటీఆర్ ఆరోపించారు. విలువైన ప్రభుత్వ స్థలం, కేంద్ర నిధులతో నిర్మించే ప్రాజెక్టులో డెవలపర్‌కు ప్రభుత్వం కంటే రెట్టింపు స్థలాన్ని ఏ ప్రాతిపదికన ఇస్తారని ప్రశ్నించారు. కేంద్రం అందించే రూ. 200 కోట్ల వడ్డీ లేని రుణాన్ని తెలంగాణ ట్రేడ్ ప్రమోషన్ కార్పొరేషన్ లిమిటెడ్ ద్వారా సదరు ప్రైవేట్ డెవలపర్‌కు అనుకూలంగా మళ్లించేలా ఫైనాన్షియల్ మోడల్ ఉందన్నారు. సీఎం రేవంత్ రెడ్డి నేతృత్వంలోని ప్రభుత్వం ప్రైవేట్ వ్యక్తులకు అపారమైన లబ్ధి చేకూర్చేలా టెండర్ నిబంధనలను సవరించిందని ఆరోపిస్తూ, కేంద్రం తక్షణమే నిధుల విడుదలను నిలిపివేయాలని కోరారు.

ఆరోపణలను ఖండించిన మంత్రి శ్రీధర్ బాబు

కేటీఆర్ చేసిన ఆరోపణలపై పరిశ్రమల శాఖ మంత్రి డి. శ్రీధర్ బాబు ఘాటుగా స్పందించారు. పీఎం ఏక్తా మాల్ టెండర్ల ప్రక్రియలో ఎటువంటి అక్రమాలు జరగలేదని స్పష్టం చేశారు. నిబంధనలు, నిర్దేశిత ప్రక్రియలకు కట్టుబడి అత్యంత పారదర్శకంగా టెండర్లను నిర్వహించినట్లు మంత్రి తెలిపారు. ప్రాజెక్టు టెండర్లు, ఫైనాన్షియల్ మోడల్, డీపీఆర్ లతో సహా సంపూర్ణ వివరాలను ప్రభుత్వానికి వెంటనే సమర్పించాలని తెలంగాణ ట్రేడ్ ప్రమోషన్ అధికారులను ఆదేశించినట్లు చెప్పారు. జాతీయ ప్రాముఖ్యత కలిగిన ప్రాజెక్టులపై కేటీఆర్ అసత్య ప్రచారాలు చేయడం మానుకోవాలని, రాజకీయ ప్రయోజనాల కోసం ప్రజలను మభ్యపెట్టవద్దని హితవు పలికారు.

ఫోర్త్ సిటీలో భూముల కేటాయింపుపై బీఆర్‌ఎస్ మరో ఆరోపణ

మరోవైపు, బీఆర్‌ఎస్ అధికారిక ప్రతినిధి మన్నె క్రిశాంక్ కూడా రాష్ట్ర ప్రభుత్వంపై ఆరోపణలు చేశారు. ముఖ్యమంత్రి రేవంత్‌రెడ్డి తన పదవిని దుర్వినియోగం చేసి కుటుంబ సభ్యుల వ్యాపార ప్రయోజనాలకు సహకరిస్తున్నారని ఆరోపించారు. ఫోర్త్ సిటీ ప్రాంతంలోని రవిర్యాలలో ఓ సంస్థకు భూమి కేటాయింపుపై స్వతంత్ర దర్యాప్తు జరపాలని డిమాండ్‌ చేశారు. కేవలం రూ.లక్ష మూలధనం, ఉద్యోగులు లేని సంస్థకు కోట్ల విలువైన భూమిని ఎలా కేటాయించారని ప్రశ్నించారు.

అయితే రవిర్యాలలో ముఖ్యమంత్రి రేవంత్‌రెడ్డి సోదరుడికి చెందిన సంస్థకు తక్కువ ధరకు భూమి కేటాయించారంటూ వచ్చిన వార్తలు పూర్తిగా అవాస్తవమని మంత్రి శ్రీధర్‌బాబు స్పష్టం చేశారు. ఈ ఆరోపణలు నిరాధారమైనవని ఆయన పేర్కొన్నారు.