పాకిస్తాన్లో ఆత్మాహుతి దాడి.. 12 మంది మృతి
పాకిస్తాన్లో ఆత్మాహుతి దాడి చోటు చేసుకుంది. పాక్ రాజధాని ఇస్లామాబాద్లోని జిల్లా కోర్టు వెలుపల మంగళవారం జరిగిన ఆత్మాహుతి దాడిలో కనీసం 12 మంది మరణించినట్లు, 27 మంది గాయపడినట్లు అంతర్గత మంత్రి మొహ్సిన్ నఖ్వి తెలిపారు. దాడి జరిగిన ప్రాంతాన్ని సందర్శించిన నఖ్వి, దాడి చేసిన వ్యక్తి కోర్టు సముదాయంలోకి ప్రవేశించడానికి ప్రయత్నించాడని, కానీ అది విఫలమవడంతో రాజధానిలోని జీ-11 ప్రాంతంలో ఉన్న భవనం గేటు వద్ద ఉన్న ఒక పోలీసు వాహనం దగ్గర మధ్యాహ్నం 12.39 గంటలకు (స్థానిక సమయం) పేలుడుకు పాల్పడ్డాడని చెప్పారు. ఇస్లామాబాద్ జిల్లా జ్యుడీషియల్ కాంప్లెక్స్ సమీపంలో జరిగిన ఈ పేలుడులో భద్రతా సిబ్బంది, ఒక న్యాయవాది సహా 12 మంది మరణించగా, 27 మంది గాయపడ్డారని మంత్రి తెలిపారు.
ఈ దాడికి ఇప్పటివరకు ఏ సంస్థ లేదా వ్యక్తి బాధ్యత ప్రకటించనప్పటికీ, ఇటువంటి దాడులు సాధారణంగా నిషేధిత సంస్థ అయిన తెహ్రీక్-ఏ-తాలిబాన్ పాకిస్తాన్ చేస్తుంది. "దాడి చేసిన వ్యక్తిని గుర్తించడమే మా మొదటి ప్రాధాన్యత. ఎప్పుడు గుర్తించినా మీడియాకు తెలియజేస్తాము" అని నఖ్వి అన్నారు. నిందితుడిని చట్టం ముందు నిలబెడతామని హామీ ఇచ్చారు. దాడి వెనుక కారణాలను వివరిస్తూ "భారతీయులు తరచుగా చేసే విధంగా (ఇటువంటి సంఘటనలు జరిగిన వెంటనే నిందలు వేయడం ప్రారంభిస్తారు) మేము చేయము. మేము పూర్తి సాక్ష్యాధారాలతో వస్తాము" అని నఖ్వి వ్యాఖ్యానించారు.
"ఆఫ్ఘనిస్తాన్ తమ భూభాగం నుండి వచ్చే ఉగ్రవాదాన్ని ఆపాలి. లేకుంటే మేము వారిపై చర్య తీసుకోవలసి ఉంటుంది" అని పాకిస్తాన్ స్పష్టం చేసింది. పాక్ రక్షణ మంత్రి ఖవాజా ఆసిఫ్ ఈ దాడిని ఆఫ్ఘన్ తాలిబాన్ పంపిన సందేశంగా అభివర్ణించారు. "కాబూల్ పాలకులు పాకిస్తాన్లో ఉగ్రవాదాన్ని ఆపగలరు, కానీ ఈ యుద్ధాన్ని ఇస్లామాబాద్ వరకు తీసుకురావడం కాబూల్ నుండి వచ్చిన సందేశం. దీనికి ప్రతిస్పందించే పూర్తి శక్తి పాకిస్తాన్కు ఉంది. ఇది యావత్ పాకిస్తాన్ కోసం జరుగుతున్న యుద్ధం. ఈ ఆత్మాహుతి దాడిని మేల్కొలుపుగా తీసుకోవాలి" అని హెచ్చరించారు.
అధ్యక్షుడు ఆసిఫ్ అలీ జర్దారీ ఈ ఆత్మాహుతి దాడిని తీవ్రంగా ఖండించారు. మృతుల కుటుంబాలకు సానుభూతిని వ్యక్తం చేశారు. ప్రభుత్వ రంగ పాకిస్తాన్ టెలివిజన్ నివేదిక ప్రకారం, రెస్క్యూ అధికారులు 12 మృతదేహాలను వెలికితీసి పాకిస్తాన్ ఇన్స్టిట్యూట్ ఆఫ్ మెడికల్ సైన్సెస్ ఆసుపత్రికి తరలించారు. 20 మంది గాయపడిన వ్యక్తులను అత్యవసర విభాగానికి తరలించారు.
ఆఫ్ఘనిస్తాన్తో సరిహద్దు వద్ద ఉన్న ప్రాంతాలలో ముఖ్యంగా ఖైబర్ పఖ్తూన్ఖ్వా ప్రావిన్స్లో ఇటీవల ఉగ్రవాద దాడులు పెరిగాయి. సోమవారం దక్షిణ వజీరిస్తాన్ జిల్లాలోని ఒక క్యాడెట్ కళాశాల గేటు వద్ద జరిగిన ఆత్మాహుతి దాడిలో ఆరుగురు గాయపడ్డారు. ఆఫ్ఘనిస్తాన్ నుండి ఉగ్రవాదాన్ని ఎదుర్కోవడానికి సంబంధించి పాకిస్తాన్-ఆఫ్ఘన్ తాలిబాన్ మధ్య జరిగిన మూడవ విడత చర్చలు విఫలమైన కొద్ది రోజులకే ఈ దాడి జరగడం గమనార్హం.