పసిఫిక్ మహాసముద్రంలో 6.1 తీవ్రతతో భారీ భూకంపం

దక్షిణ పసిఫిక్ మహాసముద్రం ఆదివారం అర్ధరాత్రి భారీ భూకంపంతో ఒక్కసారిగా ఉలిక్కిపడింది. రిక్టర్ స్కేలుపై 6.1 తీవ్రతతో సంభవించిన ఈ భూకంపం సముద్ర గర్భంలో అలజడి సృష్టించింది. భారత కాలమానం ప్రకారం ఆదివారం రాత్రి 8:57 గంటలకు భూమి కంపించిందని జాతీయ భూకంప శాస్త్ర కేంద్రం వెల్లడించింది. భూకంప కేంద్రం 15.353 దక్షిణ అక్షాంశం, 172.824 పశ్చిమ రేఖాంశాల వద్ద ఉన్నట్లు అధికారులు గుర్తించారు.

10 కి.మీ. లోతులోనే ప్రకంపనలు

ఈ భూకంపం భూగర్భంలో కేవలం 10 కిలోమీటర్ల లోతులోనే సంభవించడం ఆందోళన కలిగిస్తోంది. సాధారణంగా లోతులో వచ్చే భూకంపాల కంటే, ఉపరితలానికి దగ్గరగా వచ్చే ఇటువంటి భూకంపాలు అత్యంత ప్రమాదకరమని శాస్త్రవేత్తలు హెచ్చరిస్తున్నారు. వీటి వల్ల వెలువడే ప్రకంపన తరంగాలు ఉపరితలానికి తక్కువ దూరంలో ప్రయాణించడం వల్ల భూమిపై తీవ్రమైన కుదుపులు సంభవిస్తాయి. దీనివల్ల భారీ ఆస్తి, ప్రాణ నష్టం సంభవించే అవకాశం ఉండటమే కాకుండా, తదుపరి ప్రకంపనలు వచ్చే ప్రమాదం కూడా ఎక్కువగా ఉంటుంది.

'రింగ్ ఆఫ్ ఫైర్' పరిధిలో విధ్వంసం

ప్రపంచంలోనే అత్యంత ప్రమాదకరమైన భూకంప మండలం 'పసిఫిక్ రింగ్ ఆఫ్ ఫైర్' పరిధిలో ఈ ప్రమాదం చోటుచేసుకుంది. ప్రపంచవ్యాప్తంగా సంభవించే అతిపెద్ద భూకంపాలలో దాదాపు 81 శాతం ఈ బెల్ట్‌లోనే సంభవిస్తాయని అమెరికా భూగర్భ సర్వే గణాంకాలు చెబుతున్నాయి. టెక్టోనిక్ ప్లేట్ల కదలికలు, భూగర్భ పలకలు ఒకదాని కిందకు మరొకటి నెట్టబడటం వల్ల ఈ ప్రాంతం నిరంతరం భూకంపాలకు కేంద్రంగా మారుతోంది. గతంలో చిలీ (1960), అలస్కా (1964) వంటి ప్రాంతాల్లో సంభవించిన అతిపెద్ద భూకంపాలు కూడా ఈ పరిధిలోనే సంభవించడం గమనార్హం.

భూకంపాల అడ్డాగా పసిఫిక్ తీరం

సుమారు 40,000 కిలోమీటర్ల పొడవు, 500 కిలోమీటర్ల వెడల్పుతో విస్తరించి ఉన్న ఈ 'రింగ్ ఆఫ్ ఫైర్' వందల ఏళ్లుగా భౌగోళిక మార్పులకు లోనవుతోంది. దక్షిణ అమెరికా, ఆసియా నుంచి మొదలుకొని ఇండోనేషియా, న్యూజిలాండ్ వరకు విస్తరించి ఉన్న ఈ జోన్ ప్రపంచంలోని 90 శాతం భూకంపాలకు నిలయంగా మారింది. ప్రపంచవ్యాప్తంగా ప్రతి ఏటా సుమారు 5 లక్షల భూకంపాలు సంభవిస్తుండగా, అందులో కేవలం ఒక లక్ష ప్రకంపనలను మాత్రమే మనుషులు గుర్తించగలరు. వాటిలో సుమారు 100 భూకంపాలు తీవ్ర నష్టాన్ని కలిగిస్తుంటాయి. ప్రస్తుత ప్రకంపనల నేపథ్యంలో పసిఫిక్ తీర ప్రాంత దేశాలు అప్రమత్తమయ్యాయి.