పోలవరంపై చంద్రబాబు చెప్పేవన్నీ అబద్ధాలే
పోలవరం ప్రాజెక్టుపై సీఎం చంద్రబాబు చెప్పేవన్నీ అబద్ధాలేనని, ప్రాజెక్టును ఆయనే నాశనం చేశారని మాజీ మంత్రి అంబటి రాంబాబు ఆరోపించారు. తాడేపల్లిలోని వైఎస్సార్సీపీ కేంద్ర కార్యాలయంలో శనివారం జరిగిన మీడియా సమావేశంలో ఆయన మాట్లాడారు. సాగునీటి ప్రాజెక్టులు, ముఖ్యంగా పోలవరంపై టీడీపీ అధినేత చంద్రబాబు నాయుడు అసత్యాలు ప్రచారం చేస్తున్నారని తీవ్రంగా ఆరోపించారు. నదుల అనుసంధానం విషయంలో కూడా చంద్రబాబు అబద్ధాలు చెబుతున్నారని ఆయన ధ్వజమెత్తారు.
అంబటి మాట్లాడుతూ, "ఎన్నికల ముందు శంకుస్థాపనలు చేసి, తర్వాత మర్చిపోవడం చంద్రబాబుకు అలవాటు. పోలవరం ప్రాజెక్టును నాశనం చేసిన ఘనత చంద్రబాబుదే. తన అబద్ధాలను కప్పిపుచ్చుకోవడానికి దివంగత ప్రధాని వాజపేయి పేరును కూడా దుర్వినియోగం చేశారు. చంద్రబాబు శంకుస్థాపనలు చేసిన చోట, వైఎస్సార్ మొక్కలు నాటే పని కూడా చేశారు. చంద్రబాబు జీవితంలో శంకుస్థాపన చేసి పూర్తి చేసిన ఏకైక ప్రాజెక్టు పట్టిసీమ మాత్రమే. పోలవరం శంకుస్థాపన చేసింది వైఎస్సార్, కానీ తానే చేసినట్లు చంద్రబాబు సిగ్గులేకుండా అబద్ధాలు చెబుతున్నారు. పోలవరం మీద నిజమైన ప్రేమ ఉంటే, ఆయన ప్రాజెక్టును ఎందుకు సందర్శించడం లేదు?" అని ప్రశ్నించారు. చంద్రబాబు గతంలో కమీషన్ల కోసం ప్రతి సోమవారం పోలవరం వెళ్లేవారని, కాఫర్ డ్యాం, డయాఫ్రం వాల్ వంటి ప్రతి చిన్న విషయానికి శిలాఫలకాలు వేశారని అంబటి విమర్శించారు. "స్పిల్ వే పూర్తి కాకముందే గేట్లు పెడతామని ప్రచారం చేయించారు. చంద్రబాబు అసమర్థ నిర్ణయాల వల్లే పోలవరం ఆలస్యమైంది. విభజన చట్టం ప్రకారం పోలవరాన్ని కేంద్రం నిర్మించాలి, కానీ కమీషన్ల కోసం చంద్రబాబు దాన్ని తీసుకున్నారు. పోలవరాన్ని ఆయన ఏటీఎంలా ఉపయోగిస్తున్నారని ప్రధాని మోడీ స్వయంగా చెప్పారు" అని అంబటి గుర్తు చేశారు. అంబటి మరింత మాట్లాడుతూ, "స్పిల్ వే నిర్మాణం చేసి నదిని డైవర్ట్ చేసిన ఘనత వైఎస్ జగన్ది. చంద్రబాబు 41.15 మీటర్ల వద్ద నీటిని నిలిపేందుకు అంగీకరించడం వల్ల ఉత్తరాంధ్రకు నీరు అందని పరిస్థితి ఏర్పడింది. పోలవరం నిర్మాణంలో తప్పులు జరిగాయని అంతర్జాతీయ నిపుణుల కమిటీ స్పష్టం చేసింది. డయాఫ్రం వాల్ కూడా చంద్రబాబు హయాంలో దెబ్బతిందని ఆ కమిటీ చెప్పింది. మా ప్రభుత్వ హయాంలో వరదల సమయంలో అద్భుతంగా పనిచేశామని ఆ కమిటీ మమ్మల్ని ప్రశంసించింది. పోలవరానికి కావాల్సిన అన్ని అనుమతులు తెచ్చిన ఘనత వైఎస్సార్ది. ఆయన కృషిని జగన్ కొనసాగించారు. కరోనా సమయంలో కూడా పోలవరం నిర్మాణాన్ని వేగవంతం చేశాము" అని అన్నారు.
చంద్రబాబుకు పోలవరాన్ని పూర్తి చేయాలనే ఆలోచన లేదని, అది ఆయన కలలు కన్న ప్రాజెక్టు కాదని అంబటి విమర్శించారు. అలాగే, జనసేన నాయకుడు పవన్ కళ్యాణ్పైనా ఆయన విమర్శలు గుప్పించారు. "పవన్ కళ్యాణ్ అసెంబ్లీలో మాత్రమే కనిపిస్తున్నారు. కేబినెట్ సమావేశాలకు కూడా హాజరు కావడం లేదు. దీని వెనుక రహస్యం ఏమిటో ఆయనకే తెలియాలి. డిప్యూటీ సీఎం సినిమాల్లో నటిస్తే టికెట్ ధరను వెయ్యి రూపాయలు చేస్తారా? అధికారం ఉందని ఇష్టం వచ్చినట్లు చేయడం సరికాదు. ప్రజలను దోచుకోవడం సమంజసం కాదు" అని అంబటి అన్నారు. లోకేష్ ట్వీట్లపై కూడా స్పందిస్తూ, "పరకామణిని వైఎస్సార్సీపీ దోచుకుందని లోకేష్ ట్వీట్ చేయడం అవివేకం. ప్రతి విషయంలో తాము ఉన్నామని చెప్పడం లోకేష్కు అలవాటు. లోకేష్ రెడ్ బుక్ రాజ్యాంగాన్ని మరో మూడేళ్లు కొనసాగిస్తారు. ఆ తర్వాత ఏమవుతుందో కూడా ఆలోచించాలి" అని అంబటి హెచ్చరించారు.