పండిట్లను ఇక్కడికి రావడాన్ని ఎవరు అడ్డుకుంటున్నారు?: ఫరూఖ్ అబ్దుల్లా

కాశ్మీరీ పండితులు ‘ఎగ్జోడస్ డే’ (వలస దినం)ను పాటిస్తూ నిరసనలు చేపట్టిన నేపథ్యంలో, జమ్మూ–కాశ్మీర్ నేషనల్ కాన్ఫరెన్స్ అధ్యక్షుడు ఫరూఖ్ అబ్దుల్లా సోమవారం స్పందించారు. కాశ్మీరీ పండితులు లోయకు తిరిగి రావడాన్ని ఎవరూ అడ్డుకోవడం లేదని, వారి సమాజానికి చెందిన పలువురు ఇప్పటికీ కాశ్మీర్‌లో సౌకర్యంగా జీవిస్తున్నారని ఆయన వివరించారు. మీడియాతో ఫరూఖ్ అబ్దుల్లా మాట్లాడుతూ ఇక్కడికి రావడాన్ని ఎవరు అడ్డుకుంటున్నారు? ఎవరూ వారిని అడ్డుకోవడం లేదు. వారు ఇక్కడికి వచ్చి సౌకర్యంగా జీవించవచ్చు. చాలా మంది పండితులు ఇక్కడే నివసిస్తున్నారు. ఇతరులు వెళ్లిపోయినప్పుడు వారు వెళ్లలేదని అన్నారు. కాశ్మీరీ పండితులు పునరావాస విధానం (రెహాబిలిటేషన్ పాలసీ) కోరుతున్న అంశంపై స్పందిస్తూ నా పాలన సమయంలో వారికి ఇళ్లు నిర్మిస్తామని హామీ ఇచ్చాను. కానీ ఆ తర్వాత మేము అధికారాన్ని కోల్పోయాం. ఇప్పుడు ఈ విషయాన్ని ఢిల్లీ (కేంద్ర ప్రభుత్వం) చూసుకోవాలని ఫరూఖ్ అబ్దుల్లా పేర్కొన్నారు. 1990లో పాకిస్తాన్ మద్దతుతో పనిచేసిన తీవ్రవాదులు మైనారిటీ కాశ్మీరీ పండితులను బెదిరించడంతో వారు లోయను విడిచి వెళ్లాల్సి వచ్చింది. ఆ ఘటనను గుర్తు చేసుకునేందుకు కాశ్మీరీ పండితులు ప్రతి ఏడాది జనవరి 19ను ‘హోలోకాస్ట్ రిమెంబరెన్స్ డే / ఎగ్జోడస్ డే’గా పాటిస్తుంటారు.

ఏఆర్ రెహమాన్ వ్యాఖ్యలపై స్పందన

సంగీత దర్శకుడు ఏ.ఆర్. రెహమాన్ బాలీవుడ్‌పై చేసిన వ్యాఖ్యలపై కూడా ఫరూఖ్ అబ్దుల్లా స్పందించారు. మన దేశంలో గత కొన్ని సంవత్సరాలుగా విద్వేషపు మంటలు రాజేశారు. ఎన్నికల్లో గెలవడానికి హిందువులు–ముస్లింల మధ్య చీలిక తీసుకొస్తున్నారని ఆయన వ్యాఖ్యానించారు. బీబీసీ ఆసియన్ నెట్‌వర్క్‌కు ఇచ్చిన ఇంటర్వ్యూలో ఎనిమిదేళ్లుగా హిందీ చిత్ర పరిశ్రమ నుంచి తనకు పని తగ్గిందని, పరిశ్రమలో వచ్చిన మార్పులతో దీనికి సంబంధం ఉందని ఏ.ఆర్. రెహమాన్ వ్యాఖ్యానించడంతో ఈ వివాదం మొదలైంది. ఆ ఇంటర్వ్యూ అనంతరం అభిమానులు, సినీ ప్రముఖులు విభిన్న స్పందనలు వ్యక్తం చేశారు. తర్వాత ఏ.ఆర్. రెహమాన్ తన ఇన్‌స్టాగ్రామ్ ఖాతాలో ఒక వీడియో సందేశాన్ని పంచుకున్నారు. అందులో ఆయన వివాదాన్ని నేరుగా ప్రస్తావించకపోయినా, భారత్, సంగీతం, సంస్కృతితో తన అనుబంధం గురించి మాట్లాడారు.

స్నేహితులారా, సంగీతం నాకు ఎప్పుడూ ఒక సంస్కృతిని అనుసంధానించడానికి, గౌరవించడానికి, ఆనందించడానికి మార్గంగా ఉంది. భారత్ నా ప్రేరణ, నా గురువు, నా ఇల్లు. కొన్నిసార్లు ఉద్దేశాలను తప్పుగా అర్థం చేసుకోవచ్చు, కానీ నా లక్ష్యం ఎప్పుడూ సంగీతం ద్వారా గౌరవాన్ని, సేవను, ప్రోత్సాహాన్ని అందించడమే అని రెహమాన్ అన్నారు. నేను ఎప్పుడూ ఎవరికీ బాధ కలిగించాలని కోరుకోలేదు. నా నిజాయితీ మీకు అనుభూతి కావాలని ఆశిస్తున్నాను. స్వేచ్ఛా భావప్రకటనకు, బహుళ సంస్కృత స్వరాలకు స్థానం కల్పించే భారతదేశంలో పుట్టినందుకు గర్వంగా ఉందని ఆయన పేర్కొన్నారు.