పంజాబ్‌లో అప్రకటిత రాష్ట్రపతి పాలన

పంజాబ్‌లో కేంద్ర ప్రభుత్వం అప్రకటిత రాష్ట్రపతి పాలన విధించిందని ముఖ్యమంత్రి భగవంత్ మాన్ ఆరోపించారు. "గవర్నర్ ప్రధానమంత్రిని కలుస్తారు. ముఖ్యమంత్రిని కలవడానికి ఆయనకు సమయం దొరకదు. ఒకవైపు పంజాబ్ మా 'ఫుడ్ బౌల్' అంటారు. కానీ వరదలతో నష్టం వచ్చినప్పుడు నిధులు ఎందుకు ఇవ్వరు? అంటూ ఆయన ప్రశ్నించారు. భగవంత్ మాన్ మంగళవారం మీడియాతో మాట్లాడుతూ ఈ వ్యాఖ్యలు చేశారు. బీహార్‌కు కేంద్ర ప్రభుత్వం సహాయంపై వ్యాఖ్యానిస్తూ, బీహార్‌లోని మహిళల కోసం ప్రత్యేకంగా రూ. 7,000 కోట్లు కేటాయించారని.. మరి పంజాబ్ మహిళలకు ఎందుకు డబ్బులు ఇవ్వరని ప్రశ్నించారు. పంజాబ్‌లోని మహిళలు కష్టపడుతున్నారని. అయితే వారి దుస్థితి గురించి కేంద్ర ప్రభుత్వం పట్టించుకోవడం లేదని ఆయన అన్నారు.

మా రాష్ట్ర మహిళలకూ ఇవ్వండి

‘పంజాబ్ రాష్ట్రంలోనూ మహిళలు ఇబ్బంది పడుతున్నారు. వారు టెంట్లలో నివసిస్తున్నారు. వారి ఇళ్లు వరదల్లో చిక్కుకున్నాయి. ఇక్కడి అక్కాచెల్లెళ్ల గురించి వారికి పట్టదు... ఈ విషయాలన్నింటినీ నేను రేపు కేంద్ర హోంమంత్రితో చర్చిస్తాను’ అని భగవంత్ మాన్ పేర్కొన్నారు. (కేంద్ర ప్రభుత్వం) పంజాబ్‌ను ప్రకటించని కేంద్ర పాలిత ప్రాంతంగా మార్చారు," అని మాన్ అన్నారు. పంజాబ్‌లో ఎన్నికైన ప్రభుత్వం ఉందని కూడా పంజాబ్ ముఖ్యమంత్రి ప్రకటించారు, కేంద్ర అధికారులు ప్రజల తీర్పును అవమానిస్తున్నారని ఆరోపించారు.

ప్రజల తీర్పును అవమానిస్తారా?

"ఇది ఎన్నికైన ప్రభుత్వం. మాకు 93 సీట్లు ఉన్నాయి. బీజేపీ ప్రజల తీర్పును అవమానిస్తోంది. అని మాన్ అన్నారు. అంతకుముందు, పంజాబ్ ఆర్థిక మంత్రి హర్‌పాల్ సింగ్ చీమా, పంజాబ్ రూ. 20,000 కోట్ల సహాయం కోరినప్పటికీ, ప్రధానమంత్రి నరేంద్ర మోడీ కేవలం రూ. 1,600 కోట్లు మాత్రమే ప్రకటించారని, అది కూడా ఇంకా విడుదల కాలేదని పేర్కొన్నారు. పంజాబ్ ఆర్థిక మంత్రి హర్‌పాల్ సింగ్ చీమా మీడియాతో మాట్లాడుతూ, "నష్టాలకు పరిహారంగా పంజాబ్ రూ. 20,000 కోట్లు డిమాండ్ చేసింది, కానీ ప్రధానమంత్రి రూ. 1,600 కోట్లు మాత్రమే ప్రకటించి వెళ్ళిపోయారు. అది కూడా ఇప్పటికీ రాలేదు. మేము దీని గురించి కూడా చర్చిస్తాము."

"మొదటి రోజునే ఇద్దరు బీజేపీ ఎమ్మెల్యేలు సభ నుంచి వెళ్లిపోవడం దురదృష్టకరం. స్పీకర్ వారికి సమయం ఇచ్చినా, వారు కేంద్రంతో పంజాబ్ సమస్యలను లేవనెత్తలేదు."అంటూ ఆయన విమర్శించారు.

కేంద్రం వివక్ష నిజమేనా?

పంజాబ్ ముఖ్యమంత్రి భగవంత్ మాన్ చేసిన సంచలన ఆరోపణలు దేశంలో కేంద్ర-రాష్ట్ర సంబంధాలపై నెలకొన్న రాజకీయ వివాదానికి అద్దం పడుతున్నాయి. బీజేపీయేతర ప్రభుత్వాలు కేంద్రం తీరును తప్పుపడుతున్నాయి. గవర్నర్ల వ్యవస్థను అడ్డం పెట్టుకొని పాలనలో జోక్యం చేసుకుంటున్నారన్నది వాళ్ల ఆరోపణ.

సమాఖ్య స్ఫూర్తిపై ప్రశ్నలు

పంజాబ్ ముఖ్యమంత్రి భగవంత్ మాన్ కేంద్ర ప్రభుత్వంపై చేసిన 'అప్రకటిత రాష్ట్రపతి పాలన' ఆరోపణలు, దేశంలో సమాఖ్య స్ఫూర్తి లోపించిందన్న అంశాన్ని లేవనెత్తుతున్నాయి. రాజ్యాంగం ప్రకారం రాష్ట్రాలకు అనేక అంశాల్లో విస్తృత, అపరిమిత అధికారాలు ఉన్నాయి. అయితే కేంద్ర ప్రభుత్వం మాత్రం గవర్నర్లను అడ్డుపెట్టుకొని రాష్ట్రాలను అదుపు చేస్తున్నదన్న ఆరోపణలు ఉన్నాయి. ముఖ్యంగా బీజేపీయేతర ప్రభుత్వాలు ఉన్న రాష్ట్రాల్లో ఇటువంటి విమర్శలు వస్తున్నాయి.

లేని అధికారాలను నెత్తిన వేసుకుంటున్నారా?

కొన్ని రాష్ట్రాల్లో ముఖ్యంగా తమిళనాడు, పశ్చిమబెంగాల్ వంటి రాష్ట్రాల్లో ప్రతిపక్ష పార్టీలు అధికారంలో ఉండటంతో అక్కడ ప్రభుత్వాలను గవర్నర్ లు ఇబ్బందులకు గురి చేస్తున్నారన్న విమర్శలు ఉన్నాయి. ప్రజల ద్వారా ఎన్నికైన ముఖ్యమంత్రులకు కేంద్రం ద్వారా నియమించబడ్డ గవర్నర్లకు మధ్య అగాథం నెలకొన్నది.

గవర్నర్ల పాత్రపై పెరుగుతున్న వివాదం

ముఖ్యమంత్రి మాన్ ఆరోపణల ప్రకారం, పంజాబ్ గవర్నర్ రాష్ట్ర ముఖ్యమంత్రికి అపాయింట్‌మెంట్ ఇవ్వకుండా ప్రధానమంత్రిని కలవడానికి మాత్రమే సమయాన్ని కేటాయించడం, రాజ్యాంగపరంగా ఎన్నికైన రాష్ట్ర ప్రభుత్వాన్ని అవమానించడమేనని విశ్లేషకులు అంటున్నారు. రాష్ట్రంలోని కీలక అంశాలపై నిర్ణయాధికారాన్ని గవర్నర్, కేంద్రం తీసుకుంటున్నాయని, ఇది ప్రజలచే ఎన్నుకోబడిన ప్రభుత్వాన్ని అవమానించడమేనని ఆప్ నేతలు చెబుతున్నారు. రాజ్యాంగ విరుద్ధమని అంటున్నారు.

కేరళ, తమిళనాడులోని ఇదే పరిస్థితి

కేరళ, తమిళనాడు, పశ్చిమ బెంగాల్, వంటి అనేక రాష్ట్రాల ముఖ్యమంత్రులు కూడా గవర్నర్లు కేంద్రానికి అనుకూలంగా వ్యవహరిస్తున్నారని విమర్శించారు. రాష్ట్ర ప్రభుత్వం నిర్ణయించిన ముఖ్యమైన బిల్లులను అడ్డుకుంటున్నారని లేదా ఆలస్యం చేస్తున్నారని తరచూ విమర్శలు గుప్పిస్తున్నారు. ఇది సమాఖ్య స్ఫూర్తికి విరుద్ధమని, రాష్ట్రాల స్వయంప్రతిపత్తిని ఉద్దేశపూర్వకంగా దెబ్బతీసే చర్యలని విపక్షాలు వాదిస్తున్నాయి.

వరద సాయం ఎందుకు చేయడం లేదు?

పంజాబ్‌లో తీవ్ర వరదల వల్ల పంటలకు, ఆస్తులకు భారీ నష్టం వాటిల్లిందని, అయినప్పటికీ కేంద్రం నుంచి తమకు రావాల్సిన రూ. 20,000 కోట్ల సాయంలో కనీసం ప్రకటించిన రూ. 1,600 కోట్లు కూడా అందలేదని ఆప్ ప్రభుత్వం పేర్కొంది. ఇదే సమయంలో, ఎన్నికలు జరగనున్న బీహార్‌లోని మహిళల కోసం కేంద్రం రూ. 7,000 కోట్లకుపైగా నిధులు కేటాయించిందని మాన్ ఆరోపించారు.

నిధుల కేటాయింపుపై విమర్శలు

బీజేపీ, ఎన్డీయే ప్రభుత్వాలు అధికారంలో ఉన్న రాష్ట్రాలకు మాత్రమే అధిక నిధులు ఇస్తున్నారన్న విమర్శలు వస్తున్నాయి. ఇది ఫెడరల్ స్ఫూర్తికి విరుద్ధమని రాజ్యాంగ నిపుణులు చెబుతున్నారు. ఈ ఆరోపణలు దేశవ్యాప్తంగా కేంద్రం నిధుల కేటాయింపు విధానంపై ప్రశ్నలు లేవనెత్తుతున్నాయి. దేశంలోని అన్ని రాష్ట్రాల మహిళలకు, ప్రజలకు కేంద్రం సమానంగా సహాయం చేయాలనే డిమాండ్ రాజకీయ వేదికపైకి వచ్చింది. ప్రకృతి విపత్తుల విషయంలో కేంద్రం తక్షణ సహాయం అందించకపోవడం అనేది, ఆర్థికంగా రాష్ట్రాలను బలహీనపరిచి, రాష్ట్ర ప్రభుత్వాల పాలనపై ప్రజల్లో వ్యతిరేకత పెంచేందుకు ఉద్దేశించిన రాజకీయ ఎత్తుగడ అని ప్రతిపక్ష పార్టీలు బలంగా నమ్ముతున్నాయి.

అప్రకటిత యూటీ?

ముఖ్యమంత్రి మాన్ కేంద్ర ప్రభుత్వాన్ని ఉద్దేశించి పంజాబ్‌ను అప్రకటిత కేంద్ర పాలిత ప్రాంతంగా మార్చేశారు. అని వ్యాఖ్యానించారు. అంటే ఆయన ఏ స్థాయిలో ఇబ్బందికి గురవుతున్నారో అర్థమవుతోంది. కేంద్ర-రాష్ట్ర ఘర్షణలు కేవలం పరిపాలనాపరమైన సమస్యలు కావు. ఇవి దేశంలో పెరుగుతున్న కేంద్రీకృత అధికారం పట్ల వస్తున్న వ్యతిరేకతకు సంకేతం. ఎన్నికలలో మెజారిటీ సాధించినా, రాజ్యాంగపరమైన పదవులను ఉపయోగించి తమను నియంత్రించాలని కేంద్రం ప్రయత్నిస్తోందని బీజేపీయేతర రాష్ట్రాలు భావిస్తున్నాయి. మరి కేంద్రం ఈ విమర్శలను మాత్రం పెద్దగా పట్టించుకోవడం లేదు. గతంలో కాంగ్రెస్ పాలనలో కూడా గవర్నర్లను అడ్డుపెట్టుకొని ప్రభుత్వాలను కూల్చిన చరిత్ర ఉందని బీజేపీ ప్రత్యారోపణ చేస్తోంది. అంతేకాక తాము అన్ని రాష్ట్రాలను సమానంగా చూస్తున్నామని అంటున్నది. ఈ వివాదం ఎక్కడిదాకా వెళ్తుందో వేచి చూడాలి.