న్యాయం ప్రజల వరకు చేరడం లేదు: సీజేఐ సూర్యకాంత్
దేశంలో న్యాయవ్యవస్థ ఎదుర్కొంటున్న ప్రధాన సవాలు చట్టాల కొరత కాదని, సాధారణ ప్రజలకు న్యాయం అందుబాటులో లేకపోవడమే పెద్ద సమస్య అని భారత ప్రధాన న్యాయమూర్తి సూర్యకాంత్ అన్నారు. ఉత్తరాఖండ్లో ఆదివారం నిర్వహించిన రెండు రోజుల ఉత్తర జోన్ ప్రాంతీయ సదస్సులో ఆయన మాట్లాడుతూ, భారత రాజ్యాంగం బలమైన హక్కులు, విధానాలను ఇచ్చినప్పటికీ అవి ప్రజల వరకు సరిగా చేరడం లేదని వ్యాఖ్యానించారు. ఈ సదస్సును నేషనల్ లీగల్ సర్వీస్ అథారిటీ, ఉత్తరాఖండ్ హైకోర్టు, ఉత్తరాఖండ్ స్టేట్ లీగల్ సర్వీస్ అథారిటీ సంయుక్తంగా నిర్వహించాయి.
న్యాయం ప్రతి పౌరుడి ఇంటి గడప వరకు చేరాలి
ఈ సందర్భంగా సీజేఐ మాట్లాడుతూ న్యాయం కేవలం వ్యవస్థలో ఉండడం సరిపోదని, అది ప్రతి పౌరుడి ఇంటి వరకు చేరాల్సిన అవసరం ఉందని చెప్పారు. రాజ్యాంగ బలం అది ఇచ్చిన హక్కుల్లో కాదు, ఆ హక్కులు ఎంతమందికి నిజంగా చేరుతున్నాయనే దానిలో ఉంటుందని ఆయన వ్యాఖ్యానించారు.
భౌగోళిక అడ్డంకులు
ఉత్తరాఖండ్ వంటి కొండ ప్రాంతాల్లో రవాణా, కమ్యూనికేషన్ సమస్యల కారణంగా న్యాయసేవలకు చేరుకోవడం కష్టమవుతోందని ఆయన పేర్కొన్నారు. లడఖ్, శ్రీనగర్, నాగాలాండ్, కేరళ వంటి ప్రాంతాల్లో చేసిన పర్యటనల్లో కూడా ఇలాంటి సమస్యలు గమనించానని చెప్పారు. లీగల్ ఎయిడ్ స్కీములు, అవగాహన కార్యక్రమాలు, మల్టీ సర్వీస్ క్యాంపులు న్యాయం అందుబాటును పెంచే కీలక మార్గాలని ఆయన తెలిపారు. అలాగే వివాద పరిష్కారానికి మధ్యవర్తిత్వం (ఏడీఆర్), లోక్ అదాలత్లు వంటి పద్ధతులను బలోపేతం చేయాలని సూచించారు.
“న్యాయ మిత్ర” పోర్టల్ ప్రశంస
ఉత్తరాఖండ్ లీగల్ సర్వీసెస్ అథారిటీ ప్రారంభించిన ‘న్యాయ మిత్ర’ పోర్టల్ను ఆయన ప్రశంసించారు. భౌగోళికంగా కష్టమైన ప్రాంతాల్లో ప్రజలకు న్యాయసేవలను చేరువ చేయడంలో ఇది కీలక పాత్ర పోషిస్తుందని చెప్పారు. మొత్తంగా, న్యాయం అందుబాటు ఉండడం, ప్రాంతీయ సమస్యలకు అనుగుణమైన విధానాలు, వేగవంతమైన వివాద పరిష్కార వ్యవస్థ అవసరమని సీజేఐ సూర్యకాంత్ అభిప్రాయం వ్యక్తం చేశారు.