నోట్ల రద్దులాగే వీబీ–జీ రాం–జీ చట్టం: రాహుల్ గాంధీ
ఇటీవల పార్లమెంట్ లో ఆమోదం పొందిన వికసిత్ భారత్ గ్యారంటీ ఫర్ రోజ్ గార్ అండ్ అజీవికా మిషన్ (గ్రామీణ) ( వీబీ–జీ రాం–జీ) చట్టంపై కేంద్ర ప్రభుత్వాన్ని లక్ష్యంగా చేసుకుని కాంగ్రెస్ నేత, లోక్సభ ప్రతిపక్ష నాయకుడు రాహుల్ గాంధీ తీవ్ర విమర్శలు చేశారు. ఈ చట్టం రాష్ట్రాలపై, పేద ప్రజలపై వినాశకర దాడి అని, ఇది నోట్ల రద్దు (డీమానిటైజేషన్) నిర్ణయం తరహాలోనే ఉందని ఆయన వ్యాఖ్యానించారు. శనివారం జరిగిన కాంగ్రెస్ వర్కింగ్ కమిటీ (సీడబ్ల్యూసీ) సమావేశం అనంతరం నిర్వహించిన మీడియా సమావేశంలో మాట్లాడిన రాహుల్ గాంధీ, ఈ చట్టం ద్వారా రాష్ట్రాలకు చెందాల్సిన నిధులు, నిర్ణయాధికారాలను కేంద్రం స్వాధీనం చేసుకుంటోందని ఆరోపించారు.
ఎంజీఎన్ఆర్ఈజీఏని ప్రధానే ధ్వంసం చేశారు
మహాత్మా గాంధీ జాతీయ గ్రామీణ ఉపాధి హామీ చట్టం (ఎంజీఎన్ఆర్ఈజీఏ)ను ప్రధాని నరేంద్ర మోడీ కేబినెట్ను సంప్రదించకుండా, ఎలాంటి అధ్యయనం చేయకుండా ఒంటరిగా నిర్వీర్యం చేశారని రాహుల్ గాంధీ ఆరోపించారు. ఇది నోట్ల రద్దు సమయంలో తీసుకున్న ఏకపక్ష నిర్ణయాన్ని పోలి ఉందన్నారు. ఇది పూర్తిగా ప్రధాని చేతిలోనే నాశనం అయ్యింది. కేబినెట్ను అడగలేదు, అంశాన్ని అధ్యయనం చేయలేదు. ఇది భారతదేశ రాష్ట్రాలపై దాడి. రాష్ట్రాలకు చెందిన డబ్బును, నిర్ణయాధికారాన్ని తీసేస్తున్నారు. ఎంజీఎన్ఆర్ఈజీఏ ద్వారా నిర్మించిన మౌలిక సదుపాయాలపై కూడా ఇది దాడి. కాబట్టి ఇది రాష్ట్రాలపై, పేద ప్రజలపై వినాశకర దాడి నోట్ల రద్దు లాగానే అని రాహుల్ గాంధీ అన్నారు.
నోట్ల రద్దు ప్రస్తావన
2016 నవంబర్ 8న ప్రధాని నరేంద్ర మోడీ రూ.500, రూ.1000 నోట్లను చెల్లని కరెన్సీగా ప్రకటిస్తూ నోట్ల రద్దును అమలు చేశారు. నల్లధనం, నకిలీ కరెన్సీ, ఉగ్రవాద నిధులను అరికట్టడం, డిజిటల్ చెల్లింపులను ప్రోత్సహించడం, ఆర్థిక వ్యవస్థను అధికారికంగా మార్చడం లక్ష్యంగా ఈ నిర్ణయం తీసుకున్నట్లు అప్పట్లో కేంద్రం ప్రకటించింది.
కేవలం ఇది పని పథకం కాదు
ఎంజీఎన్ఆర్ఈజీఏని కేవలం ఓ ఉపాధి పథకంగా చూడకూడదని రాహుల్ గాంధీ స్పష్టం చేశారు. ఇది ఒక సంపూర్ణ అభివృద్ధి దృక్పథం, హక్కుల ఆధారిత అభివృద్ధి నమూనా అని, ప్రపంచవ్యాప్తంగా దీనికి గుర్తింపు ఉందన్నారు. కాంగ్రెస్ అధ్యక్షుడు మల్లికార్జున ఖర్గే గతంలో చేసిన వ్యాఖ్యలను రాహుల్ గాంధీ ప్రస్తావిస్తూ, ఖర్గే 16 దేశాలు సందర్శించినప్పుడు ప్రతి దేశంలోనూ భారతదేశం తీసుకొచ్చిన ఈ హక్కుల ఆధారిత అభివృద్ధి చట్టాన్ని ప్రశంసించారని చెప్పారు. ఎంజీఎన్ఆర్ఈజీఏ ఒక వర్క్ ప్రోగ్రామ్ మాత్రమే కాదు. ఇది ఒక అభివృద్ధి ఫ్రేమ్వర్క్. ప్రపంచవ్యాప్తంగా దీనికి ప్రశంసలు లభించాయని అన్నారు.
జనవరి 5 నుంచి సేవ్ ఎంజీఎన్ఆర్ఈజీఏ జాతీయ ఉద్యమం
ఇదివరకే శనివారం జరిగిన కాంగ్రెస్ వర్కింగ్ కమిటీ సమావేశం అనంతరం, కాంగ్రెస్ అధ్యక్షుడు మల్లికార్జున ఖర్గే జనవరి 5 నుంచి దేశవ్యాప్తంగా సేవ్ ఎంజీఎన్ఆర్ఈజీఏ ఉద్యమాన్ని ప్రారంభిస్తామని ప్రకటించారు. ఖర్గే మీడియాతో మాట్లాడుతూ సేవ్ ఎంజీఎన్ఆర్ఈజీఏని కేంద్రబిందువుగా చేసుకుని పెద్ద ఎత్తున ప్రజా ఉద్యమం చేపడతామని, సమావేశంలో పార్టీ నాయకులందరూ ఈ చట్టాన్ని రక్షిస్తామని ప్రమాణం చేశారని తెలిపారు.
మేం ఈ సమావేశంలో ప్రమాణం చేశాం. దేశవ్యాప్తంగా భారీ ఉద్యమాన్ని ప్రారంభించాలని నిర్ణయించాం. భారత జాతీయ కాంగ్రెస్ పార్టీ ముందుండి జనవరి 5 నుంచి ఎంజీఎన్ఆర్ఈజీఏ సేవ్ క్యాంపెయిన్ను ప్రారంభిస్తుంది అని చెప్పారు. కేవలం ఇది సంక్షేమ పథకం కాదని, ఇది రాజ్యాంగం హామీ ఇచ్చిన పని హక్కు అని ఆయన అన్నారు. మేం ఉపాధి హామీ పథకాన్ని ఎలాంటి పరిస్థితుల్లోనైనా రక్షిస్తాం. ఇది ఒక పథకం కాదు, రాజ్యాంగ హక్కు. అలాగే ఎంజీఎన్ఆర్ఈజీఏ నుంచి గాంధీజీ పేరును తొలగించే కుట్రలను ప్రజాస్వామ్యంగా వ్యతిరేకిస్తాం అని ఖర్గే స్పష్టం చేశారు.