నోట్ల కట్టల కేసు: జస్టిస్ యశ్వంత్ వర్మకు సుప్రీంకోర్టులో చుక్కెదురు

నోట్ల కట్టల కేసులో అలహాబాద్‌ హైకోర్టు న్యాయమూర్తి జస్టిస్‌ యశ్వంత్‌ వర్మకు సుప్రీంకోర్టులో చుక్కెదురైంది. తనపై వచ్చిన అవినీతి ఆరోపణల విచారణకు లోక్‌సభ స్పీకర్ ఏర్పాటు చేసిన పార్లమెంటరీ కమిటీ చట్టబద్ధతను సవాలు చేస్తూ ఆయన దాఖలు చేసిన పిటిషన్‌ను అత్యున్నత న్యాయస్థానం శుక్రవారం కొట్టివేసింది. జస్టిస్ దీపాంకర్ దత్తా, జస్టిస్ ఎస్.సి. శర్మలతో కూడిన ధర్మాసనం ఈ కీలక తీర్పును వెలువరించింది.

రాజ్యసభ డిప్యూటీ ఛైర్మన్ అధికారాలపై కీలక వ్యాఖ్యలు

ఈ కేసు విచారణ సందర్భంగా రాజ్యసభ డిప్యూటీ ఛైర్మన్ అధికారాల గురించి ధర్మాసనం కీలక వ్యాఖ్యలు చేసింది. రాష్ట్రపతి లేని సమయంలో ఉపరాష్ట్రపతి విధులను ఎలా నిర్వర్తిస్తారో, అలాగే ఛైర్మన్ అందుబాటులో లేనప్పుడు డిప్యూటీ ఛైర్మన్ కూడా సభా వ్యవహారాలను నడపవచ్చని పేర్కొంది. న్యాయమూర్తుల విచారణ చట్టం-1968 ప్రకారం కేవలం స్పీకర్ లేదా ఛైర్మన్‌కు మాత్రమే తీర్మానాలను ఆమోదించే లేదా తిరస్కరించే అధికారం ఉంటుందని జస్టిస్ వర్మ తరఫు న్యాయవాదులు చేసిన వాదనను సుప్రీంకోర్టు తోసిపుచ్చింది.

అవినీతి ఆరోపణలు.. కాలిన నోట్ల కట్టల కలకలం

జస్టిస్ యశ్వంత్ వర్మపై వచ్చిన ఆరోపణలు తీవ్ర చర్చకు దారితీశాయి. గతేడాది మార్చి 14న న్యూఢిల్లీలోని ఆయన అధికారిక నివాసంలో సగం కాలిన కరెన్సీ నోట్ల కట్టలు లభించడంతో సంచలనం రేగింది. ఈ ఘటన అనంతరం ఆయనను ఢిల్లీ హైకోర్టు నుంచి అలహాబాద్ హైకోర్టుకు బదిలీ చేశారు. అప్పటి సుప్రీంకోర్టు ప్రధాన న్యాయమూర్తి జస్టిస్ సంజీవ్ ఖన్నా దీనిపై అంతర్గత విచారణకు ఆదేశించారు. ముగ్గురు సభ్యులతో కూడిన ఆ కమిటీ మే 4న నివేదిక సమర్పిస్తూ, జస్టిస్ వర్మ దుష్ప్రవర్తనకు పాల్పడినట్లు నిర్ధారించింది.

తొలగింపు తీర్మానం.. పార్లమెంటరీ కమిటీ ఏర్పాటు

అంతర్గత విచారణలో దోషిగా తేలినా జస్టిస్ వర్మ రాజీనామాకు నిరాకరించారు. దీంతో అప్పటి సిజెఐ ఆ నివేదికను రాష్ట్రపతి, ప్రధానమంత్రికి పంపడంతో ఆయన తొలగింపు (ఇంపీచ్‌మెంట్) ప్రక్రియకు రంగం సిద్ధమైంది. ఆగస్టు 12న లోక్‌సభ స్పీకర్ ఓం బిర్లా ఈ తొలగింపు తీర్మానాన్ని ఆమోదించి, విచారణ కోసం జస్టిస్ అరవింద్ కుమార్ (సుప్రీంకోర్టు న్యాయమూర్తి), జస్టిస్ మణీంద్ర మోహన్ శ్రీవాస్తవ (మద్రాస్ హైకోర్టు సిజె), సీనియర్ అడ్వకేట్ బి.వి. ఆచార్యలతో కూడిన ముగ్గురు సభ్యుల కమిటీని నియమించారు.

పిటిషన్ కొట్టివేతతో ముందుకు విచారణ

స్పీకర్ తీసుకున్న ఈ చర్యలు రాజ్యాంగ విరుద్ధమని, చట్టవిరుద్ధమని జస్టిస్ వర్మ వాదించారు. రాజ్యసభలో ఒకసారి తిరస్కరణకు గురైన తీర్మానాన్ని లోక్‌సభలో మళ్లీ ఎలా చేపడతారని ప్రశ్నించారు. అయితే లోక్‌సభ స్పీకర్ విచారణ కమిటీని ఏర్పాటు చేయకుండా ఎటువంటి అడ్డంకులు లేవని సుప్రీంకోర్టు స్పష్టం చేసింది. తాజా తీర్పుతో పార్లమెంటరీ విచారణ కమిటీ తన విచారణను కొనసాగించడానికి మార్గం సుగమమైంది.