నైజీరియాలో ఐసిస్ ఉగ్రవాదులపై అమెరికా మెరుపు దాడి

నైజీరియా వాయువ్య ప్రాంతంలో ఉన్న ఇస్లామిక్ స్టేట్ (ఐసిస్) ఉగ్రవాదులపై అమెరికా వైమానిక దాడులు చేపట్టింది. ఈ దాడులు నైజీరియా ప్రభుత్వ అభ్యర్థన మేరకే జరిగాయని అమెరికా అధ్యక్షుడు డొనాల్డ్ ట్రంప్, అలాగే అమెరికా సైన్యం ప్రకటించాయి. ఆ ప్రాంతంలో క్రైస్తవులపై ఉగ్రవాదులు దాడులు చేస్తూ హత్యలు చేస్తున్నారని అమెరికా తెలిపింది.

క్రిస్మస్ రోజున అమెరికా అధ్యక్షుడు డొనాల్డ్ ట్రంప్ తన 'ట్రూత్ సోషల్' ఖాతాలో స్పందిస్తూ, 'నైజీరియాలో బీభత్సం సృష్టిస్తున్న ఐసిస్ ఉగ్రవాదులే లక్ష్యంగా నా ఆదేశాల మేరకు అమెరికా సైన్యం మెరుపు దాడులు జరిపింది' అని ఆయన వెల్లడించారు. ఈ ఉగ్రవాదులు ముఖ్యంగా అమాయక క్రైస్తవులను కనికరం లేకుండా చంపుతున్నారని, గతంలో ఎన్నడూ లేనంత దారుణంగా అక్కడ హింస జరుగుతోందని ట్రంప్ ఆవేదన వ్యక్తం చేశారు. అందుకే క్రైస్తవుల రక్షణ కోసం ఈ కఠిన నిర్ణయం తీసుకోవాల్సి వచ్చిందని ఆయన స్పష్టం చేశారు.

అమెరికా ఆఫ్రికా కమాండ్ ప్రకారం, నైజీరియాలోని సోకోటో రాష్ట్రంలో ఈ దాడులు జరిగాయి. నైజీరియా భద్రతా బలగాలతో సమన్వయంతో చేపట్టిన ఈ ఆపరేషన్‌లో పలువురు ఐసిస్ ఉగ్రవాదులు మృతి చెందారని తెలిపింది. పెంటగాన్ విడుదల చేసిన వీడియోలో సముద్ర నౌక నుంచి క్షిపణులు ప్రయోగించిన దృశ్యాలు కనిపించాయి.

నైజీరియా విదేశాంగ శాఖ కూడా ఈ దాడులను ధ్రువీకరించింది. అమెరికాతో కొనసాగుతున్న భద్రతా సహకారం, గూఢచార సమాచారం పంచుకోవడం, వ్యూహాత్మక సమన్వయం ఫలితంగానే ఈ వైమానిక దాడులు జరిగాయని వెల్లడించింది. వాయువ్య నైజీరియాలో ఉగ్రవాద శిబిరాలను లక్ష్యంగా చేసుకుని కచ్చితమైన దాడులు జరిగాయని తెలిపింది. అమెరికా రక్షణ శాఖ మంత్రి పీట్ హెగ్‌సెత్ స్పందిస్తూ, "ఇది కేవలం ప్రారంభం మాత్రమే, ముందు ముందు మరిన్ని దాడులు ఉంటాయి" అని హెచ్చరించారు.

అయితే నైజీరియా ప్రభుత్వం మాత్రం మరో రకమైన వాదన వినిపిస్తోంది. ఉగ్రవాదులు కేవలం క్రైస్తవులనే కాదు, ముస్లింలను కూడా దారుణంగా హింసిస్తున్నారని స్పష్టం చేసింది. దీన్ని కేవలం మతపరమైన సమస్యగా చూడటం సరికాదని, తమ దేశంలో అందరికీ మత స్వేచ్ఛ ఉండేలా చూస్తున్నామని తెలిపింది. ఏది ఏమైనా ఉగ్రవాదులను పూర్తిగా అణచివేయడం ముఖ్యం కాబట్టి అమెరికా సహాయం తీసుకోవడానికి, ఆ దేశంతో కలిసి పనిచేయడానికి నైజీరియా అంగీకరించింది.

నైజీరియా దేశంలో ఉత్తర ప్రాంతంలో ముస్లింలు, దక్షిణ ప్రాంతంలో క్రైస్తవులు ఎక్కువగా ఉంటారు. అయితే ఆ దేశంలోని చాలా ప్రాంతాలు చాలా కాలంగా ఉగ్రవాదుల దాడులతో, గొడవలతో అల్లాడిపోతున్నాయి. ఒకవైపు అమెరికా ఉగ్రవాదులపై దాడులు చేస్తుంటే, మరోవైపు నైజీరియా ఈశాన్య ప్రాంతంలోని ఒక మసీదులో ఆత్మాహుతి దాడి జరిగింది. ఈ ఘటనలో ఐదుగురు ప్రాణాలు కోల్పోగా, 35 మంది తీవ్రంగా గాయపడ్డారు.

క్రిస్మస్ సందర్భంగా నైజీరియా అధ్యక్షుడు బోలా టినుబు శాంతి కోసం పిలుపునిచ్చారు. మత భేదాలు లేకుండా ప్రతి ఒక్కరి భద్రతను కాపాడటమే తమ ప్రభుత్వ లక్ష్యమని, క్రైస్తవులు, ముస్లింలు సహా అందరినీ హింస నుంచి రక్షిస్తామని ఆయన చెప్పారు. మొత్తంగా చూస్తే నైజీరియాలో పెరుగుతున్న ఉగ్రవాదాన్ని అణిచేందుకు అమెరికా-నైజీరియా కలిసి చేపట్టిన ఈ దాడులు అక్కడి భద్రతా పరిస్థితుల్లో కీలక మలుపుగా మారే అవకాశముందని అంతర్జాతీయ వర్గాలు భావిస్తున్నాయి.