నేషనల్ ఫోరెన్సిక్ సైన్సెస్ యూనివర్సిటీ ప్రవేశాలు ప్రారంభం

దేశంలో ఫోరెన్సిక్ సైన్స్ అధ్యయనాలకు అత్యంత ప్రతిష్ఠాత్మక సంస్థ అయిన నేషనల్ ఫోరెన్సిక్ సైన్సెస్ యూనివర్సిటీ (ఎన్ఎఫ్ఎస్‌యూ) 2025–26 విద్యా సంవత్సరానికి సంబంధించిన ప్రవేశ ప్రక్రియను అధికారికంగా ప్రారంభించింది. ఆసక్తిగల అభ్యర్థులు డిసెంబర్ 8వ తేదీ వరకు ఆన్‌లైన్‌లో దరఖాస్తు చేసుకోవచ్చు. ఈ రిజిస్ట్రేషన్ ప్రక్రియ యూనివర్సిటీ అధికారిక సమాచార పోర్టల్ ( https://www.nfsu.ac.in/admission ), రిజిస్ట్రేషన్ పోర్టల్ ( https://nfsuadm.samarth.edu.in ) ద్వారా పూర్తిగా ఆన్‌లైన్‌లో జరుగుతుంది. అభ్యర్థులు తమ పేరు, వ్యక్తిగత ఇమెయిల్ ఐడి, మొబైల్ నంబర్‌ను ఉపయోగించి రిజిస్ట్రేషన్ మొదలు పెట్టాలి. ఇక్కడ ఎంటర్ చేసే పేరు తప్పనిసరిగా 10వ తరగతి మార్క్‌షీట్‌లో ఉన్న పేరుతో సరిపోలాలి. ఓటీపీ ధృవీకరణ తర్వాత, అభ్యర్థులు తమ వ్యక్తిగత వివరాలు, చిరునామా, కేటగిరీ సమాచారంతో ప్రొఫైల్‌ను పూర్తి చేయాలి. ముఖ్యంగా కేటగిరీ వివరాలు భారత ప్రభుత్వం నోటిఫై చేసిన కేంద్ర జాబితాకు అనుగుణంగా ఉండాలని యూనివర్సిటీ స్పష్టం చేసింది.

తదుపరి దశలో, అభ్యర్థులు తమ అకడమిక్ వివరాలైన 10వ తరగతి, 12వ తరగతి, గ్రాడ్యుయేషన్ స్థాయిల మార్కులను నమోదు చేయాలి. గ్రాడ్యుయేషన్ ఫలితాల కోసం ఎదురుచూసేవారు అందుబాటులో ఉన్న మార్కుల ఆధారంగా సగటును ఎంటర్ చేయవచ్చు. దీంతో పాటు, తమ ఫోటో, సంతకం, పుట్టిన తేదీ సర్టిఫికెట్, కుల ధృవీకరణ పత్రాలతో సహా ఇతర తప్పనిసరి పత్రాలను నిర్దేశిత ఫార్మాట్లలో అప్‌లోడ్ చేయాల్సి ఉంటుంది. అన్ని వివరాలు సరి చూసుకున్న తర్వాత, డిక్లరేషన్‌ను అంగీకరించి, ప్రొఫైల్‌ను లాక్ చేయాలి. ఒకసారి లాక్ చేసిన తర్వాత, కేటగిరీతో సహా కొన్ని ముఖ్య వివరాలను మార్చడం సాధ్యం కాదు.

ప్రోగ్రామ్ ఎంపిక విషయానికి వస్తే, అభ్యర్థులు కోరుకున్న కోర్సును ఎంచుకున్న తరువాత, స్టడీ సెంటర్‌ను ఎంపిక చేసుకోవాలి. క్యాట్, జేఈఈ, గేట్, క్లాట్ వంటి జాతీయ స్థాయి పరీక్షల స్కోర్‌లు అవసరమయ్యే ప్రోగ్రామ్‌లకు, వాటి స్కోర్‌లను తప్పనిసరిగా ఎంటర్ చేయాలి. అదేవిధంగా, నేషనల్ ఫోరెన్సిక్ ఆప్టిట్యూడ్ టెస్ట్ 2025 అవసరమయ్యే ప్రోగ్రామ్‌ల కోసం, అభ్యర్థులు తమ ప్రాధాన్యత క్రమంలో మూడు పరీక్షా నగరాలను ఎంచుకోవాలి. దరఖాస్తు రుసుము అభ్యర్థి కేటగిరీ, ఎంచుకున్న క్యాంపస్‌ల సంఖ్యను బట్టి రూ.800 నుండి రూ.3,000 వరకు ఉంటుంది. ఫీజు చెల్లింపును “రాజోర్ పే” గేట్‌వే ద్వారా పూర్తి చేయాలి. చివరిగా విజయవంతమైన చెల్లింపు తర్వాత అప్లికేషన్ స్థితి “అప్లికేషన్ సబ్మిటెడ్”గా అప్‌డేట్ అవుతుంది. ఆ తర్వాత అభ్యర్థులు ఫారమ్‌ను డౌన్‌లోడ్ చేసుకోవచ్చు. తదుపరి సూచనలు, సవరణ విండోలు/పరిశీలనకు సంబంధించిన సందేశాల కోసం డాష్‌బోర్డ్‌ను క్రమం తప్పకుండా తనిఖీ చేయాలని యూనివర్సిటీ సూచించింది.