నేపాల్ నూతన ప్రధానిగా బాలేంద్ర షా!

హిమాలయ దేశం నేపాల్ రాజకీయ చరిత్రలో ఆదివారం ఒక అద్భుత ఘట్టం ఆవిష్కృతమైంది. దశాబ్దాలుగా దేశాన్ని ఏలుతున్న దిగ్గజ రాజకీయ పార్టీలను కాదని, నేపాల్ ప్రజలు సరికొత్త మార్పునకు పట్టం కట్టారు. ర్యాపర్ నుంచి రాజకీయ నాయకుడిగా మారిన 35 ఏళ్ల యువ సంచలనం బాలేంద్ర షా (బాలెన్) నేతృత్వంలోని రాష్ట్రీయ స్వతంత్ర పార్టీ (ఆర్ఎస్పీ) సార్వత్రిక ఎన్నికల్లో చారిత్రాత్మక విజయం దిశగా దూసుకెళ్తోంది. అవినీతిపై విసిగిపోయిన యువత (జెన్ జెడ్), మార్పు కోరుకున్న సామాన్యులు ఈ ఎన్నికల్లో పాత తరం నేతలను ఘోరంగా ఓడించి ఆర్ఎస్పీకి బ్రహ్మరథం పట్టారు.

దిగ్గజ నేత ఓలిపై భారీ మెజారిటీతో విజయం

ఈ ఎన్నికల్లో అందరి దృష్టిని ఆకర్షించిన ఝాపా-5 నియోజకవర్గంలో బాలెన్ అద్భుత విజయం సాధించారు. నాలుగు సార్లు ప్రధానిగా పనిచేసిన సీపీఎన్-యూఎంఎల్ అధినేత, 74 ఏళ్ల కేపీ శర్మ ఓలిని బాలెన్ సుమారు 50,000 ఓట్ల భారీ మెజారిటీతో ఓడించారు. బాలెన్‌కు 68,348 ఓట్లు రాగా, ఒలి కేవలం 18,734 ఓట్లకే పరిమితమయ్యారు. దీంతో నేపాల్ పార్లమెంటరీ చరిత్రలోనే అతి పిన్న వయస్కుడైన ప్రధానిగా, అలాగే తొలి మధేసీ ప్రధానిగా బాలెన్ రికార్డు సృష్టించబోతున్నారు.

క్లీన్ స్వీప్ దిశగా ఆర్ఎస్పీ

రవి లామిచానే 2022లో స్థాపించిన ఆర్ఎస్పీ, ఈ ఎన్నికల్లో సునామీని సృష్టించింది. మొత్తం 165 ప్రత్యక్ష స్థానాలకు గానూ, ఆదివారం ఉదయం 10 గంటల వరకు వెలువడిన ఫలితాల్లో ఆర్ఎస్పీ 107 సీట్లు గెలుచుకుంది. రాజధాని ఖాట్మండు లోయలోని మూడు జిల్లాల్లో ఉన్న మొత్తం 15 నియోజకవర్గాలను క్లీన్ స్వీప్ చేసి రికార్డు సృష్టించింది. మధేష్ ప్రావిన్స్‌లో కూడా 'అబ్ కీ బార్ బాలేంద్ర సర్కార్' నినాదంతో భారీగా సీట్లను సాధించింది.

మొత్తం 275 సీట్లున్న పార్లమెంటులో ఇప్పటివరకు గెలిచిన 10 మంది మహిళల్లో 9 మంది ఈ పార్టీ వారే కావడం విశేషం. కేవలం నేరుగా గెలిచిన సీట్లే కాకుండా, పార్టీలకు వేసే ఓట్ల (ప్రపోర్షనల్ ఓటింగ్)లో కూడా 13.7 లక్షల ఓట్లతో ఆర్ఎస్పీ అందరికంటే ముందుంది. ఈ విజయంతో యువనేత బాలేంద్ర షా నేపాల్ తదుపరి ప్రధాని అయ్యే అవకాశాలు స్పష్టంగా కనిపిస్తున్నాయి.

కుప్పకూలిన సంప్రదాయ పార్టీలు

గతేడాది సెప్టెంబర్‌లో నేపాల్ యువత చేపట్టిన భారీ నిరసనలు ఈ మార్పునకు పునాది వేశాయి. అవినీతి, బంధుప్రీతి, పాత తరం నాయకత్వంపై విసిగిపోయిన యువత బాలెన్ వెనుక నిలబడ్డారు. ఫలితంగా.. నేపాలీ కాంగ్రెస్ అధ్యక్షుడు గగన్ థాపా ధనుషా-4లో ఓటమి పాలయ్యారు. సీపీఎన్-యూఎంఎల్ జనరల్ సెక్రటరీ శంకర్ పోఖ్రేల్‌తో పాటు మరో పది మంది కీలక నేతలు ఓడిపోయారు. మాజీ స్పీకర్ దేవ్ రాజ్ ఘిమిరేను ఆర్ఎస్పీ అభ్యర్థి ఇందిరా రాణా మగర్ భారీ మెజారిటీతో ఓడించారు.

ప్రధాని మోడీ అభినందనలు

నేపాల్‌లో ప్రజాస్వామ్య ప్రక్రియ విజయవంతంగా సాగడంపై భారత ప్రధాని నరేంద్ర మోడీ సంతోషం వ్యక్తం చేశారు. "నేపాల్ సోదర సోదరీమణులు తమ ప్రజాస్వామ్య హక్కును ఇంత ఉత్సాహంగా వినియోగించుకోవడం చూస్తుంటే గర్వంగా ఉంది. నేపాల్ కొత్త ప్రభుత్వంతో కలిసి అభివృద్ధి పథంలో నడవడానికి భారత్ సిద్ధంగా ఉంది" అని ఆయన ఎక్స్ వేదికగా పేర్కొన్నారు. ఓటమిని అంగీకరించిన కేపీ శర్మ ఓలి కూడా బాలెన్‌కు అభినందనలు తెలుపుతూ, ఆయన ఐదేళ్ల పదవీకాలం విజయవంతం కావాలని ఆకాంక్షించారు.

సవాళ్లు - బాధ్యతలు

18 ఏళ్లలో 14 ప్రభుత్వాలను చూసిన నేపాల్‌కు ఒక స్థిరమైన ప్రభుత్వాన్ని అందించాల్సిన బాధ్యత ఇప్పుడు బాలెన్ భుజాలపై ఉంది. కేవలం రాజకీయ మార్పు మాత్రమే కాకుండా, అంతర్జాతీయంగా భారత్, చైనాలతో సంబంధాలను సమతుల్యం చేయడం, అవినీతి రహిత పాలన అందించడం బాలెన్ ముందున్న ప్రధాన సవాళ్లు.

బలేంద్ర షా: ర్యాపర్ నుంచి ప్రధాని అభ్యర్థి వరకు

నేపాల్ రాజకీయాల్లో ప్రస్తుతం మారుమోగుతున్న పేరు బలేంద్ర షా (బలెన్). సుమారు 35 ఏళ్ల వయసున్న ఈయన వృత్తిరీత్యా ఇంజనీర్ అయినప్పటికీ, సామాజిక సమస్యలపై పాటలు పాడే 'ర్యాపర్'గా యువతలో విపరీతమైన క్రేజ్ సంపాదించుకున్నారు. 2022లో ఏ పార్టీ మద్దతు లేకుండా స్వతంత్ర అభ్యర్థిగా ఖాట్మండు మేయర్‌గా గెలిచి అందరినీ ఆశ్చర్యపరిచారు. మేయర్‌గా అక్రమ కట్టడాలను కూల్చివేయడం, నగరాన్ని శుభ్రం చేయడంలో ఆయన చూపిన వేగం ప్రజలకు బాగా నచ్చింది. దశాబ్దాలుగా పాత పార్టీల అవినీతి, కుటుంబ రాజకీయాలతో విసిగిపోయిన నేపాల్ ప్రజలు, ముఖ్యంగా యువత (జెన్ జీ), ఈయనను తమ ఆశాకిరణంగా భావిస్తున్నారు. తనదైన శైలిలో అవినీతిపై పోరాడుతూ, సోషల్ మీడియా ద్వారా ప్రజలకు చేరువైన బలెన్, ఇప్పుడు రాష్ట్రీయ స్వతంత్ర పార్టీ తరఫున ప్రధాని అభ్యర్థిగా నిలబడి దేశ రాజకీయాల్లోనే సరికొత్త చరిత్రను సృష్టిస్తున్నారు.