నేడు భారత్కు జర్మన్ ఛాన్సలర్ ఫ్రెడ్రిక్ మెర్జ్
అంతర్జాతీయ భౌగోళిక రాజకీయాల్లో అనిశ్చితి నెలకొన్న తరుణంలో భారత ప్రధాని నరేంద్ర మోడీ, జర్మనీ ఛాన్సలర్ ఫ్రెడ్రిక్ మెర్జ్ మధ్య సోమవారం అహ్మదాబాద్లో కీలక చర్చలు జరగనున్నాయి. జర్మనీ ఛాన్సలర్గా బాధ్యతలు చేపట్టిన తర్వాత ఫ్రెడ్రిక్ మెర్జ్ ఆసియాలో జరుపుతున్న తొలి పర్యటన ఇదే కావడం విశేషం. ఈ రెండు రోజుల (జనవరి 12, 13) పర్యటనలో భాగంగా వాణిజ్యం, పెట్టుబడులు, అత్యాధునిక సాంకేతిక పరిజ్ఞానం, రక్షణ రంగాల్లో ద్వైపాక్షిక సంబంధాలను పటిష్టం చేసుకోవడమే లక్ష్యంగా ఇరు నేతలు చర్చలు జరపనున్నారు.
రక్షణ రంగంలో భారీ ఒప్పందం!
ఈ పర్యటనలో అందరి దృష్టి భారత నావికాదళం కోసం ఆరు అత్యాధునిక 'స్టెల్త్' జలాంతర్గాముల సరఫరాపై కుదరబోయే అంతర్-ప్రభుత్వ ఒప్పందంపైనే ఉంది. సుమారు 5 బిలియన్ యూరోల (దాదాపు రూ.45,000 కోట్లు) విలువైన ఈ ప్రాజెక్టు కోసం జర్మనీకి చెందిన 'థైసెన్క్రుప్ మెరైన్ సిస్టమ్స్', భారత్కు చెందిన 'మజగావ్ డాక్ షిప్బిల్డర్స్' ఇప్పటికే చర్చలు జరుపుతున్నాయి. ఇది కార్యరూపం దాల్చితే ఇటీవలి కాలంలో 'మేక్ ఇన్ ఇండియా'లో భాగంగా జరగనున్న అతిపెద్ద రక్షణ ప్రాజెక్టులలో ఒకటిగా నిలుస్తుంది.
యూరప్తో ఆర్థిక బంధం
భారత వస్తువులపై అమెరికా 50 శాతం సుంకాలను విధిస్తున్న నేపథ్యంలో యూరప్తో ఆర్థిక సంబంధాలను మరింత బలోపేతం చేసుకోవాలని భారత్ భావిస్తోంది. ఈ క్రమంలో యూరోపియన్ యూనియన్లో భారత్కు జర్మనీ అతిపెద్ద వాణిజ్య భాగస్వామిగా ఉంది. 2024-25 ఆర్థిక సంవత్సరంలో ఇరు దేశాల మధ్య సరకులు, సేవల వాణిజ్యం రికార్డు స్థాయిలో 51.23 బిలియన్ డాలర్లకు చేరుకుంది. భారత్-ఈయూ దేశాల మధ్య జరిగే మొత్తం వాణిజ్యంలో పావు వంతు వాణిజ్యం ఒక్క జర్మనీతోనే జరుగుతుండటం గమనార్హం.
సబర్మతీ ఆశ్రమం సందర్శన
ప్రధాని మోడీతో చర్చల అనంతరం ఛాన్సలర్ మెర్జ్ చారిత్రక సబర్మతీ ఆశ్రమాన్ని సందర్శించనున్నారు. అహ్మదాబాద్లో జరుగుతున్న అంతర్జాతీయ గాలిపటాల పండుగలో ఆయన పాల్గొంటారు. అనంతరం నైపుణ్యాభివృద్ధికి సంబంధించిన కార్యక్రమంలో భాగస్వామ్యం పంచుకోనున్నారు. గుజరాత్ పర్యటన ముగించుకుని ఆయన బెంగళూరుకు బయలుదేరుతారు.
ఉక్రెయిన్ సంక్షోభంపై చర్చ
వెనిజులాలో అమెరికా సైనిక చర్యలు, ఉక్రెయిన్-రష్యా యుద్ధం వంటి సంక్లిష్ట పరిస్థితులపై ఇరు నేతలు అభిప్రాయాలను పంచుకోనున్నారు. ఉక్రెయిన్లో శాంతిని నెలకొల్పే మార్గాలపై మోడీ-మెర్జ్ మధ్య చర్చలు జరిగే అవకాశం ఉంది. అలాగే ఇండో-పసిఫిక్ రీజియన్లో రక్షణ సహకారం కోసం జర్మనీ నేవీకి చెందిన ఒక లైజన్ ఆఫీసర్ను భారత్ లోని 'ఇంటిగ్రేటెడ్ ఫ్యూజన్ సెంటర్' లో నియమించాలని జర్మనీ నిర్ణయించింది.
భవిష్యత్ కార్యాచరణ
భారత్-జర్మనీ మధ్య వ్యూహాత్మక భాగస్వామ్యం ఏర్పడి గతేడాదితో 25 ఏళ్లు పూర్తయ్యాయి. గ్రీన్ హైడ్రోజన్ ఉత్పత్తి, ఎగుమతుల కోసం ఇప్పటికే ఇరు దేశాలు ఒక రోడ్మ్యాప్ను రూపొందించుకున్నాయి. మెర్జ్ పర్యటన ముగిసిన కొద్ది రోజులకే యూరోపియన్ యూనియన్ అగ్రనేతలు భారత్కు రానున్నారు. ఆ పర్యటనలో భారత్-ఈయూ స్వేచ్ఛా వాణిజ్య ఒప్పందంపై తుది ప్రకటన వచ్చే అవకాశం ఉంది. వచ్చే నెలలో ఏఐ సదస్సు కోసం ఫ్రాన్స్ అధ్యక్షుడు ఇమ్మాన్యుయేల్ మాక్రాన్ కూడా భారత్కు రానున్నారు.