నేడు గిల్కు ఫిట్నెస్ టెస్ట్.. రెండో టెస్ట్ ఆడేది డౌటే!
దక్షిణాఫ్రికాతో శనివారం నుంచి ప్రారంభం కానున్న రెండో, చివరి టెస్ట్ మ్యాచ్కు భారత కెప్టెన్ శుభ్మన్ గిల్ అందుబాటుపై ఇంకా సందిగ్ధత కొనసాగుతోంది. తొలి టెస్టులో మెడ పట్టేయడంతో బాధపడుతున్న గిల్, నేడు ఫిట్నెస్ పరీక్షకు హాజరుకానున్నారు. అయితే గిల్ ఈ కీలక మ్యాచ్లో ఆడటం చాలా కష్టం అని జట్టు బ్యాటింగ్ కోచ్ సితాంశు కోటక్ అన్నారు.
తొలి టెస్టు రెండో రోజున గిల్కు మెడ నొప్పి మొదలైంది, అప్పటి నుంచి అతడు నెట్స్ ప్రాక్టీస్కు రాలేదు. ఈరోజు సాయంత్రం ఫిజియోలు, వైద్యులు ఆయన ఫిట్ నెస్ పై తుది నిర్ణయం తీసుకుంటారు. "గిల్ బాగానే కోలుకుంటున్నప్పటికీ, అతడు పూర్తిగా కోలుకున్నా కూడా, మ్యాచ్ సమయంలో ఆ నొప్పి తిరిగి వచ్చే అవకాశం ఉందా లేదా అనేది వైద్యులు నిర్ణయించాలి. ఆ అనుమానం ఉంటే, జట్టు ప్రయోజనాల కోసం అతడు ఒక మ్యాచ్ విశ్రాంతి తీసుకోవడమే మంచిది" అని కోటక్ స్పష్టం చేశారు. "శుభ్మన్ లాంటి ఆటగాడు, పైగా అతడు కెప్టెన్ కాబట్టి, ఏ జట్టు అయినా అతడిని కోల్పోవడం లోటే" అని కోటక్ అభిప్రాయపడ్డారు.
గిల్ ఆడకపోయినా, అతడి స్థానాన్ని భర్తీ చేయడానికి జట్టులో సమర్థులైన ఆటగాళ్లు ఉన్నారని కోచ్ విశ్వాసాన్ని వ్యక్తం చేశారు. తొలి టెస్టు రెండో ఇన్నింగ్స్లో నాలుగో స్థానంలో బ్యాటింగ్ చేసిన ధ్రువ్ జురెల్ ఒక ప్రత్యామ్నాయంగా ఉన్నాడు. అయితే, గిల్ ఫిట్నెస్ తేలాకనే, పిచ్ను పరిశీలించాకనే, జట్టులో అత్యుత్తమ ఆటగాళ్ల కలయిక గురించి చర్చిస్తామని కోటక్ తెలిపారు. తొలి టెస్టులో గిల్ రెండు ఇన్నింగ్స్లలో బ్యాటింగ్ చేయకపోవడం వల్లే కీలకమైన తొలి ఇన్నింగ్స్లో భారత్ పెద్ద ఆధిక్యం సాధించలేకపోయిందని కోచ్ గుర్తు చేశారు.
వన్డే సిరీస్కూ విశ్రాంతి?
శుభ్మన్ గిల్ పూర్తిగా కోలుకోవడానికి దాదాపు పది రోజుల సమయం పట్టే అవకాశం ఉన్నందున, ఒకవేళ అతడు టెస్టు మ్యాచ్కి దూరమైతే, నవంబర్ 30 నుంచి రాంచీలో ప్రారంభం కానున్న దక్షిణాఫ్రికాతో జరిగే మూడు వన్డేల సిరీస్ నుంచి కూడా అతడికి విశ్రాంతి ఇవ్వాలని సెలెక్టర్లు భావిస్తున్నట్లు సమాచారం.