నేడు ఆస్ట్రేలియాతో భారత్ కీలక పోరు

ఐసీసీ మహిళల వన్డే ప్రపంచ కప్ 2025లో భాగంగా నేడు విశాఖపట్నం వేదికగా భారత మహిళల జట్టు, డిఫెండింగ్ ఛాంపియన్ ఆస్ట్రేలియా మహిళల జట్టుతో తలపడనుంది. దక్షిణాఫ్రికా చేతిలో ఓటమి పాలైన భారత్‌కు ఇది చాలా కీలకమైన మ్యాచ్. ఆసీస్‌ను ఓడించి టోర్నీలో తమ పట్టు నిలుపుకోవాలని భారత్ పట్టుదలగా ఉంది.

భారత మహిళల జట్టు, ఆస్ట్రేలియా మహిళల జట్టు వన్డే ప్రపంచకప్ టోర్నమెంట్‌లలో ఇప్పటివరకు 13 సార్లు తలపడ్డాయి. ఆడిన మొత్తం 13 మ్యాచ్‌ల్లో ఆస్ట్రేలియా జట్టు 10, భారత జట్టు 3 మ్యాచ్‌ల్లో గెలిచింది. వన్డే క్రికెట్‌లో ఆస్ట్రేలియా అజేయమైన రికార్డును కలిగి ఉన్నప్పటికీ, ప్రపంచకప్‌లలో భారత్ కొన్ని ముఖ్యమైన విజయాలను నమోదు చేసింది. అయినప్పటికీ, మొత్తం రికార్డులో ఆస్ట్రేలియా స్పష్టమైన ఆధిపత్యాన్ని ప్రదర్శించింది.

భారత మహిళల జట్టు

గత మ్యాచ్‌లలో మంధాన అనుకున్నంత స్థాయిలో రాణించలేదు అయితే ఆమెకు ఆస్ట్రేలియాపై మంచి ట్రాక్ రికార్డు ఉంది. ఆసీస్‌పై ఆమె వన్డేలలో నాలుగు సెంచరీలు సహా 916 పరుగులు చేసింది. మంధాన తిరిగి ఫామ్‌లోకి వస్తే జట్టుకు భారీ ఆధిక్యం లభిస్తుంది. దీప్తి శర్మ బ్యాటింగ్, ఆఫ్-స్పిన్ బౌలింగ్‌తో జట్టుకు వెన్నెముకగా ఉంది. ఒత్తిడిలో పరుగులు చేయడం, కీలక వికెట్లు తీయడం ఆమె బలం. కెప్టెన్ హర్మన్‌ప్రీత్ కౌర్ అనుభవం, ఒత్తిడిలో వేగంగా పరుగులు చేసే సామర్థ్యం భారత మిడిల్ ఆర్డర్‌కు బలం. ఆమె ఆస్ట్రేలియాపై గతంలో అద్భుతమైన ఇన్నింగ్స్‌లు ఆడింది. స్వదేశీ పిచ్‌లపై దీప్తి శర్మ, స్నేహ్ రాణా, శ్రీ చరణి వంటి స్పిన్నర్లతో కూడిన బౌలింగ్ విభాగం బలంగా ఉంది.

ఇక బలహీనతల విషయానికి వస్తే, ఈ ప్రపంచ కప్‌లో భారత టాప్ ఆర్డర్ బ్యాటర్లు స్థిరంగా రాణించడంలో విఫలమయ్యారు. మంధాన, హర్లీన్ డియోల్, జెమీమా రోడ్రిగ్స్ నుండి మరింత మెరుగైన ప్రదర్శన అవసరం. గత మ్యాచ్‌లో ఆరో బౌలర్ లేకపోవడం జట్టుకు పెద్ద లోటుగా మారింది. ఆఖరి ఓవర్లలో పేసర్లు భారీగా పరుగులు ఇవ్వడం జట్టును ఇబ్బంది పెట్టింది. భారత పేస్ అటాక్ రెణుకా సింగ్ ఠాకూర్ పవర్ ప్లేలో వికెట్లు తీస్తే మ్యాచ్‌ను మలుపు తిప్పవచ్చు.

ఆస్ట్రేలియా మహిళల జట్టు

ఆస్ట్రేలియా బ్యాటింగ్ ఎంతో బలంగా ఉంది. అలిస్సా హీలీ (కెప్టెన్), బేత్ మూనీ, ఫోబ్ లిచ్‌ఫీల్డ్, ఎల్లీస్ పెర్రీ, తహ్లియా మెక్‌గ్రాత్ వంటి స్టార్ బ్యాటర్లు ఉన్నారు. వారిలో ఎవరైనా ఒకరు నిలబడినా భారీ స్కోరు సాధిస్తారు. ఆష్లీ గార్డ్‌నర్, ఎల్లీస్ పెర్రీ, అనాబెల్ సదర్లాండ్ వంటి అద్భుతమైన ఆల్‌రౌండర్లు జట్టుకు బలం. వీరు బ్యాటింగ్, బౌలింగ్‌లో కీలక సమయంలో మ్యాచ్‌ను మలుపు తిప్పగలరు. మేగన్ షూట్ (పేస్), అలానా కింగ్ (లెగ్ స్పిన్), సోఫీ మోలినెక్స్ (లెఫ్ట్-ఆర్మ్ స్పిన్) వంటివారు ఏ పిచ్‌పై అయినా వికెట్లు తీయగల సామర్థ్యం కలిగి ఉన్నారు. ఎంతటి ఒత్తిడిలోనైనా నిలబడే సామర్థ్యం ఆస్ట్రేలియాకు అతిపెద్ద బలం.

ఇక బలహీనతల విషయానికి వస్తే, ప్రపంచ క్రికెట్‌లో ఆస్ట్రేలియా జట్టుకు పెద్దగా బలహీనతలు లేవు. వారికి వ్యతిరేకంగా ఆడే జట్లు సరైన వ్యూహంతో, స్థిరమైన ప్రదర్శనతోనే గెలవగలవు. భారత పిచ్‌లపై స్పిన్నర్లను ఎదుర్కోవడంలో కొందరు ఆసీస్ బ్యాటర్లు ఇబ్బంది పడవచ్చు. కానీ వారిలో చాలామంది స్పిన్‌ను సమర్థవంతంగా ఆడగలరు.

పిచ్, వాతావరణం

విశాఖపట్నం పిచ్ సాధారణంగా బ్యాటింగ్‌కు అనుకూలంగా ఉంటుంది. అయితే, ఇది స్పిన్నర్లకు కూడా కొంత మేర అనుకూలంగా ఉంటుంది. మ్యాచ్ పురోగమిస్తున్న కొద్దీ బంతి బ్యాట్‌పైకి బాగా వస్తుంది, కాబట్టి టాప్ ఆర్డర్ బ్యాటర్లు ఇక్కడ పరుగులు రాబట్టడానికి అవకాశం ఉంటుంది. దక్షిణాఫ్రికాతో జరిగిన గత మ్యాచ్‌లో పేసర్ల కంటే స్పిన్నర్లే కొంత ప్రభావం చూపారు. మధ్యాహ్నం వేళల్లో మ్యాచ్ మొదలవుతుంది కాబట్టి ఎండ, తేమ కారణంగా టాస్ గెలిచిన జట్టు ముందుగా బ్యాటింగ్ ఎంచుకోవడానికి మొగ్గు చూపొచ్చు, ఆ తర్వాత పిచ్ నెమ్మదిస్తుందని అంచనా.

మ్యాచ్ రోజున వాతావరణం ఎక్కువగా ఎండతో కూడి ఉంటుంది. గరిష్ట ఉష్ణోగ్రత సుమారు 32 డిగ్రీల వరకు ఉండవచ్చు. గాలిలో తేమ ఎక్కువగా ఉంటుంది. ఇది ఆటగాళ్లకు ఇబ్బంది కలిగించవచ్చు. వర్షం పడే అవకాశం చాలా తక్కువ. కాబట్టి మ్యాచ్‌కు అంతరాయం కలగకపోవచ్చు.

ఎవరు గెలవొచ్చు?

ఈ రెండు జట్ల మధ్య మ్యాచ్ ఎప్పుడూ ఆసక్తికరంగా ఉంటుంది. కానీ, బలాల పరంగా చూస్తే, ఆస్ట్రేలియా మహిళల జట్టు స్పష్టంగా మెరుగ్గా కనిపిస్తుంది. వారి బ్యాటింగ్, బౌలింగ్ లోతు, ముఖ్యంగా నాణ్యమైన ఆల్‌రౌండర్లు ఉండటం వారికి పెద్ద సానుకూలంశం.

భారత జట్టు గెలవాలంటే టాప్ ఆర్డర్ రాణించాలి. స్మృతి మంధాన, హర్మన్‌ప్రీత్ కౌర్, జెమీమా రోడ్రిగ్స్ తప్పనిసరిగా భారీ స్కోర్లు చేయాలి. గత మ్యాచ్‌లో చేసిన తప్పును సరిదిద్దుకుని, ఆరో బౌలింగ్ అస్త్రాన్ని (రాధా యాదవ్ లేదా అరుంధతి రెడ్డి) జట్టులోకి తీసుకోవాలి. బౌలింగ్, బ్యాటింగ్‌లో దీప్తి శర్మ అద్భుత ప్రదర్శన చేయాలి. భారత్ తమ బలహీనతలను అధిగమించి, వ్యూహాత్మకంగా ఆడితేనే ఈ మ్యాచ్ లో ఆస్ట్రేలియాను ఓడించడం సాధ్యమవుతుంది. . ఏదేమైనా ఈ కీలక మ్యాచ్‌లో భారత జట్టు తమ ప్రణాళికలను సరిగ్గా అమలు చేస్తుందా లేక ఆస్ట్రేలియా తమ ఆధిపత్యాన్ని కొనసాగిస్తుందా అనేది చూడాలి మరి.

భారత జట్టు: హర్మన్‌ప్రీత్ కౌర్ (కెప్టెన్), స్మృతి మంధాన (వైస్-కెప్టెన్), ప్రతికా రావల్, హర్లీన్ డియోల్, జెమీమా రోడ్రిగ్స్, రిచా ఘోష్, ఉమా చెత్రి, రేణుకా సింగ్ ఠాకూర్, దీప్తి శర్మ, స్నేహ్ రాణా, శ్రీ చరణి, రాధా యాదవ్, అమన్‌జోత్ కౌర్, అరుంధతి రెడ్డి, క్రాంతి గౌడ్.

ఆస్ట్రేలియా జట్టు: అలిస్సా హీలీ (కెప్టెన్), డార్సీ బ్రౌన్, ఆష్ గార్డ్‌నర్, కిమ్ గార్త్, హీథర్ గ్రాహం, అలానా కింగ్, ఫోబ్ లిచ్‌ఫీల్డ్, తహ్లియా మెక్‌గ్రాత్, సోఫీ మోలినెక్స్, బేత్ మూనీ, ఎల్లీస్ పెర్రీ, మేగన్ షూట్, అన్నబెల్ సదర్లాండ్, జార్జియా వోల్, జార్జియా వేర్‌హామ్.