నేటి నుంచి ఐపీఎల్ మహా సంగ్రామం
క్రికెట్ ప్రేమికులు ఎప్పుడెప్పుడా అని ఎదురుచూస్తున్న ఇండియన్ ప్రీమియర్ లీగ్ (ఐపీఎల్) 19వ సీజన్ నేటి నుంచి అట్టహాసంగా ప్రారంభం కానుంది. చిన్నస్వామి స్టేడియం వేదికగా రాత్రి జరిగే తొలి మ్యాచ్లో డిఫెండింగ్ ఛాంపియన్ రాయల్ ఛాలెంజర్స్ బెంగళూరు (ఆర్సీబీ), సన్రైజర్స్ హైదరాబాద్తో తలపడనుంది. రెండు నెలల పాటు సాగే ఈ క్రికెట్ జాతరలో పది జట్లు టైటిల్ పోరులో పోటీ పడనున్నాయి. అయితే ఈసారి సంబరాలు కాస్త భావోద్వేగాల మధ్య మొదలవుతున్నాయి.
11 మంది అభిమానులకు మౌన నివాళి
గతేడాది ఆర్సీబీ విజయోత్సవాల్లో జరిగిన తొక్కిసలాటలో ప్రాణాలు కోల్పోయిన 11 మంది అభిమానుల జ్ఞాపకార్థం కర్ణాటక క్రికెట్ అసోసియేషన్ ఒక కీలక నిర్ణయం తీసుకుంది. స్టేడియంలో 11 సీట్లను శాశ్వతంగా ఖాళీగా ఉంచి వారి పట్ల గౌరవాన్ని చాటనుంది. నేడు జరిగే మ్యాచ్లో ఆర్సీబీ ఆటగాళ్లు కూడా చనిపోయిన వారి గుర్తుగా ప్రత్యేక జెర్సీలతో నివాళులర్పించనున్నారు. ఎన్నో నెలల అనిశ్చితి తర్వాత, ప్రభుత్వ అనుమతులతో స్టేడియం నేడు ఐపీఎల్ పోరుకు సిద్ధమైంది.
బౌలింగ్ కష్టాల్లో ఆర్సీబీ, సన్రైజర్స్
మైదానంలో పోరు విషయానికి వస్తే రెండు జట్లూ బౌలింగ్ విభాగంలో ఇబ్బందులు పడుతున్నాయి. ఆర్సీబీకి కీలక బౌలర్లు జోష్ హాజిల్వుడ్, యశ్ దయాల్ దూరం కావడంతో భువనేశ్వర్ కుమార్, కృనాల్ పాండ్యాలపైనే భారం పడనుంది. అటు సన్రైజర్స్ కూడా కెప్టెన్ పాట్ కమిన్స్ అందుబాటులో లేకపోవడంతో ఇషాన్ కిషన్కు సారథ్య బాధ్యతలు అప్పగించింది. హర్షల్ పటేల్, జయదేవ్ ఉనద్కత్ వంటి బౌలర్లు చిన్నస్వామి వంటి బ్యాటింగ్ పిచ్పై ఏ మేరకు రాణిస్తారనేది ఆసక్తికరంగా మారింది. బ్యాటింగ్లో మాత్రం కోహ్లీ, పాటిదార్, క్లాసెన్, హెడ్ వంటి స్టార్లతో రెండు జట్లు బలంగా ఉన్నాయి.
పాత వైభవం కోసం దిగ్గజ జట్ల వేట
ఐపీఎల్లో కలిపి 13 టైటిళ్లు గెలిచిన ముంబై ఇండియన్స్, చెన్నై సూపర్ కింగ్స్, కోల్కతా నైట్ రైడర్స్ గత సీజన్లో ఆశించిన స్థాయిలో రాణించలేకపోయాయి. ఈసారి ఎలాగైనా పాత ఫామ్ను అందుకోవాలని ఈ జట్లు పట్టుదలతో ఉన్నాయి. రాజస్థాన్ నుంచి సంజు శాంసన్ను తెచ్చుకున్న చెన్నై.. తన చివరి సీజన్ ఆడుతున్నాడనే ప్రచారం ఉన్న ధోనీ మార్గదర్శకత్వంలో అద్భుతం చేయాలని చూస్తోంది. అటు ముంబై జట్టు హార్దిక్ పాండ్య సారథ్యంలో, రోహిత్ శర్మ మెరుపులతో ఆరో టైటిల్ కోసం సిద్ధమైంది. ఇక కోల్కతా జట్టు రికార్డు ధరకు కొన్న కామెరాన్ గ్రీన్, ఫినిషర్ రింకూ సింగ్లపైనే భారీగా ఆశలు పెట్టుకుంది.
స్టార్ల సందడి.. యువతే లక్ష్యం
ఈ సీజన్లో విరాట్ కోహ్లీ, రోహిత్ శర్మల ప్రదర్శనపై అందరి కళ్లు నెలకొన్నాయి. గతేడాది టైటిల్ నెగ్గి తన చిరకాల కోరిక తీర్చుకున్న కోహ్లీ.. అదే జోరును నేటి నుంచి కొనసాగిస్తారా అని అభిమానులు ఎదురుచూస్తున్నారు. మరోవైపు, రోహిత్ శర్మ ఈసారి అత్యంత ఫిట్గా కనిపిస్తూ ఆరో టైటిల్ కోసం తహతహలాడుతున్నారు. వీరిద్దరితో పాటు ఆకిబ్ నబీ (ఢిల్లీ), కార్తీక్ శర్మ (రాజస్థాన్), ప్రశాంత్ వీర్ (చెన్నై) వంటి యువ ఆటగాళ్లు తమ ప్రతిభను చాటుకుని సెలక్టర్ల దృష్టిలో పడాలని ఆశిస్తున్నారు. నేటి నుంచి మొదలయ్యే ఈ 65 రోజుల మహా సంగ్రామం ఎవరిని విజేతగా నిలుపుతుందో చూడాలి.