నెల్లూరు జిల్లాలో పోలీసు కస్టడీ మృతి ఆరోపణలు.. సమగ్ర విచారణకు ఎస్పీ ఆదేశాలు

ఆంధ్రప్రదేశ్‌లోని గాదె సాయికృష్ణ లాకప్‌ డెత్‌ కేసు మరవకముందే మరో ఘటన.. నెల్లూరు జిల్లాలో దొంగతనం, గొలుసు దొంగతనం (చైన్ స్నాచింగ్) కేసులో పోలీసులు అదుపులోకి తీసుకున్న ఓ వ్యక్తి మృతి చెందడం స్థానికంగా తీవ్ర కలకలం రేపింది. అయితే, బాధితుడి మృతిపై వస్తున్న పోలీసు కస్టడీ డెత్ ఆరోపణలను జిల్లా ఉన్నతాధికారులు తోసిపుచ్చారు. ఈ ఘటనపై సమగ్ర విచారణకు ఆదేశించినట్లు బుధవారం నిర్వహించిన విలేకరుల సమావేశంలో నెల్లూరు జిల్లా ఎస్పీ అజిత వేజెండ్ల వెల్లడించారు.

మృతుడిని నెల్లూరు జిల్లా చెరుకుముడి గ్రామానికి చెందిన ఏడుకొండలుగా గుర్తించారు. జూలై 8న నమోదైన ఒక దొంగతనం కేసు దర్యాప్తులో భాగంగా పోలీసులు అదుపులోకి తీసుకున్న ముగ్గురు నిందితులలో ఈయన ఒకరు. మంగళవారం (జూలై 14న) పోలీసులు ఏడుకొండలను గూడూరు ప్రభుత్వ ఆసుపత్రికి తరలించగా, అతడు అప్పటికే మరణించినట్లు వైద్యులు ప్రకటించారు. దీంతో కుటుంబ సభ్యులు, బంధువులు పోలీసుల వేధింపుల కారణంగానే అతడు మరణించాడని ఆరోపించారు.

కస్టడీ మరణం కాదు: ఎస్పీ వెల్లడి

ఈ కేసుపై ఎస్పీ అజిత వేజెండ్ల మాట్లాడుతూ, కస్టడీలో హింసించడం వల్లే ఏడుకొండలు మృతి చెందాడనే ఆరోపణల్లో నిజం లేదని స్పష్టం చేశారు. ఈ కేసులో రియాజ్, ఏడుకొండలు, ప్రసాద్ అనే ముగ్గురు అనుమానితులను అదుపులోకి తీసుకున్నట్లు ఎస్పీ తెలిపారు. దర్యాప్తు అనంతరం వారికి బీఎన్‌ఎస్‌ఎస్ సెక్షన్ 35 కింద నోటీసులు ఇచ్చి, జూలై 12వ తేదీనే మనుబోలు పోలీస్ స్టేషన్ నుంచి విడుదల చేశామన్నారు. జూలై 12 రాత్రి ఈ ముగ్గురూ జాతీయ రహదారి-16 పై నడుచుకుంటూ వెళ్తున్నట్లు సీసీటీవీ దృశ్యాలలో నమోదైందని ఎస్పీ వివరించారు. అంతేకాకుండా జూలై 13 తెల్లవారుజామున పొదలకూరులోని ఒక మద్యం దుకాణం వద్ద ఏడుకొండలు సంచరించినట్లు స్పష్టమైన ఆధారాలు ఉన్నాయన్నారు. పోలీస్ స్టేషన్ లోపలి సీసీటీవీ ఫుటేజీని కూడా ఉన్నతాధికారులు పరిశీలించారని, మరణించడానికి ముందు రెండు రోజుల పాటు అతను పోలీస్ స్టేషన్‌లో లేడని ఈ ఆధారాల ద్వారా రుజువైందని ఎస్పీ పేర్కొన్నారు.

పోస్ట్‌మార్టం తర్వాతే స్పష్టత

ప్రస్తుతం గూడూరు ప్రభుత్వ ఆసుపత్రిలో మృతదేహానికి పోస్ట్‌మార్టం నిర్వహిస్తున్నట్లు ఎస్పీ తెలిపారు. బాధితుడి మృతికి గల ఖచ్చితమైన కారణాలు (అది వేధింపులా, ఆత్మహత్యకు ప్రేరేపించడమా లేక ఇతర కారణాలా అనేది) వైద్య నివేదిక, సమగ్ర విచారణ తర్వాతే తెలుస్తుందని స్పష్టం చేశారు. మృతుడి కుటుంబ సభ్యులు చేసిన అన్ని ఆరోపణలను పరిగణనలోకి తీసుకుని, అత్యంత పారదర్శకంగా విచారణ జరుపుతామని హామీ ఇచ్చారు.

పోలీసుల నిర్లక్ష్యంపై చర్యలు

ఈ కేసును హ్యాండిల్ చేయడంలో క్షేత్రస్థాయి పోలీసుల వైఫల్యం, నిర్లక్ష్యం ఉన్నట్లు ఎస్పీ అంగీకరించారు. నిందితుల విడుదల, తదుపరి పరిణామాలను ఉన్నతాధికారుల దృష్టికి సకాలంలో తీసుకెళ్లనందుకు మనుబోలు పోలీస్ స్టేషన్ సిబ్బందిపై క్రమశిక్షణా చర్యలు ప్రారంభించినట్లు తెలిపారు. వ్యవస్థ వైఫల్యం చెందకూడదనే ఉద్దేశంతోనే శాఖాపరమైన విచారణకు ఆదేశించామని పేర్కొన్నారు. కాగా, ఈ నిందితుల నుంచి దర్యాప్తు సమయంలో దొంగిలించబడిన 20కి పైగా వ్యవసాయ మోటార్లను పోలీసులు స్వాధీనం చేసుకున్నట్లు సమాచారం.