నీరజ్ చోప్రా–జెఎస్డబ్ల్యూ స్పోర్ట్స్కు గుడ్బై
భారత అథ్లెటిక్స్ చరిత్రలో సువర్ణ అధ్యాయం లిఖించిన జావెలిన్ త్రోయర్ నీరజ్ చోప్రా తన కెరీర్లో మరో కీలక మలుపు తిరిగారు. గత పదేళ్లుగా తనను ప్రోత్సహిస్తూ వచ్చిన జెఎస్డబ్ల్యూ స్పోర్ట్స్తో భాగస్వామ్యాన్ని ముగిస్తూ, సొంత అథ్లెట్ మేనేజ్మెంట్ సంస్థ ‘వెల్ స్పోర్ట్స్’ను ప్రారంభించినట్లు ఆయన ప్రకటించారు.
2016 నుంచి జెఎస్డబ్ల్యూ స్పోర్ట్స్తో అనుబంధం కలిగిన నీరజ్ చోప్రా, ఆ ప్రయాణాన్ని ‘విశ్వాసం, ఎదుగుదల, విజయాలతో నిండిన అధ్యాయం’గా అభివర్ణించారు. “గత పదేళ్లలో నా ప్రయాణానికి జెఎస్డబ్ల్యూ స్పోర్ట్స్ కీలక పాత్ర పోషించింది. వారి మద్దతు, దూరదృష్టికి నేను ఎప్పటికీ కృతజ్ఞుడినే. ఇప్పుడు నా ప్రయాణంలో కొత్త అధ్యాయాన్ని ప్రారంభిస్తున్నాను” అని నీరజ్ చోప్రా విడుదల చేసిన ప్రకటనలో తెలిపారు.
జెఎస్డబ్ల్యూ స్పోర్ట్స్ సీఈఓ దివ్యాంశు సింగ్ కూడా నీరజ్తో కలిసి పనిచేయడం గర్వకారణమని పేర్కొన్నారు. “అత్యుత్తమత, లక్ష్యబద్ధత అన్న మా తత్వానికి నీరజ్ విజయాలు నిదర్శనం. అతడితో కలిసి సాధించిన విజయాలపై మాకు గర్వంగా ఉంది. భవిష్యత్ ప్రయత్నాల్లో అతడికి విజయాలు చేకూరాలని కోరుకుంటున్నాం” అన్నారు.
నీరజ్ చోప్రా భారత అథ్లెటిక్స్లో చరిత్ర సృష్టించిన క్రీడాకారుడు. 2021 టోక్యో ఒలింపిక్స్లో ట్రాక్ అండ్ ఫీల్డ్ విభాగంలో భారతదేశానికి తొలి స్వర్ణ పతకం అందించిన ఆయన, 2023 ప్రపంచ అథ్లెటిక్స్ చాంపియన్షిప్లో బంగారు పతకం గెలిచారు. అలాగే 2024 పారిస్ ఒలింపిక్స్లో రజత పతకం సాధించారు. అంతర్జాతీయ స్థాయిలో అనేక పోటీల్లో ఆయన పోడియం ఫినిష్లు సాధించారు.
అయితే, నీరజ్ చోప్రా ప్రారంభించిన ‘వెల్ స్పోర్ట్స్’ సంస్థ ఎందుకు స్థాపించబడింది, ఎప్పటి నుంచి కార్యకలాపాలు ప్రారంభమవుతాయి, సంస్థ ప్రధాన కార్యాలయం ఎక్కడ ఉంటుందన్న వివరాలను ఇప్పటివరకు అధికారికంగా వెల్లడించలేదు. ఈ విషయాలపై స్పష్టత రావాల్సి ఉంది.