నీతి ఆయోగ్ కీలక రోడ్మ్యాప్: 2035 నాటికి 850 బిలియన్ డాలర్ల ఆదాయమే లక్ష్యం
ఆర్టిఫిషియల్ ఇంటెలిజెన్స్ అనేది వ్యాపార రంగంలో కేవలం ఒక తాత్కాలిక మార్పు కాదని, ఇది పరిశ్రమల రూపురేఖలను మార్చే ఒక "నిర్మాణాత్మక పునర్లేఖనం" అని నీతి ఆయోగ్ విశిష్ట సభ్యురాలు దేబ్జానీ ఘోష్ పేర్కొన్నారు. శనివారం జరిగిన 'నీతి ఫ్రంటియర్ టెక్ హబ్' రోడ్మ్యాప్ విడుదల కార్యక్రమంలో ఆమె మాట్లాడుతూ, భారతదేశం ప్రస్తుతం సాంకేతిక రంగంలో అత్యంత కీలకమైన మలుపులో ఉందని, కంపెనీలు తమ పాత పద్ధతులను వదిలి ఏఐ ఆధారిత నమూనాల వైపు మళ్లాలని సూచించారు.
గత మూడు దశాబ్దాలుగా భారత సాంకేతిక సేవల రంగం ప్రపంచవ్యాప్తంగా అగ్రస్థానంలో కొనసాగుతోందని, ప్రతిసారీ ఈ రంగం సంక్షోభంలో పడినప్పుడల్లా తనను తాను పునర్నిర్మించుకుని మరింత బలంగా ఎదిగిందని ఆమె గుర్తుచేశారు. ఇప్పుడు ఏఐ యుగంలో కూడా కంపెనీలు కేవలం శ్రమ ఆధారిత బిల్లింగ్ పద్ధతుల నుండి ఫలిత ఆధారిత విలువల వైపు, సాధారణ కోడింగ్ నుండి ప్రొడక్ట్ ప్లాట్ఫారమ్ల వైపు వేగంగా మారాల్సిన అవసరం ఉందని ఆమె స్పష్టం చేశారు.
2035 నాటికి 850 బిలియన్ డాలర్ల ఆదాయమే లక్ష్యం
ఈ సందర్భంగా నీతి ఆయోగ్ విడుదల చేసిన నివేదిక ప్రకారం, భారత సాంకేతిక సేవల రంగం 2035 నాటికి 750 నుండి 850 బిలియన్ డాలర్ల వార్షిక ఆదాయాన్ని సాధించాలని లక్ష్యంగా పెట్టుకుంది. దీనివల్ల దేశ జీడీపీలో ఈ రంగం వాటా 7-8 శాతానికి చేరుకోవడమే కాకుండా, ప్రపంచ మార్కెట్లో భారత్ వాటా 25 శాతానికి పైగా పెరుగుతుందని అంచనా. అయితే, ప్రస్తుతం ఉన్న అంచనాల ప్రకారం కనిపిస్తున్న 250-300 బిలియన్ డాలర్ల లోటును భర్తీ చేయడానికి ప్రభుత్వ, ప్రైవేట్ రంగాలు సమన్వయంతో పనిచేయాలని నివేదిక వెల్లడించింది.
ముఖ్యంగా హెల్త్కేర్, సెమీకండక్టర్లు, సైబర్ సెక్యూరిటీ వంటి అభివృద్ధి చెందుతున్న రంగాలలో పరిశోధన, అభివృద్ధిపై భారీగా పెట్టుబడులు పెట్టాలని నీతి ఆయోగ్ సూచించింది. 'హ్యూమన్ + ఏజెంట్ + ప్లాట్ఫారమ్' నమూనాలను కంపెనీలు తమ కార్యకలాపాల్లో భాగం చేసుకోవాలని, అప్పుడే అంతర్జాతీయ స్థాయిలో పోటీని ఎదుర్కోగలమని తెలిపింది. అలాగే, విదేశీ కంపెనీలతో భాగస్వామ్యాలు ఏఐ ఆధారిత విలీనాలు ఈ వృద్ధిలో కీలక పాత్ర పోషిస్తాయని పేర్కొంది.
ఈ పరివర్తనను విజయవంతం చేయడానికి ప్రభుత్వం ఒక జాతీయ స్థాయి ‘ఏఐ టాలెంట్ మిషన్'ను ప్రారంభించాల్సిన అవసరం ఉందని నివేదిక ప్రతిపాదించింది. దీని ద్వారా లక్షలాది మంది ఉద్యోగులకు ఏఐ నైపుణ్యాలలో శిక్షణ ఇవ్వడం, స్టార్టప్లకు సులభతర వాణిజ్య విధానాలను కల్పించడం, డిజిటల్ మౌలిక సదుపాయాలను బలోపేతం చేయడం వంటి చర్యలు చేపడతారు. ఈ చర్యల ద్వారా 2047 నాటికి 'వికసిత భారత్' లక్ష్యాన్ని చేరుకోవడంలో సాంకేతిక రంగం వెన్నెముకగా నిలుస్తుందని నీతి ఆయోగ్ ధీమా వ్యక్తం చేసింది.