నిలవాలంటే గెలవాల్సిందే

ఐసీసీ మహిళల వన్డే ప్రపంచకప్ 2025లో భాగంగా నేడు మరో కీలక పోరు జరగనుంది. ఇండోర్‌లోని హోల్కర్ క్రికెట్ స్టేడియం వేదికగా జరగనున్న ఈ మ్యాచ్‌లో భారత్, ఇంగ్లాండ్ జట్లు తలపడనున్నాయి. సెమీ-ఫైనల్ రేసులో నిలవాలంటే ఈ మ్యాచ్ ఇరు జట్లకు, ముఖ్యంగా ఆతిథ్య జట్టు అయిన భారత్‌కు, తప్పక గెలవాల్సిన పోరు. స్వదేశంలో జరుగుతున్న ప్రపంచకప్‌లో భారత్ ఆరంభంలో రెండు విజయాల తర్వాత దక్షిణాఫ్రికా, ఆస్ట్రేలియా చేతిలో వరుసగా రెండు ఓటములు ఎదుర్కొని కష్టాల్లో పడింది. పాయింట్ల పట్టికలో మెరుగైన రన్‌రేట్‌తో ఇంగ్లాండ్ రెండో స్థానంలో ఉండగా, భారత్ మూడో స్థానంలో ఉంది.

జట్ల బలాబలాలు

భారత్: స్మృతి మంధాన, ప్రతికా రావల్ వంటి ఓపెనర్లు మంచి ఫామ్‌లో ఉన్నారు. దీప్తి శర్మ, స్నేహ్ రాణా వంటి ఆల్‌రౌండర్‌లు దిగువ వరుసలో బ్యాటింగ్‌లో కూడా బలం. స్వదేశంలో ఆడుతుండడం అదనపు బలం. ఇక బలహీనతల విషయానికి వస్తే హర్మన్‌ప్రీత్ కౌర్ ఫామ్ అంతగా లేకపోవడం ఆందోళన కలిగిస్తోంది. దీంతో పాటు బౌలింగ్ వ్యూహాలను కూడా జట్టు మెరుగు పరుచుకోవాలి.

ఇంగ్లాండ్: నాట్ స్కైవర్-బ్రంట్, సోఫీ ఎకిల్‌స్టోన్, చార్లీ డీన్ వంటి ఆల్‌రౌండర్‌లు, బౌలర్లతో ఈ జట్టు సమతుల్యంగా ఉంది. వీరికి ఆరో బౌలింగ్ ఆప్షన్ ఉండడం జట్టుకు ఓ ప్లస్ పాయింట్. బలహీనతల విషయానికి వస్తే, బ్యాటింగ్ యూనిట్ లో కొద్దిమందిపైనే ఆధారపడటం జట్టు బలహీనతగా చెప్పొచ్చు.

పిచ్, వాతావరణం: ఇండోర్‌లోని పిచ్ సాధారణంగా బ్యాటింగ్‌కు అనుకూలిస్తుంది, ఇక్కడ భారీ స్కోర్లు నమోదయ్యే అవకాశం ఉంది. వాతావరణం పొడిగా ఉండే అవకాశం ఉంది.

ఐసీసీ మహిళల వన్డే ప్రపంచకప్‌లో భారత్, ఇంగ్లాండ్ జట్ల మధ్య 11 సార్లు మ్యాచ్‌లు జరిగాయి. ఈ 11 మ్యాచ్‌లలో, ఇంగ్లాండ్ జట్టు 7 సార్లు గెలవగా, భారత్ జట్టు 4 సార్లు విజయం సాధించింది.

అంచనా జట్లు

భారత్: హర్మన్‌ప్రీత్ కౌర్ (కెప్టెన్), జెమీమా రోడ్రిగ్స్, స్మృతి మంధాన, అమంజోత్ కౌర్, ప్రతికా రావల్, శ్రీచరణి, క్రాంతి గౌడ్, హర్లీన్ డియోల్, దీప్తి శర్మ, స్నేహ్ రాణా, ఉమా చత్రీ, రిచా ఘోష్.

ఇంగ్లాండ్: నటాలీ స్కైవర్ (కెప్టెన్), డేనియల్ వ్యాట్, ఆలిస్ క్యాప్సీ, సోఫీ ఎకిల్‌స్టోన్, హీథర్ నైట్, చార్లీ డీన్, సోఫియా డంక్లీ, ఎమ్మా ల్యాంబ్, అమీ ఎలెన్ జోన్స్, టామ్మీ బ్యూమాంట్, లారెన్ బెల్, లారెన్ ఫిలర్, లిన్సీ స్మిత్, ఎమిలీ అర్లాట్, సారా గ్లెన్.

టీమిండియా గెలవాలంటే?

ఇది హోరాహోరీగా సాగే పోరు. ఇంగ్లాండ్ సమతుల్యతతో, మెరుగైన ఫీల్డింగ్‌తో ఉంది. కానీ సొంతగడ్డపై ఆడుతున్న భారత్ సెమీస్ రేసులో నిలవాలంటే ఈ మ్యాచ్ గెలవడం అత్యవసరం. గత రెండు పరాజయాల నుంచి గుణపాఠం నేర్చుకుని, బ్యాటింగ్, బౌలింగ్ యూనిట్ సమిష్టిగా రాణిస్తే, భారత్ గెలుపు అవకాశాలు మెరుగ్గా ఉన్నాయి. హర్మన్‌ప్రీత్ కౌర్ మెరుపు ఫామ్‌కు తిరిగి వస్తే, విజయం భారత్‌దే అవుతుంది.