నిరాహార దీక్ష విరమించిన కవిత

ఖమ్మం నగరం వెలుగుమట్లలో పేదల ఇళ్లను బుల్డోజర్లతో కూల్చివేయడాన్ని నిరసిస్తూ తెలంగాణ జాగృతి అధ్యక్షురాలు కల్వకుంట్ల కవిత సోమవారం రాత్రి ఖమ్మంలో ప్రారంభించిన నిరవధిక నిరాహార దీక్ష, మంగళవారం హైదరాబాద్‌కు తరలించిన తర్వాత కూడా బంజారాహిల్స్‌లోని జాగృతి కేంద్ర కార్యాలయంలో మూడో రోజు కొనసాగింది.

దీక్ష విరమణ అనంతరం మీడియాలో మాట్లాడిన కవిత, కాంగ్రెస్ ప్రభుత్వంపై తీవ్రస్థాయిలో ధ్వజమెత్తారు. చేతిలో రాజ్యాంగాన్ని పట్టుకుని తిరిగే రాహుల్ గాంధీ, తన ప్రభుత్వం చేస్తున్న అరాచకాలకు బాధ్యత వహించాలి. రాజ్యాంగం అంటే మెడలో వేసుకునే హారం కాదు, అది దేశాన్ని నడిపించే పవిత్ర గ్రంథం అని ఆమె విమర్శించారు. అర్థరాత్రి వేళ బుల్డోజర్లతో పేదల ఇళ్లు కూల్చడం అఫ్ఘనిస్తాన్ సంస్కృతిని తలపిస్తోందని ఆవేదన వ్యక్తం చేశారు.

ముఖ్యమంత్రి రేవంత్ రెడ్డి నేతృత్వంలోని కాంగ్రెస్ ప్రభుత్వంపై తీవ్ర స్థాయిలో ధ్వజమెత్తారు. ఒక్క రోజులోనే దాదాపు 750 కుటుంబాలను బలవంతంగా ఖాళీ చేసి, వారి ఇళ్లను బుల్డోజర్లతో కూల్చివేశారని, నిర్వాసితులలో సగానికి పైగా మందికి భూములపై సర్టిఫికెట్లు ఉన్నారని ప్రభుత్వ మంత్రులే చెప్పారని, అలాంటప్పుడు ఇళ్లను ఎందుకు కూల్చివేశారని ఆమె ప్రశ్నించారు.

రాష్ట్రంలో ఉన్న 1.74 లక్షల ఎకరాల భూదాన్ భూములను కాజేయడానికి ప్రభుత్వ పెద్దలు కుట్ర పన్నారని, అందులో భాగంగానే వెలుగుమట్లలో ట్రయల్ రన్ నిర్వహించారని మండిపడ్డారు.రాష్ట్రంలోని భూదాన్ భూముల లెక్కలపై ప్రభుత్వం వెంటనే శ్వేతపత్రం విడుదల చేయాలని ఆమె డిమాండ్ చేశారు.ప్రభుత్వం 310 మందికి టోకెన్లు ఇచ్చి ఇందిరమ్మ ఇళ్లు కట్టిస్తామని చెప్పడాన్ని ఆమె ప్రశ్నించారు. బాధితులు లక్షల రూపాయలు వెచ్చించి ఇళ్లు కట్టుకుంటే, కేవలం 5 లక్షల రూపాయల ఇందిరమ్మ ఇల్లు ఇస్తే వారి నష్టం ఎవరు భరిస్తారు? అని నిలదీశారు.

బాధితులకు సంపూర్ణ న్యాయం జరిగిందో లేదో తెలుసుకోవడానికి జస్టిస్ ఈశ్వరయ్య నేతృత్వంలో ఒక కమిటీని వేస్తామని, లేఅవుట్ చేసి ఫిజికల్ ప్రాపర్టీని చూపే వరకు విశ్రమించబోమని కవిత స్పష్టం చేశారు. ప్రజాపాలన పేరుతో ప్రభుత్వం 'ప్రజా వేదన' చేస్తోందని, పేదల భూములను పెద్దలకు కట్టబెట్టే ప్రయత్నాలను ప్రగతిశీల శక్తులతో కలిసి అడ్డుకుంటామని ఆమె హెచ్చరించారు.

సోమవారం ఖమ్మంలోని అంబేద్కర్ విగ్రహం వద్ద మహాధర్నా చేపట్టి, రాత్రి అంబేద్కర్ భవన్లో నిరాహార దీక్ష ప్రారంభించిన కవిత, మంగళవారం ఉదయం పోలీసులు అరెస్ట్ చేసినప్పటికీ, జాగృతి కార్యాలయంలో దీక్ష కొనసాగించారు. ధర్మ సమాజ్ పార్టీ అధ్యక్షుడు విశారదన్ మహరాజ్ కూడా దీక్షలో పాల్గొన్నారు.

వెలుగుమట్లలో కూల్చివేసిన ఇళ్ల స్థానంలోనే కొత్త ఇళ్లు నిర్మించాలని ప్రభుత్వం లిఖితపూర్వక హామీ ఇవ్వాలని డిమాండ్ చేసిన కవిత, అలా చేయకపోతే నిరాహార దీక్ష కొనసాగుతుందని హెచ్చరించారు. పేదల సంక్షేమానికి దానం చేయబడిన భూదాన్ భూములను ఆక్రమించడం, భూముల విలువ పెరుగుతోందని వాటిని బడా బాబులకు ఇవ్వడం వంటి కుట్రలపై ఆమె ఆగ్రహం వ్యక్తం చేశారు.

బుధవారం సాయంత్రం రిటైర్డ్ జడ్జి జస్టిస్ ఈశ్వరయ్య నిమ్మరసం ఇచ్చి దీక్షను విరమింపజేశారు. ప్రభుత్వం బాధితులను ఆక్రమణదారులుగా ముద్రవేసి, చివరికి ఆ స్థలాలకు యజమానులుగా టోకెన్లు జారీ చేయడంతో దీక్ష ముగిసింది. ఈ పోరాటం కేవలం ఖమ్మంకే పరిమితం కాదని, రాష్ట్రవ్యాప్తంగా ప్రభుత్వ పేద వ్యతిరేక విధానాలను ఎండగడతామని ఆమె హెచ్చరించారు. ఈ విజయంతో వెలుగుమట్ల బాధితుల్లో కొత్త ఆశలు చిగురించాయి. రాజకీయంగా కూడా ఈ పరిణామం కాంగ్రెస్ ప్రభుత్వానికి పెద్ద ఎదురుదెబ్బగా విశ్లేషకులు భావిస్తున్నారు.