నిధులు, టెక్నాలజీ ఇస్తే గల్ఫ్ దేశాలకు డ్రోన్ సహాయం: జెలెన్స్కీ
ఇరాన్ తయారీ కామికేజ్ డ్రోన్ల నుంచి రక్షణ పొందేందుకు తమ నైపుణ్యాన్ని కోరుతున్న మధ్యప్రాచ్య దేశాలకు సాయం చేసేందుకు ఉక్రెయిన్ సిద్ధమైంది. అయితే, దీనికి ప్రతిఫలంగా తమకు నిధులు, అత్యాధునిక సాంకేతికత కావాలని ఉక్రెయిన్ అధ్యక్షుడు వోలోడిమిర్ జెలెన్స్కీ స్పష్టం చేశారు. ఇప్పటికే తమ నిపుణుల బృందాలు ఆయా ప్రాంతాలకు చేరుకున్నాయని ఆయన వెల్లడించారు.
నిపుణుల బృందాల పర్యటన
డ్రోన్ రక్షణ వ్యవస్థలు ఎలా పనిచేయాలో ప్రదర్శించడానికి, క్షేత్రస్థాయి అంచనాల కోసం ఉక్రెయిన్ మూడు బృందాలను మధ్యప్రాచ్యానికి పంపింది. ఖతార్, యూఏఈ, సౌదీ అరేబియా దేశాలతో పాటు జోర్డాన్లోని అమెరికా సైనిక స్థావరానికి కూడా ఈ బృందాలు వెళ్లాయి. "మేము ఏ ఆపరేషన్లలోనూ పాల్గొనడం లేదు. మాకు ఇరాన్తో యుద్ధం లేదు. గల్ఫ్ దేశాలతో దీర్ఘకాలిక ఒప్పందాల కోసం చర్చలు జరుపుతున్నాం" అని జెలెన్స్కీ వివరించారు. ఇరాన్ షాహిద్ డ్రోన్లను ఎదుర్కోవడానికి గల్ఫ్ దేశాలు ఖరీదైన క్షిపణులను వాడుతుండగా, ఉక్రెయిన్ తక్కువ ఖర్చుతో కూడిన చిన్న డ్రోన్లు, జామింగ్ పరికరాలతో వాటిని కూల్చివేస్తోంది. ఇదే నైపుణ్యాన్ని ఇప్పుడు ఇతర దేశాలకు అందించాలని ఉక్రెయిన్ భావిస్తోంది.
అమెరికాతో ఒప్పందంపై సందిగ్ధత
అమెరికాతో దాదాపు 35 నుంచి 50 బిలియన్ డాలర్ల విలువైన డ్రోన్ ఒప్పందం చేసుకోవాలని ఉక్రెయిన్ చాలా నెలలుగా ప్రయత్నిస్తున్నా, వాషింగ్టన్ నుంచి స్పందన లేదని జెలెన్స్కీ అసంతృప్తి వ్యక్తం చేశారు. డ్రోన్ల కూల్చివేతలో ఉక్రెయిన్ సాయం తమకు అక్కర్లేదని అమెరికా అధ్యక్షుడు డొనాల్డ్ ట్రంప్ వ్యాఖ్యానించిన నేపథ్యంలో ఈ ఒప్పందంపై నీలినీడలు ముసురుకున్నాయి. మరోవైపు కీవ్ అనుమతి లేకుండా కొన్ని ఉక్రెయిన్ కంపెనీలు, విదేశీ ప్రభుత్వాలు డ్రోన్ వ్యతిరేక పరికరాల కోసం ఒప్పందాలు చేసుకోవడంపై ఆయన ఆగ్రహం వ్యక్తం చేశారు.
శాంతి చర్చలకు అంతరాయం
మధ్యప్రాచ్యంలో ఉద్రిక్తతల వల్ల ఉక్రెయిన్కు అందే వాయు రక్షణ క్షిపణుల సరఫరాపై ప్రభావం పడకూడదని జెలెన్స్కీ ఆందోళన వ్యక్తం చేశారు. యూఏఈలో జరగాల్సిన రష్యా-ఉక్రెయిన్ శాంతి చర్చలు ఇజ్రాయెల్, అమెరికా దాడుల వల్ల వాయిదా పడ్డాయి. అమెరికాలో సమావేశం కావాలని వాషింగ్టన్ సూచించినా, రష్యా అందుకు అంగీకరించడం లేదని ఆయన తెలిపారు. ఇక యుద్ధరంగం విషయానికొస్తే.. రష్యా తలపెట్టిన ' స్ప్రింగ్ అఫెన్సివ్ ' ఇప్పటికే విఫలమైందని ఉక్రెయిన్ సైన్యం బలంగా నమ్ముతోందని జెలెన్స్కీ ధీమా వ్యక్తం చేశారు.