నితీశ్ ‘నఖాబ్’వివాదానికి ముగింపు పలకాలి: మాయావతి
బీహార్ ముఖ్యమంత్రి నితీశ్ కుమార్కు సంబంధించిన ‘నఖాబ్’ (ముఖవస్త్రం) వివాదంపై బీఎస్పీ అధినేత, ఉత్తరప్రదేశ్ మాజీ ముఖ్యమంత్రి మాయావతి శనివారం జోక్యం చేసుకున్నారు. మహిళ గౌరవం, భద్రతకు సంబంధించిన ఈ ఘటనపై నితీశ్ కుమార్ పశ్చాత్తాపం వ్యక్తం చేసి, పెరుగుతున్న వివాదానికి ముగింపు పలకాలని ఆమె సూచించారు. బీహార్ సీఎం సచివాలయంలో ఇటీవల జరిగిన ఒక కార్యక్రమంలో, నియామక పత్రాలు స్వీకరించేందుకు వచ్చిన ఓ మహిళా ఆయుష్ వైద్యురాలి ముఖంపై ఉన్న నఖాబ్ను నితీశ్ కుమార్ తొలగించిన వీడియో సోషల్ మీడియాలో విస్తృతంగా వైరల్ కావడం వివాదానికి దారి తీసింది. ఆ సమయంలో ఇది ఏమిటి? అంటూ ఆయన వ్యాఖ్యానించినట్లు వీడియోలో కనిపించడంతో, ప్రతిపక్ష పార్టీలు సీఎం నుంచి నిర్దిష్టమైన క్షమాపణ కోరాయి.
ఈ ఘటనపై ఎక్స్ వేదికగా హిందీలో సుదీర్ఘ పోస్టు చేసిన మాయావతి, ఈ వివాదం బాధకరమైనదీ, దురదృష్టకరమైనదీ అని వ్యాఖ్యానించారు. ఆ తర్వాత మంత్రుల వ్యాఖ్యల కారణంగా వివాదం మరింత తీవ్రతరం అయిందని ఆమె పేర్కొన్నారు.
మహిళల భద్రత, గౌరవానికి సంబంధించిన అంశం కావడంతో ఈ సమస్యపై ముఖ్యమంత్రి స్వయంగా జోక్యం చేసుకుని పరిష్కరించాల్సిందని మాయావతి అభిప్రాయపడ్డారు. ఈ ఘటనను సరైన దృక్పథంతో పరిశీలించి, ముఖ్యమంత్రి పశ్చాత్తాపం వ్యక్తం చేస్తే, పెరుగుతున్న ఈ చేదు వివాదానికి ముగింపు పలికినట్లవుతుందని ఆమె అన్నారు.
మతబోధకులకు కూడా సెల్యూట్ చేస్తారా?
ఇదే సందర్భంలో ఉత్తరప్రదేశ్లోని బహ్రాయిచ్ జిల్లాలో జరిగిన మరో వివాదాన్ని కూడా మాయావతి ప్రస్తావించారు. అక్కడ ఓ మతపరమైన ఉపదేశకుడికి పోలీస్ పరేడ్ సందర్భంగా సెల్యూట్ చెయ్యడం తీవ్ర విమర్శలకు దారి తీసిందని, ఇది పోలీసు వ్యవస్థలోని నిబంధనలు, సంప్రదాయాల ఉల్లంఘన అని ఆమె విమర్శించారు.
పోలీసు పరేడ్లు, సెల్యూట్లకు ప్రత్యేకమైన క్రమశిక్షణ, గౌరవం ఉంటుంది. వాటికి భంగం కలిగించకూడదని మాయావతి స్పష్టం చేశారు. ఈ ఘటనపై జిల్లా పోలీస్ అధికారిని వివరణ కోరిన రాష్ట్ర డీజీపీ చర్య సానుకూలమని చెప్పినా, ప్రజలు ఇప్పుడు స్పష్టమైన ఆదేశాల కోసం ఎదురు చూస్తున్నారని ఆమె అన్నారు.
అలాగే డిసెంబర్ 19న ప్రారంభమైన ఉత్తరప్రదేశ్ శాసనసభ శీతాకాల సమావేశాలపై కూడా మాయావతి విమర్శలు చేశారు. గత సమావేశాల మాదిరిగానే ఈసారి కూడా పాలక పక్షం–ప్రతిపక్షాల మధ్య వాదోపవాదాలకే పరిమితమై, ప్రజా సంక్షేమ సమస్యలపై గంభీర చర్చ జరగలేదని ఆమె ఆరోపించారు. రైతులు ఎదుర్కొంటున్న ఎరువుల కొరత వంటి కీలక అంశాలపై ప్రభుత్వం తగిన సమాధానం ఇవ్వలేదని అన్నారు.
పార్లమెంట్ సమావేశాలపై అసంతృప్తి
శుక్రవారం ముగిసిన పార్లమెంట్ శీతాకాల సమావేశాలపైనా ఆమె అసంతృప్తి వ్యక్తం చేశారు. ఢిల్లీ వాయు కాలుష్యం వంటి జాతీయ సమస్యలపై అర్థవంతమైన చర్చలు జరగలేదని వాపోయారు. దేశాన్ని వేధిస్తున్న ప్రధాన సమస్యలపై చర్చలు జరిగి ప్రజలకు కొంతైనా ఆశ కలిగిస్తాయని దేశమంతా ఎదురుచూసింది. కానీ అది జరగకపోవడం దురదృష్టకరం అని ఆమె అన్నారు.
అంతేకాకుండా బంగ్లాదేశ్లో వేగంగా క్షీణిస్తున్న పరిస్థితులపై మాయావతి ఆందోళన వ్యక్తం చేశారు. అక్కడ ‘భారత్ వ్యతిరేక కార్యకలాపాలు’ పెరుగుతున్నాయని, ఇది నేపాల్ పరిస్థితులను తలపిస్తోందని వ్యాఖ్యానించారు. ఈ పరిణామాలపై కేంద్ర ప్రభుత్వం దీర్ఘకాలిక విధానంతో స్పందించాలని ఆమె కోరారు. జూలై 2024 ఉద్యమానికి బాధ్యత వహించిన యువ నాయకుడు షరీఫ్ ఒస్మాన్ హాది హత్య అనంతరం ఇటీవల బంగ్లాదేశ్లో హింసాత్మక నిరసనలు, అగ్నిప్రమాదాలు చెలరేగిన నేపథ్యంలో మాయావతి ఈ వ్యాఖ్యలు చేశారు.