నేడు భారత్ X బంగ్లాదేశ్ పోరు
ఆసియా కప్ 2025లో భారత్ జట్టు దూకుడు కొనసాగుతోంది. పాకిస్తాన్పై వరుసగా రెండో విజయం సాధించి, సూపర్ 4 పాయింట్ల పట్టికలో అగ్రస్థానంలో నిలిచిన టీమిండియా ఇప్పుడు బంగ్లాదేశ్తో కీలక మ్యాచ్ ఆడనుంది. దుబాయ్ అంతర్జాతీయ క్రికెట్ స్టేడియంలో నేడు భారత్, బంగ్లాదేశ్ జట్లు తలపడనున్నాయి. రెండు జట్లకు ఈ మ్యాచ్ చాలా కీలకం. భారత్ గెలిస్తే దాదాపు ఫైనల్లో చోటు ఖాయం అవుతుంది, భారీ విజయం సాధిస్తే మరింత సులభంగా ఫైనల్ చేరుకుంటుంది. బంగ్లాదేశ్కు కూడా ఇదే వర్తిస్తుంది. అయితే, ఓడిపోయిన జట్టుకు సూపర్ 4 దశలో మరో మ్యాచ్ మిగిలి ఉండటంతో ఇంకా అవకాశం ఉంటుంది.
సూపర్ ఫామ్లో టీమిండియా
సూర్యకుమార్ యాదవ్ నేతృత్వంలోని భారత జట్టు ఆసియా కప్ 2025లో అద్భుతమైన ఫామ్లో ఉంది. గ్రూప్ దశలో యూఏఈ, పాకిస్తాన్, ఒమాన్లను ఓడించి గ్రూప్-ఎలో అగ్రస్థానంలో నిలిచింది. సూపర్ 4లో కూడా పాకిస్తాన్ను చిత్తు చేసి ఆరు వికెట్ల తేడాతో విజయం సాధించింది. గత ఆదివారం జరిగిన ఈ మ్యాచ్లో పాకిస్తాన్ జట్టు బ్యాటింగ్, బౌలింగ్ విభాగాల్లో పూర్తిగా తేలిపోయింది. భారత బ్యాటర్లు పాకిస్తాన్ బౌలర్లను సునాయాసంగా ఎదుర్కొన్నారు. ఓపెనర్ అభిషేక్ శర్మ 39 బంతుల్లో 74 పరుగులు చేసి జట్టుకు అదిరే ఆరంభాన్ని ఇచ్చాడు. శుభ్మన్ గిల్ కూడా 47 పరుగులతో రాణించాడు. బౌలింగ్లో శివమ్ దూబే, హార్దిక్ పాండ్యా కీలక వికెట్లు తీసి పాకిస్తాన్ను కట్టడి చేశారు. ఈ విజయంతో భారత్ నెట్ రన్ రేట్ కూడా మెరుగుపడింది.
అదరగొడుతున్న బంగ్లా
బంగ్లాదేశ్ కూడా సూపర్ 4లో తమ తొలి మ్యాచ్లోనే శ్రీలంకను నాలుగు వికెట్ల తేడాతో ఓడించి సత్తా చాటింది. ఈ విజయం బంగ్లాదేశ్కు ఫైనల్ ఆశలను పెంచింది. శ్రీలంక నిర్దేశించిన 169 పరుగుల లక్ష్యాన్ని బంగ్లాదేశ్ ఛేదించడానికి చివరి ఓవర్ వరకు పోరాడాల్సి వచ్చింది. అయితే సైఫ్ హసన్ (అర్ధ సెంచరీ), తౌహిద్ హృదయ్ (అర్ధ సెంచరీ) అద్భుతమైన ఇన్నింగ్స్లతో జట్టుకు విజయం అందించారు. బౌలింగ్లో వారి పేసర్లు తస్కిన్ అహ్మద్, ముస్తాఫిజుర్ రెహమాన్ కీలకంగా వ్యవహరిస్తారు.
ఈ మ్యాచ్లో స్పిన్నర్లదే కీలక పాత్ర అని చెప్పడంలో సందేహం లేదు. భారత్ తన స్పిన్ దళంతో బంగ్లాదేశ్ను కట్టడి చేయాలని చూస్తుంటే, బంగ్లాదేశ్ తమ స్పిన్నర్లతో భారత్ను ఆపాలని చూస్తోంది. నేడు జరిగే ఈ మ్యాచ్ ఇరు జట్లకు ఫైనల్ బెర్త్ను నిర్ణయించే అవకాశం ఉన్నందున, ఈ పోరులో ఒత్తిడిని తట్టుకుని నిలబడిన జట్టే విజేతగా నిలుస్తుంది.
భారత్, బంగ్లాదేశ్ మధ్య టీ20 ఫార్మాట్లో ఇప్పటివరకు 17 మ్యాచ్లు జరిగాయి. ఇందులో భారత్ 16 విజయాలు సాధించగా, బంగ్లాదేశ్ కేవలం ఒక్క మ్యాచ్ మాత్రమే గెలిచింది. అంతా సజావుగా సాగితే, సూర్యకుమార్ యాదవ్ నేతృత్వంలోని జట్టుకు ఇది మరో భారీ విజయం కావచ్చు. అయితే, ఈ ఫార్మాట్లో ఎప్పుడైనా ఏమైనా జరగవచ్చు. బంగ్లాదేశ్ స్పిన్ బలం కొంత మెరుగ్గా ఉండటంతో, వారు భారత్కు షాక్ ఇచ్చే అవకాశం ఉంది.
ఎవరు గెలుస్తారు?
ఈ మ్యాచ్లో భారత్కే విజయావకాశాలు ఎక్కువగా ఉన్నాయి. టీమిండియా బ్యాటింగ్ ఆర్డర్ చాలా బలంగా ఉంది. ఓపెనర్లు అభిషేక్ శర్మ, శుభ్మన్ గిల్ మంచి ఫామ్లో ఉన్నారు. మిడిల్ ఆర్డర్లో సూర్యకుమార్ యాదవ్, హార్దిక్ పాండ్యా, తిలక్ వర్మ వంటి విధ్వంసకర బ్యాటర్లు ఉన్నారు. బౌలింగ్లో జస్ప్రీత్ బుమ్రా, అర్ష్దీప్ సింగ్, కుల్దీప్ యాదవ్ వంటి కీలక బౌలర్లు ఉన్నారు. బంగ్లాదేశ్ జట్టు ఓపెనర్ లిట్టన్ దాస్పై ఎక్కువగా ఆధారపడాల్సి వస్తుంది. అయితే బంగ్లాదేశ్ ఈ మ్యాచ్ లో ఐదుగురు బౌలర్లతో బరిలోకి దిగుతోంది. ముస్తాఫిజుర్, తస్కిన్ అహ్మద్, తంజిమ్ హసన్ సాకిబ్లు ఫాస్ట్ బౌలర్లుగా ఉంటారు. ముస్తాఫిజుర్ తన ఐపీఎల్ అనుభవంతో భారత బ్యాటర్లను ఇబ్బంది పెట్టే అవకాశం ఉంది.
దుబాయ్లో మ్యాచ్ జరగనుంది కాబట్టి టాస్ కీలకం కావచ్చు. రాత్రిపూట మంచు ప్రభావం ఉండే అవకాశం ఉండటంతో, టాస్ గెలిచిన జట్టు ఫీల్డింగ్ ఎంచుకునే అవకాశం ఉంది. మొత్తానికి ఈరోజు జరిగే మ్యాచ్లో భారత్ తమ దూకుడును కొనసాగిస్తుందా? లేక బంగ్లాదేశ్ అనూహ్యంగా విజయం సాధిస్తుందా? అనేది చూడాలి మరి!
టీమిండియా జట్టు (అంచనా): సూర్యకుమార్ యాదవ్ (కెప్టెన్), శుభ్మన్ గిల్ (వైస్-కెప్టెన్), అభిషేక్ శర్మ, తిలక్ వర్మ, హార్దిక్ పాండ్యా, శివమ్ దూబే, అక్షర్ పటేల్, జితేష్ శర్మ (వికెట్ కీపర్), జస్ప్రీత్ బుమ్రా, అర్ష్దీప్ సింగ్, వరుణ్ చక్రవర్తి, కుల్దీప్ యాదవ్, సంజూ శాంసన్ (వికెట్ కీపర్), హర్షిత్ రాణా, రింకూ సింగ్.
బంగ్లాదేశ్ జట్టు (అంచనా): లిట్టన్ దాస్ (కెప్టెన్, వికెట్ కీపర్), తంజిద్ హసన్, పర్వేజ్ హొస్సేన్ ఎమన్, సైఫ్ హసన్, తౌహిద్ హృదయ్, జేకర్ అలీ, షమీమ్ హొస్సేన్, నురుల్ హసన్, మెహెదీ హసన్, రిషాద్ హొస్సేన్, నసుమ్ అహ్మద్, ముస్తాఫిజుర్ రెహమాన్, తంజిమ్ హసన్, తస్కిన్ అహ్మద్, షోరిఫుల్ ఇస్లాం, మహమ్మద్ సైఫుద్దీన్.