దౌత్య కార్యాలయాల భద్రతపై బంగ్లాదేశ్ ఆందోళన.. భారత హైకమిషనర్కు సమన్లు
భారత్లో ఉన్న తమ దౌత్య కార్యాలయాలకు సరైన రక్షణ లేదని ఆందోళన వ్యక్తం చేస్తూ బంగ్లాదేశ్ ప్రభుత్వం భారత రాయబారి ప్రణయ్ వర్మకు సమన్లు జారీ చేసింది . ఢాకాలో జరిగిన ఈ సమావేశంలో ఢిల్లీ, సిలిగురి ప్రాంతాల్లోని బంగ్లాదేశ్ ఆఫీసుల వద్ద జరిగిన నిరసనలు, దాడులపై వారు తమ అభ్యంతరం వ్యక్తం చేశారు . ఈ కీలక చర్చల్లో బంగ్లాదేశ్ విదేశాంగ కార్యదర్శి ఆసద్ ఆలమ్ సియామ్, భారత ఉప హైకమిషనర్ కూడా పాల్గొన్నారు. తమ సిబ్బంది భద్రత విషయంలో భారత్ వెంటనే కఠిన చర్యలు తీసుకోవాలని బంగ్లాదేశ్ ఈ సందర్భంగా డిమాండ్ చేసింది.
డిసెంబర్ 20న ఢిల్లీలోని బంగ్లాదేశ్ రాయబార కార్యాలయం, వారి అధికారుల నివాసాల వద్ద జరిగిన గొడవలు, అలాగే డిసెంబర్ 22న సిలిగురిలోని వారి వీసా సెంటర్పై జరిగిన దాడుల పట్ల బంగ్లాదేశ్ ప్రభుత్వం తీవ్ర అభ్యంతరం వ్యక్తం చేసింది. ఈ మేరకు ఆ దేశ విదేశాంగ శాఖ ఒక ప్రకటన విడుదల చేస్తూ.. ఈ దాడుల వెనుక కొందరు తీవ్రవాద శక్తులు ఉన్నాయని ఆరోపించింది. వరుసగా జరుగుతున్న ఈ ఘటనలు తమ అధికారుల భద్రతను ప్రశ్నార్థకం చేస్తున్నాయని బంగ్లాదేశ్ ఆందోళన చెందుతోంది.
భారత్లోని తమ రాయబార కార్యాలయాల ముందు జరుగుతున్న హింసాత్మక నిరసనలను బంగ్లాదేశ్ తీవ్రంగా తప్పుబట్టింది. ఇవన్నీ కావాలని ప్లాన్ చేసి చేస్తున్న దాడులని, వీటివల్ల తమ అధికారుల ప్రాణాలకు ముప్పు పొంచి ఉందని ఆందోళన వ్యక్తం చేసింది. ఇలాంటి ఘటనలు రెండు దేశాల మధ్య ఉండాల్సిన గౌరవాన్ని, శాంతిని దెబ్బతీస్తాయని పేర్కొంది. అందుకే, ఈ దాడులపై భారత్ వెంటనే పూర్తిస్థాయి విచారణ జరిపి, దోషులను శిక్షించాలని డిమాండ్ చేసింది. ఇకపై ఇలాంటివి జరగకుండా తమ ఆఫీసులకు, సిబ్బందికి గట్టి భద్రత కల్పించాలని కోరింది. అంతర్జాతీయ నిబంధనల ప్రకారం వేరే దేశ రాయబార కార్యాలయాలను కాపాడాల్సిన బాధ్యత భారత్పై ఉందని, దీనిపై కేంద్ర ప్రభుత్వం వెంటనే స్పందిస్తుందని ఆశిస్తున్నట్లు బంగ్లాదేశ్ తెలిపింది.
భారత్, బంగ్లాదేశ్ మధ్య గత కొద్దిరోజులుగా దౌత్యపరమైన ఉద్రిక్తతలు పెరుగుతున్నాయి. గత 10 రోజుల్లోనే భారత రాయబారిని బంగ్లాదేశ్ ప్రభుత్వం పిలిపించడం ఇది రెండోసారి. ప్రస్తుతం అక్కడ ఉన్న తాత్కాలిక ప్రభుత్వం వచ్చినప్పటి నుండి, వివిధ కారణాలతో భారత రాయబారిని ఇప్పటివరకు ఆరు సార్లు పిలిపించి మాట్లాడారు. అంతకుముందు డిసెంబర్ 14న కూడా ఆయనను పిలిపించారు. కేవలం బంగ్లాదేశ్ మాత్రమే కాదు, భారత్ కూడా అక్కడి తమ రాయబార కార్యాలయాల భద్రతపై అసంతృప్తిగా ఉంది. అందుకే డిసెంబర్ 17న భారత ప్రభుత్వం కూడా బంగ్లాదేశ్ రాయబారిని పిలిపించి, ఢాకాలో తమ అధికారులకు రక్షణ కల్పించాలని గట్టిగా కోరింది.
ఈ పరిణామాల మధ్య న్యూఢిల్లీ, సిలిగురి నగరాల్లో బంగ్లాదేశ్ వీసా, కాన్సులర్ సేవలను తాత్కాలికంగా నిలిపివేసినట్లు బంగ్లాదేశ్ ప్రకటించింది. తదుపరి ఆదేశాలు వచ్చే వరకు ఈ సస్పెన్షన్ కొనసాగుతుందని అధికారులు తెలిపారు.
అలాగే, ఇంకిలాబ్ మోంచో కన్వీనర్ షరీఫ్ ఉస్మాన్ హాదీపై దాడి చేసిన నిందితులు భారత్లోకి ప్రవేశించకుండా అడ్డుకోవాలని బంగ్లాదేశ్ భారత్ను కోరింది. నిందితులు భారత్లోకి ప్రవేశిస్తే వెంటనే అరెస్ట్ చేసి బంగ్లాదేశ్కు అప్పగించాలని కూడా ఢాకా అభ్యర్థించింది. మొత్తంగా ఈ పరిణామాలు భారత్-బంగ్లాదేశ్ మధ్య దౌత్య సంబంధాల్లో ఉద్రిక్తత పెరుగుతున్న సంకేతంగా కనిపిస్తున్నాయి.