దేశవ్యాప్తంగా “లా” విద్యార్థులకు ఊరట

దేశవ్యాప్తంగా లా చదువుతున్న విద్యార్థులకు ఢిల్లీ హైకోర్టు భారీ ఊరట ఇచ్చింది. ఏ “లా” కళాశాలలోనైనా హాజరు శాతం తగ్గిందన్న కారణంతో విద్యార్థులను పరీక్షలకు అనుమతించకుండా ఆపకూడదని ఢిల్లీ హైకోర్టు సోమవారం కీలక తీర్పు ఇచ్చింది. ఈ విషయంపై బార్ కౌన్సిల్ ఆఫ్ ఇండియా ప్రస్తుత హాజరు నిబంధనలను పునఃపరిశీలించి సవరణలు చేయాలని ఆదేశాలు జారీ చేసింది.

తీర్పు నేపథ్యం

అటెండెన్స్ సమస్యలపై ఒత్తిడితో 2016లో అమిటీ లా స్కూల్ విద్యార్థి సుశాంత్ రోహిల్లా ఆత్మహత్య చేసుకున్న ఘటన తర్వాత మొదలైన సుమోటో విచారణతో ఈ ల్యాండ్‌మార్క్ తీర్పు వెలువడింది. ఈ కేసు అకడమిక్ నిబంధనల వల్ల విద్యార్థులపై పెరుగుతున్న మానసిక ఒత్తిడి గురించి దేశవ్యాప్తంగా చర్చకు దారితీసింది.

న్యాయమూర్తులు ప్రతిభా ఎం. సింగ్, అమిత్ శర్మలతో కూడిన డివిజన్ బెంచ్ ఈ తీర్పు వెలువరించింది. విద్యాసంస్థల్లో హాజరు నిబంధనలు అవసరమే అయినప్పటికీ, అవి విద్యార్థులపై మానసిక ఒత్తిడిని పెంచేలా ఉండరాదని బెంచ్ స్పష్టం చేసింది. కేవలం హాజరు కొరత పేరుతో విద్యార్థులు ప్రాణాలు కోల్పోవడం ఎవరికీ అనుకూలం కాదు. విద్య అనేది ఉత్సాహాన్ని పెంచే సాధనం కావాలి, భయాన్ని కాదు అని న్యాయమూర్తులు తెలిపారు.

కోర్టు ముఖ్య ఆదేశాలు:

• బార్ కౌన్సిల్ ఆఫ్ ఇండియా కొత్త నిబంధనలను రూపొందించే వరకు హాజరు తగ్గిందన్న కారణంతో విద్యార్థులను పరీక్షలకు అడ్డుకోవద్దు.

• లా విద్య నాణ్యతను దృష్టిలో ఉంచుకొని, హాజరు నిబంధనలను భారతీయ, అంతర్జాతీయ ప్రమాణాలకు అనుగుణంగా బార్ కౌన్సిల్ ఆఫ్ ఇండియా సవరించాలి.

• బార్ కౌన్సిల్ నిబంధనలకంటే కఠినమైన నియమాలను ఏ విద్యాసంస్థలలో అమలు చేయకూడదు.

అదనంగా ఉన్నత విద్యా సంస్థలన్నీ విద్యార్థుల సమస్యలు పరిష్కరించేందుకు UGC నియమాల ప్రకారం స్టూడెంట్ గ్రీవెన్స్ రెడ్రెస్సల్ కమిటీలను ఏర్పరచాలని ఆదేశించారు.

ప్రభుత్వం అమలు వివరాలు

యూనివర్సిటీ గ్రాంట్స్ కమిషన్ ద్వారా భారతదేశంలోని అన్ని యూనివర్సిటీలు, కాలేజీల్లో విద్యార్థుల ఫిర్యాదుల పరిష్కార కమిటీలు 2024 సెప్టెంబర్ లోపే ఏర్పాటు చేయాలన్న ఆదేశాలు ఉన్నప్పటికీ పూర్తి అమలు జరగలేదని కోర్టు ఆక్షేపించింది. త్వరితగతిన ఈ కమిటీల ఏర్పాటు కోసం చర్యలు తీసుకోవాలని విద్యాశాఖను కోరింది.

అంతేకాక రోహిల్లా కుటుంబానికి ఎక్స్-గ్రేషియా పరిహారం అందించే అవకాశాన్ని పరిశీలించాలని కోర్టు అమిటీ లా స్కూల్‌ను కోరింది.

ఈ తీర్పు భారతదేశంలోని న్యాయ విద్యారంగంలో ఒక ముఖ్యమైన మలుపు. విద్యార్థుల మానసిక ఆరోగ్యం, సంక్షేమానికి ప్రాధాన్యతనిస్తూ, పాత నిబంధనలకు బదులుగా ఆధునిక, సున్నితమైన విధానాలను అనుసరించడానికి మార్గం సుగమం చేసింది.

విద్యా సంస్థల్లో హాజరు ప్రాముఖ్యత

విద్యాసంస్థల్లో హాజరు నిబంధనలు చాలా కాలంగా కొనసాగుతున్నవే. ఇవి కేవలం ఒక అమల్లో ఉండే విధానం కాదు, విద్యార్థి చదువుతో నేరుగా సంబంధం ఉన్న ఒక ముఖ్య అంశం. విద్యార్థి తరగతులకు రెగ్యులర్‌గా హాజరవటం ఆయన/ఆమె శైలీ, క్రమశిక్షణ, నేర్చుకునే తీరు, ఉపాధ్యాయులతో మమేకం, సహవిద్యార్థులతో చర్చా వాతావరణం వంటి అంశాలను బలోపేతం చేస్తాయి. ఈ కారణంగా హాజరు నిబంధనలు విద్యా వ్యవస్థలో కీలక పాత్ర పోషిస్తాయి.

అయితే, హాజరు శాతాన్ని తప్పనిసరి చేయడం వల్ల కొన్నిసార్లు విద్యార్థులపై మానసిక ఒత్తిడి పెరిగే అవకాశముంది. తరగతులకు రావడం సాధ్యంకాకపోయే పరిస్థితుల్లో, పరీక్షల నుంచి నిషేధించడం లేదా విద్యాభ్యాసాన్ని నిలిపివేయడం వంటి చర్యలు విద్యార్థుల మనోధైర్యాన్ని దెబ్బతీయవచ్చు. ఈ సమస్యలను దృష్టిలో ఉంచుకుని ప్రత్యామ్నాయ మార్గాలు అన్వేషించడం అవసరం.

హాజరుకు ప్రత్యామ్నాయ పద్ధతులు

• అదనపు తరగతులు: హాజరు కొరత ఉన్న విద్యార్థులకు అదనపు ఆన్‌లైన్ లేదా ప్రత్యక్ష తరగతులు నిర్వహించడం.

• ఆన్‌లైన్ ట్రాకింగ్: వారానికి ఒకసారి హాజరు సమాచారాన్ని విద్యార్థులకు యాప్ లేదా ఆన్‌లైన్ ద్వారా చేరవేయడం.

• తల్లిదండ్రులకు సమాచారం: నెలకొకసారి హాజరు వివరాలు తల్లిదండ్రులకు చేరవేయడం ద్వారా అవగాహన పెంచడం.

• సౌకర్యవంతమైన విధానాలు: అనారోగ్యం, వ్యక్తిగత సమస్యలు వంటి సందర్భాల్లో సౌకర్యవంతమైన హాజరు మినహాయింపులు ఇవ్వడం.

• కౌన్సెలింగ్ సహాయం: హాజరు సమస్యల వల్ల ఒత్తిడికి లోనవుతున్న విద్యార్థులకు కౌన్సెలింగ్ అందించడం.