దేవ్‌జీ లొంగుబాటుతో మావోయిస్టు ఉద్యమానికి నాయకత్వం లేదు: డీజీపీ

నిషేధిత సీపీఐ (మావోయిస్ట్) పార్టీకి కంచుకోటగా ఉన్న తెలంగాణలో ఆ పార్టీ ఉనికి దాదాపు ముగిసిపోయిందని, ప్రస్తుతం ఆ సంస్థ నాయకత్వం లేక ఛిన్నాభిన్నమైందని రాష్ట్ర డీజీపీ బి. శివధర్ రెడ్డి మంగళవారం ప్రకటించారు. అగ్రనేత దేవ్‌జీ అలియాస్ తిప్పిరి తిరుపతితో పాటు మరో ముగ్గురు కీలక నేతల లొంగుబాటు సందర్భంగా ఏర్పాటు చేసిన మీడియా సమావేశంలో ఆయన ఈ వ్యాఖ్యలు చేశారు.

తెలంగాణలో బలంగా విస్తరించిన నక్సలైట్ ఉద్యమం ప్రస్తుతం చివరి దశకు చేరుకుందని అభిప్రాయపడ్డారు. దేవ్‌జీతో పాటు మరికొందరు సీనియర్ మావోయిస్టులు లొంగిపోవడం ఉద్యమంపై తీవ్రమైన ప్రభావాన్ని చూపిందని డీజీపీ తెలిపారు. దేవ్‌జీపై గతంలో కేంద్ర కమిటీ నాయకత్వ బాధ్యతలు వస్తాయని భావించినప్పటికీ, తీవ్ర పోలీసు ఒత్తిడి కారణంగా కమిటీ సమావేశం నిర్వహించలేకపోయినట్టు లొంగిపోయిన మావోయిస్టులు వెల్లడించారని ఆయన వివరించారు. కేంద్ర కమిటీ భేటీ జరగకపోవడంతో సంస్థకు జనరల్ సెక్రటరీని కూడా ఎన్నుకోలేదని, ప్రస్తుతం పార్టీకి స్పష్టమైన నాయకత్వం లేదని అన్నారు.

ఇటీవల కాలంలో మావోయిస్టు ఉద్యమానికి సంబంధించి కీలక పరిణామాలు చోటుచేసుకున్నాయని డీజీపీ చెప్పారు. గతంలో మావోయిస్టు ప్రధాన కార్యదర్శిగా పనిచేసిన నంబాల కేశవరావు అలియాస్ బసవరాజు 2025 మేలో ఛత్తీస్‌గఢ్ ప్రాంతంలో భద్రతా బలగాల చర్యల్లో మృతి చెందడంతో సంస్థ నాయకత్వం మరింత బలహీనపడిందని వివరించారు. ఆ తర్వాత నుంచి కేంద్ర స్థాయిలో సమన్వయం లోపించిందని, కొత్త నాయకత్వ నిర్మాణం జరగలేదని పేర్కొన్నారు.

తెలంగాణలో ముగిసిన అధ్యాయం

ప్రస్తుతం తెలంగాణకు చెందిన 11 మంది మావోయిస్టు క్యాడర్లు ఇంకా అజ్ఞాతంలో ఉన్నారని డీజీపీ వెల్లడించారు. వీరిలో ముప్పాల లక్ష్మణరావు అలియాస్ గణపతి కూడా ఉన్నారని తెలిపారు. అందుబాటులో ఉన్న సమాచారం ప్రకారం గణపతి అటవీ ప్రాంతంలో లేకపోవచ్చని, పట్టణ ప్రాంతం లేదా ఇతర చోట ఉండే అవకాశం ఉందని చెప్పారు. గణపతికి సన్నిహితంగా ఉన్న వ్యక్తుల ద్వారా పోలీస్ శాఖ సంప్రదింపులు ప్రారంభించిందని, ఆయన కూడా త్వరలో లొంగిపోతారని ఆశాభావం వ్యక్తం చేశారు. ఒకప్పుడు తెలంగాణలో ఉవ్వెత్తున సాగిన నక్సల్ ఉద్యమం ఇప్పుడు దాని చివరి అంకానికి చేరుకుందని డీజీపీ పేర్కొన్నారు.

మిగిలిన అజ్ఞాత మావోయిస్టు క్యాడర్లను హింసను వీడి సాధారణ జీవితంలోకి రావాలని తెలంగాణ పోలీస్ తరఫున డీజీపీ మరోసారి పిలుపునిచ్చారు. ప్రభుత్వంపై ఉన్న అపోహలు, భయాలను తొలగించి కుటుంబ సభ్యుల వద్దకు తిరిగి రావాలని సూచించారు. ప్రభుత్వం తమ పట్ల కఠినంగా వ్యవహరిస్తుందని భావించే మావోయిస్టుల మనోభావాలను మార్చేందుకు గత ఏడాది నుంచి ప్రత్యేక ప్రయత్నాలు చేస్తున్నామని ఆయన చెప్పారు.

తెలంగాణలో గత రెండు సంవత్సరాలుగా సాగుతున్న సానుకూల విధానాలు మావోయిస్టు ఉద్యమ బలహీనతకు కారణమయ్యాయి. పోలీసు శాఖ చేపట్టిన సంప్రదింపులు, కౌన్సెలింగ్ కార్యక్రమాల వల్ల 588 మంది మావోయిస్టు నేతలు, క్యాడర్లు ప్రధాన జీవన ప్రవాహంలోకి తిరిగి వచ్చారని తెలిపారు. లొంగుబాట్ల ప్రక్రియ ఒక్క వారంలో లేదా పది రోజుల్లో సాధ్యమైనది కాదని, దాదాపు ఏడాది పాటు వివిధ మార్గాల్లో సంప్రదింపులు కొనసాగించిన తర్వాతే ఇది సాధ్యమైందని డీజీపీ వివరించారు.

మావోయిస్టులపై చేపట్టిన వ్యూహం గురించి డీజీపీ మాట్లాడుతూ, కేంద్ర ప్రభుత్వం చేపట్టిన 'ఆపరేషన్ కాగర్' కొనసాగుతుండగా, అనుగుణంగా తెలంగాణలో “సాఫ్ట్ ఆపరేషన్” విధానాన్ని అనుసరిస్తున్నామని చెప్పారు. ఈ విధానం ద్వారా అటవీ ప్రాంతాల్లో విస్తృత దాడుల కంటే మానవీయ కోణంలో ప్రోత్సాహం ఇవ్వడం, లొంగుబాటు చేసే వారికి పునరావాస అవకాశాలు కల్పించడం ప్రధాన లక్ష్యంగా ఉందన్నారు. ఈ విధానం మంచి ఫలితాలు ఇస్తోందని, అందుకే కేంద్ర, రాష్ట్ర కమిటీ స్థాయి మావోయిస్టులు కూడా లొంగిపోతున్నారని తెలిపారు.

మావోయిస్టులు మళ్లీ సమూహంగా ఏర్పడుతున్నారనే ప్రచారంపై డీజీపీ స్పందిస్తూ, తనకు అందిన సమాచార ప్రకారం అలాంటి పునరుద్ధరణ సంకేతాలు లేవని చెప్పారు. కొంతమంది క్యాడర్లు పోలీసు కాంబింగ్ ఆపరేషన్ల నుంచి తప్పించుకోవడానికి ఒక ప్రాంతం నుంచి మరో ప్రాంతానికి మారుతున్నారనే అభిప్రాయం మాత్రమే ఉందన్నారు. తెలంగాణ ముఖ్యమంత్రి రేవంత్ రెడ్డి కూడా మిగిలిన అజ్ఞాత మావోయిస్టు సభ్యులకు హింసను విడిచిపెట్టి స్వగ్రామాలకు తిరిగి వచ్చి కుటుంబాలతో కలవాలని ఇప్పటికే పిలుపునిచ్చారని డీజీపీ గుర్తుచేశారు. అభివృద్ధి కార్యక్రమాల్లో భాగస్వామ్యం కావాలని, రాష్ట్ర ప్రగతికి తోడ్పడాలని ఆయన సూచించారని తెలిపారు.

మావోయిస్టులకు పునరావాస ప్రయోజనాలివే

దేవ్‌జీతో పాటు మరో కేంద్ర కమిటీ సభ్యుడు మల్లా రాజి రెడ్డి కూడా లొంగిపోయారు. వీరిపై రూ.25 లక్షల చొప్పున రివార్డు ఉండగా, రాష్ట్ర కమిటీ సభ్యులు బాడే చొక్కా రావు, నూనె నర్సింహా రెడ్డి రూ.20 లక్షల రివార్డుతో లొంగిపోయారని పోలీస్ శాఖ తెలిపింది. మొత్తం రూ.90 లక్షల రివార్డు మొత్తాన్ని రాష్ట్ర, కేంద్ర పునరావాస విధానాల ప్రకారం డిమాండ్ డ్రాఫ్ట్‌లు లేదా చెక్కుల రూపంలో అందజేసినట్టు అధికారులు వెల్లడించారు.

మావోయిస్టు ఉద్యమం గతంలో తెలంగాణలో బలంగా ప్రభావం చూపినప్పటికీ, ప్రస్తుతం భద్రతా బలగాల నిరంతర చర్యలు, సామాజిక పునరావాస కార్యక్రమాల కారణంగా ఉద్యమ విస్తరణ గణనీయంగా తగ్గిందని పోలీస్ వర్గాలు భావిస్తున్నాయి. అజ్ఞాతంలో ఉన్న మిగతా క్యాడర్లు కూడా త్వరలో ప్రధాన జీవన ప్రవాహంలోకి వస్తారని అధికారులు ఆశాభావం వ్యక్తం చేస్తున్నారు.