దుబాయ్ చేరుకున్న మంత్రి నారాయణ బృందం

రాష్ట్రానికి భారీ పెట్టుబడులను రాబట్టే లక్ష్యంతో దుబాయ్ పర్యటనను ప్రారంభించిన మున్సిపల్‌ పరిపాలన, పట్టణాభివృద్ధి శాఖ మంత్రి డా. పి. నారాయణ బృందం అక్కడి ప్రముఖ పారిశ్రామికవేత్తలతో వరుస సమావేశాలు జరపనున్నారు. ఈ పర్యటన నవంబర్ 6 వరకు జరగనుంది.

రాబోయే నవంబర్ 14, 15 తేదీల్లో విశాఖపట్నంలో జరగబోయే “గ్లోబల్ పార్ట్‌నర్‌షిప్ సదస్సు”కు అక్కడి పారిశ్రామికవేత్తలను ఆహ్వానించడమే ఈ పర్యటన ప్రధాన ఉద్దేశం.

పర్యటన వివరాలు

మొదటి రోజు మంత్రి నారాయణ ప్రముఖ రియల్ ఎస్టేట్ సంస్థ శోభా గ్రూప్ డైరెక్టర్ తో, హెల్త్ కేర్ రంగంలోని ఆస్టర్ గ్రూప్ ప్రతినిధులతో భేటీ అవుతారు. అలాగే కె ఇ ఎఫ్ హోల్డింగ్స్ చైర్మన్ తో, బుర్జిల్ హోల్డింగ్స్ ప్రతినిధులతో కూడా ఈ బృందం ప్రత్యేక సమావేశాలు నిర్వహించనున్నారు.

ఈ భేటీలలో మంత్రి నారాయణ రాష్ట్రంలో పెట్టుబడులకు అనుకూల వాతావరణం, ప్రభుత్వం రూపొందించిన సౌకర్యవంతమైన పాలసీలు, ఇన్‌ఫ్రాస్ట్రక్చర్, హెల్త్ కేర్, రియల్ ఎస్టేట్, మాన్యుఫాక్చరింగ్ రంగాల్లో ఉన్న అవకాశాలను వివరించనున్నారు.

దీనితో పాటు దుబాయ్ ఇండియన్ కాన్సులేట్ జనరల్ సతీష్ శివన్‌తో సమావేశమై, భారతీయ వ్యాపారవేత్తలతో సమన్వయం సాధించేందుకు చర్యలు చేపడతారు. రాష్ట్ర అభివృద్ధి దిశగా విదేశీ పెట్టుబడులను ఆకర్షించేందుకు ప్రతి అవకాశాన్ని సద్వినియోగం చేసుకుంటామని మంత్రి నారాయణ తెలిపారు.