దుబాయ్ ఎయిర్ షోలో కుప్పకూలిన తేజస్ యుద్ధ విమానం.. పైలట్ మృతి

ప్రతి రెండేళ్లకోసారి జరిగే ప్రతిష్టాత్మక దుబాయ్ ఎయిర్ షోలో శుక్రవారం తీవ్ర విషాదం చోటుచేసుకుంది. వైమానిక విన్యాసాల్లో పాల్గొన్న భారతీయ తేలికపాటి యుద్ధ విమానం (హెచ్ఏఎల్ తేజస్) అకస్మాత్తుగా నేలకూలింది. ఈ ప్రమాదంలో విమానం నడుపుతున్న పైలట్ మరణించినట్లు ఎక్స్ వేదికగా ఇండియన్ ఎయిర్ ఫోర్స్ అధికారికంగా ప్రకటించింది.

ప్రదర్శన సమయంలో ప్రమాదం

దుబాయ్ వరల్డ్ సెంటర్‌లోని అల్ మక్తూమ్ అంతర్జాతీయ విమానాశ్రయం వద్ద ఈ ఎయిర్ షో జరుగుతుండగా, స్థానిక కాలమానం ప్రకారం మధ్యాహ్నం 2:10 గంటల ప్రాంతంలో ఈ ప్రమాదం జరిగింది. వేలాది మంది ప్రేక్షకులు వీక్షిస్తుండగా, గాల్లో విన్యాసాలు (ఏరియల్ డిస్‌ప్లే) చేస్తున్న తేజస్ యుద్ధ విమానం అకస్మాత్తుగా నియంత్రణ కోల్పోయింది. కొద్ది నిమిషాల వ్యవధిలోనే అది నేలను ఢీకొట్టి, భారీ పేలుడుతో మంటల్లో చిక్కుకుంది. విమానం కూలిన వెంటనే ఆ ప్రాంతమంతా దట్టమైన నల్లటి పొగలు కమ్ముకున్నాయి. ఈ ఘోర ప్రమాదం కళ్లారా చూసిన ప్రేక్షకులు తీవ్ర భయాందోళనలకు గురయ్యారు.

ప్రమాదం జరిగిన వెంటనే ఎమర్జెన్సీ రెస్పాన్స్ టీమ్స్, దుబాయ్ ఫైర్ బ్రిగేడ్ బృందాలు హుటాహుటిన ఘటనా స్థలానికి చేరుకుని మంటలను అదుపు చేసే ప్రయత్నం చేశాయి. ముందు జాగ్రత్తగా ఎయిర్ షో కార్యక్రమాన్ని తాత్కాలికంగా నిలిపివేశారు.

పైలట్ మృతి

ప్రమాదం జరిగిన వెంటనే, పైలట్ సురక్షితంగా బయటకు దూకాడా లేదా అనే విషయంపై గందరగోళం నెలకొంది. అయితే తీవ్రత దృష్ట్యా పైలట్ బతికి ఉండే అవకాశం లేదని భావించారు. తాజాగా ఈ ప్రమాదంలో పైలట్ మరణించినట్లు భారత వైమానిక దళం ధృవీకరించింది. ప్రమాదానికి గల కారణాలు సాంకేతిక లోపమా? లేదా పైలట్ తప్పిదమా? అనే విషయంపై అధికారులు విచారణ జరిపి పూర్తి వివరాలను అధికారికంగా ప్రకటించాల్సి ఉంది.

తేజస్ యుద్ధ విమానం మొదటి టెస్ట్ ఫ్లైట్‌ను 2001లో పూర్తి చేసింది. దాని 23 సంవత్సరాల చరిత్రలో ఇది రెండోసారి ప్రమాదానికి గురైంది. గత ఏడాది మార్చిలో కూడా జైసల్మేర్ సమీపంలో ఒక తేజస్ కూలిపోయినప్పటికీ, ఆ సమయంలో పైలట్ సురక్షితంగా బయటపడ్డారు.

తేజస్ విమానం ప్రత్యేకతలు ఏంటి?

తేజస్ అనేది భారతదేశానికి ఒక ప్రతిష్టాత్మకమైన ప్రాజెక్ట్. ఇది పూర్తిగా స్వదేశీ పరిజ్ఞానంతో అభివృద్ధి చేసిన యుద్ధ విమానం. ఏరోనాటికల్ డెవలప్‌మెంట్ ఏజెన్సీ దీన్ని డిజైన్ చేయగా, హిందుస్థాన్ ఏరోనాటిక్స్ లిమిటెడ్ తయారు చేసింది. ఇది 4.5వ తరం, అన్ని వాతావరణాలకు అనువైన, మల్టీ రోల్ యుద్ధ విమానం.

ఎయిర్-టు-ఎయిర్ ఫైట్ (గాల్లో పోరాటం), భూమిపై దాడి చేసే మిషన్లు, సముద్ర కార్యకలాపాలను నిర్వహించగల సామర్థ్యం తేజస్‌కు ఉంది. దీనిలో అధునాతన ఏఈఎస్ఏ రాడార్, ఎలక్ట్రానిక్ వార్‌ఫేర్ సూట్, బియాండ్ విజువల్ రేంజ్ మిస్సైల్స్ వంటి అత్యాధునిక సాంకేతికతలు ఉన్నాయి. ప్రస్తుతం భారత వైమానిక దళంలో ఎంకే1 రకానికి చెందిన తేజస్ విమానాలు 'ఫ్లయింగ్ డాగర్స్' అనే 45వ స్క్వాడ్రన్‌లో సేవలు అందిస్తున్నాయి.