దళపతి విజయ్ వర్సెస్ బాబీ డియోల్ 'జన్ నేత' ధమాకా!

దళపతి విజయ్ నటిస్తున్న తాజా చిత్రం 'జన నాయగన్' హిందీ టైటిల్‌ను చిత్ర బృందం అధికారికంగా ప్రకటించింది. ఈ సినిమాను హిందీలో 'జన్ నేత' అనే పేరుతో విడుదల చేయబోతున్నారు.హిందీలో 'జన్ నేత' అంటే "ప్రజల నాయకుడు" అని అర్థం. విజయ్ రాజకీయ ప్రస్థానం నేపథ్యంలో, ఈ పొలిటికల్ టైటిల్ ఉత్తరాది ప్రేక్షకులను కూడా ఆకట్టుకునేలా భారీ వ్యూహంతో నిర్ణయించినట్లు తెలుస్తోంది.ఉత్తర భారత మార్కెట్‌లో ఈ చిత్రాన్ని జీ స్టూడియోస్ విడుదల చేయనుంది. సినిమా విడుదల తేదీగా 2026 జనవరి 9ను ఖరారు చేశారు.

ఈ సందర్భంగా దళపతి విజయ్‌తో పాటు నటుడు బాబీ డియోల్ కీలక పాత్రలో కనిపిస్తున్న కొత్త పోస్టర్‌ను కూడా విడుదల చేశారు. ఈ పోస్టర్‌లో విజయ్ శక్తివంతమైన లుక్‌లో, బాబీ డియోల్ తీవ్రతను ప్రతిబింబించే పాత్రలో దర్శనమివ్వడం ప్రేక్షకుల్లో ఆసక్తిని మరింత పెంచింది.విజయ్, బాలీవుడ్ నటుడు బాబీ డియోల్ కలిసి కనిపిస్తుండటంతో సినిమాపై అంచనాలు ఒక్కసారిగా పెరిగాయి.

ఈ చిత్రంలో బలమైన నటీనటుల బృందం కనిపించనుంది. హీరోయిన్‌గా పూజా హెగ్డే, మమిత బైజు, ప్రకాశ్ రాజ్, గౌతమ్ వాసుదేవ్ మీనన్, ప్రియమణి, నరైన్ వంటి ప్రముఖులు ముఖ్య పాత్రల్లో నటిస్తున్నారు. రాజకీయ నేపథ్యంతో రూపొందుతున్న ఈ చిత్రం సమకాలీన అంశాలను స్పృశిస్తూ, ప్రేక్షకులను ఆలోచింపజేసే కథనంతో ఉండనుందని సమాచారం. ఈ సినిమాకు దర్శకుడు హెచ్. వినోద్, నిర్మాణ బాధ్యతలను కేవీఎన్ ప్రొడక్షన్స్ నిర్వహిస్తోంది. సహ నిర్మాతలుగా జగదీశ్ పాలనిస్వామి, లోహిత్ ఎన్.కే. వ్యవహరిస్తున్నారు. సంగీతాన్ని యువ సంగీత దర్శకుడు అనిరుధ్ రవిచందర్ అందిస్తున్నారు.

మకర సంక్రాంతి , పొంగల్ పండుగల వీకెండ్కు అనుగుణంగా జనవరి 9న విడుదల కానున్న ఈ చిత్రం, దక్షిణ భారతంతో పాటు ఉత్తర భారత ప్రేక్షకులను కూడా ఆకట్టుకునే భారీ చిత్రంగా నిలవనుందని సినీ వర్గాలు భావిస్తున్నాయి.