దలైలామాకు ప్రతిష్టాత్మక గ్రామీ అవార్డు.. చైనా తీవ్ర అభ్యంతరం

ప్రపంచ ప్రసిద్ధ ఆధ్యాత్మిక గురువు, 90 ఏళ్ల దలైలామా తన జీవితంలో మొట్టమొదటిసారిగా గ్రామీ అవార్డును గెలుచుకున్నారు. "మెడిటేషన్స్ ది రిఫ్లెక్షన్స్ ఆఫ్ హిజ్ హోలీనెస్ ది దలైలామా" అనే ఆడియో ఆల్బమ్‌కు గాను 'బెస్ట్ ఆడియో బుక్' విభాగంలో ఆయనకు ఈ పురస్కారం దక్కింది. ఈ ఆల్బమ్‌లో ఆయన శాంతి, కరుణ, పర్యావరణం గురించి చెప్పిన మాటలను హిందుస్తానీ సంగీతంతో కలిపి అద్భుతంగా రూపొందించారు.

గ్రామీ వేదికపై దలైలామా సందేశం

ఈ అవార్డు రావడంపై దలైలామా స్పందిస్తూ, ఇది తన వ్యక్తిగత గౌరవం కాదని, ప్రపంచ శ్రేయస్సు కోసం మనం పడుతున్న సామూహిక తపనకు దక్కిన గుర్తింపు అని అన్నారు. తన తరఫున గాయకుడు రూఫస్ వైన్‌రైట్ ఈ అవార్డును అందుకున్నారు. ప్రపంచంలోని ఎనిమిది బిలియన్ల ప్రజల మధ్య సామరస్యం పెంపొందించడానికి ఈ పురస్కారం ఒక వారధిగా నిలుస్తుందని ఆయన ఆశాభావం వ్యక్తం చేశారు.

చైనా తీవ్ర అభ్యంతరం

టిబెట్ ఆధ్యాత్మిక గురువు దలైలామాకు ‘గ్రామీ’ అవార్డు దక్కడంపై చైనా తీవ్రస్థాయిలో విరుచుకుపడింది. దలైలామా మత గురువు కాదని, మతం ముసుగులో దేశ విభజనకు కుట్రలు పన్నుతున్న రాజకీయ బహిష్కృతుడని చైనా ఆరోపించింది. ఇటువంటి అంతర్జాతీయ వేదికలను చైనాకు వ్యతిరేకంగా విచ్ఛిన్నకర కార్యకలాపాలు సాగించేందుకు సాధనాలుగా వాడుకోవడాన్ని తాము ఖచ్చితంగా వ్యతిరేకిస్తామని ఆ దేశ విదేశాంగ శాఖ స్పష్టం చేసింది. ఈ గుర్తింపు ద్వారా దలైలామా తన ‘విచ్ఛిన్నకర ఎజెండా’ను ప్రచారం చేసే అవకాశం ఉందని చైనా మండిపడింది.

చరిత్ర సృష్టించిన స్టీవెన్ స్పీల్‌బర్గ్

ప్రముఖ హాలీవుడ్ దర్శకుడు స్టీవెన్ స్పీల్‌బర్గ్ ఈ ఏడాది గ్రామీ గెలుచుకోవడంతో ఒక అరుదైన రికార్డును సొంతం చేసుకున్నారు. అదే EGOT (Emmy, Grammy, Oscar, Tony) ఘనత. అంటే వినోద రంగంలోని నాలుగు అత్యున్నత పురస్కారాలను గెలుచుకున్న అతికొద్ది మంది ప్రముఖుల జాబితాలో ఆయన చేరారు. 'మ్యూజిక్ ఫర్ జాన్ విలియమ్స్' అనే చిత్రానికి గాను ఆయనకు ఈ పురస్కారం లభించింది.

కే-పాప్ సంగీత ప్రస్థానంలో కొత్త అధ్యాయం

ప్రపంచవ్యాప్తంగా యువతను ఊర్రూతలూగిస్తున్న కే-పాప్ (కొరియన్ పాప్) సంగీతం ఈసారి గ్రామీ వేదికపై చరిత్ర సృష్టించింది. “కే-పాప్ డీమన్ హంటర్స్” చిత్రంలోని ‘గోల్డెన్’ అనే పాటకు ఉత్తమ విజువల్ మీడియా సాంగ్ అవార్డు దక్కింది. కే-పాప్ కళాకారులు గ్రామీ అందుకోవడం ఇదే తొలిసారి. భాషతో సంబంధం లేకుండా సంగీతం అందరినీ ఎలా కలుపుతుందో ఈ విజయం నిరూపించింది.

తొలిసారి అవార్డులు అందుకున్న కళాకారులు

ఈ ఏడాది గ్రామీ వేడుకల్లో కొత్త తరం కళాకారుల హవా ఎక్కువగా కనిపించింది. FKA ట్విగ్స్ తన తొలి గ్రామీని అందుకుని, ఈ విభాగంలో అవార్డు గెలిచిన రెండో నల్లజాతి మహిళగా రికార్డు సృష్టించారు. అలాగే యంగ్‌బ్లడ్, టర్న్‌స్టైల్ వంటి బ్యాండ్‌లు కూడా తమ మొదటి గ్రామీ పురస్కారాలను గెలుచుకుని ఆనందాన్ని పంచుకున్నారు.

వలసదారుల పక్షాన గళమెత్తిన కళాకారులు

ఈసారి అవార్డు వేడుక కేవలం సంగీతానికే పరిమితం కాలేదు. అప్పటి రాజకీయ పరిస్థితులు, ముఖ్యంగా వలసదారులపై ప్రభుత్వ కఠిన చర్యలకు నిరసనగా పలువురు కళాకారులు గళమెత్తారు. షబూజీ, కెహ్లానీ వంటి వారు స్టేజ్ పైన నిరసన వ్యక్తం చేస్తూ, ఈ దేశాన్ని నిర్మించింది వలసదారులేనని భావోద్వేగంగా మాట్లాడారు. మొత్తానికి 2026 గ్రామీ అవార్డుల వేడుక ఆధ్యాత్మికత, సామాజిక బాధ్యత, కళాత్మకత కలబోతగా సాగింది. 86 విభాగాల్లో అవార్డులను ప్రధానం చేసిన ఈ కార్యక్రమం, కొత్త వారికి ప్రేరణగా నిలిచింది. కేవలం పాటలకే కాకుండా, విలువైన సందేశాలకు, సామాజిక మార్పుకు కూడా సంగీతం ఒక సాధనమని ఈ వేడుక మరోసారి చాటిచెప్పింది.

గ్రామీ అవార్డు గురించి..

గ్రామీ అవార్డు అనేది సంగీత రంగంలో అత్యున్నత గౌరవంగా భావించే అంతర్జాతీయ పురస్కారం. ఉత్తమ గాయకులు, సంగీతకారులు, ఆల్బమ్‌లు, పాటలు, సంగీత సాంకేతిక నిపుణులను ప్రోత్సహించేందుకు ఈ అవార్డును ఇస్తారు. సంగీతంలో ప్రతిభ, నాణ్యత, సృజనాత్మకతకు గుర్తింపుగా గ్రామీ అవార్డు ప్రదానం చేస్తారు. 1959లో అమెరికాలోని రికార్డింగ్ అకాడమీ ఈ అవార్డును ప్రారంభించింది. టెలివిజన్ అవార్డులకు ఎమీలున్నట్లే, సంగీతానికి కూడా ఒక ప్రతిష్ఠాత్మక అవార్డు ఉండాలనే ఉద్దేశంతో గ్రామీ అవార్డులు ప్రారంభమయ్యాయి.

గ్రామీ అవార్డులు అందుకున్న భారతీయులు

భారతీయ శాస్త్రీయ సంగీత దిగ్గజం పండిట్ రవిశంకర్ అత్యధికంగా 5 సార్లు గ్రామీ గెలుచుకోగా, ఏ.ఆర్. రెహమాన్ రెండు అవార్డులు సాధించారు. తబలా విద్వాంసుడు జాకీర్ హుస్సేన్ 2024లో మూడు అవార్డులతో కలిపి అత్యధిక గ్రామీలు అందుకున్నారు. రికీ కేజ్ మూడుసార్లు విజేతగా నిలిచారు. శంకర్ మహదేవన్, రాకేష్ చౌరాసియా, వి. సెల్వగణేష్ 2024లో 'శక్తి' బ్యాండ్ ద్వారా అవార్డులు సాధించగా, చంద్రికా టాండన్ 2025లో తన 'త్రివేణి' ఆల్బమ్‌కు అవార్డు అందుకున్నారు. తన్వీ షా గ్రామీ గెలిచిన తొలి భారతీయ మహిళగా చరిత్ర సృష్టించారు. విశ్వమోహన్ భట్, వినాయక్‌రామ్, నీలా వాస్వాని కూడా ఈ గౌరవాన్ని పొందారు. జుబిన్ మెహతా 18 సార్లు నామినేట్ అయ్యి రికార్డు సృష్టించారు.