దక్షిణాది రాష్ట్రాలకు.. కుల గణనతోనే సామాజిక న్యాయం: డిప్యూటీ సీఎం భట్టి విక్రమార్క

రవీంద్రభారతి వేదికగా నిర్వహించిన మహాత్మా జ్యోతిరావు పూలే 200వ జయంతి వేడుకల్లో ఉప ముఖ్యమంత్రి భట్టి విక్రమార్క పాల్గొన్నారు. ఈ సందర్భంగా ఆయన దేశంలో సామాజిక న్యాయం, నిధుల కేటాయింపు, నియోజకవర్గాల పునర్విభజనపై సంచలన వ్యాఖ్యలు చేశారు.

సంఘటనలో మాట్లాడుతూ కుల గణనను పరిగణనలోకి తీసుకోకుండా కేవలం 2011 జనాభా లెక్కల ఆధారంగానే నియోజకవర్గాల పునర్విభజన చేపడితే దక్షిణాది రాష్ట్రాల ఉనికి ప్రమాదంలో పడుతుందని ఉప ముఖ్యమంత్రి హెచ్చరించారు. కేంద్రం దక్షిణాది రాష్ట్రాల పట్ల చూపిస్తున్న వివక్షను ఆయన గణాంకాలతో వివరించారు. సామాజిక మార్పులో ముందున్న దక్షిణాది రాష్ట్రాలను బలహీనపరిచేందుకు పన్నుల వాటాను తగ్గించారని ఆరోపించారు.

తెలంగాణ ఒక రూపాయి కేంద్రానికి ఇస్తే కేవలం రూ.0.37 మాత్రమే తిరిగి వస్తోందని, తమిళనాడుకు రూ.0.29, కేరళకు రూ.0.61 మాత్రమే వస్తుండగా, బీహార్‌కు రూ.6.53, ఉత్తరప్రదేశ్‌కు రూ.2.17 వస్తున్నాయని వివరించారు. ఈ అంశాలు కాంగ్రెస్ వర్కింగ్ కమిటీ సమావేశంలో చర్చకు వచ్చాయని తెలిపారు. దేశవ్యాప్తంగా బలహీన వర్గాలకు నష్టం జరుగకుండా కుల గణనను తప్పనిసరిగా పరిగణనలోకి తీసుకోవాలని ఆయన కోరారు. ప్రజలు తమ హక్కుల కోసం పోరాడాల్సిన అవసరం ఉందని పిలుపునిచ్చారు. రాష్ట్రంలో ఫ్యూడల్ శక్తులను తిరిగి తీసుకురావడానికి ప్రయత్నాలు జరుగుతున్నాయని ఆరోపిస్తూ, బహుజనులు ఏకమై ప్రజాస్వామ్య ప్రభుత్వాన్ని రక్షించాలని సూచించారు.

రాష్ట్ర ప్రభుత్వం ప్రజల అవసరాలను దృష్టిలో పెట్టుకుని పెద్ద మొత్తంలో నిధులను కేటాయిస్తోందని తెలిపారు. ఎస్సీ, ఎస్టీ సబ్‌ప్లాన్‌ల తరహాలో బీసీ సబ్‌ప్లాన్ అమలుపై ప్రభుత్వం సానుకూలంగా ఉందని చెప్పారు. జనాభా ప్రాతిపదికన నిధుల పంపిణీ జరిగితేనే సమాన సమాజం ఏర్పడుతుందని అభిప్రాయపడ్డారు. కులం భారతదేశంలో ఒక వాస్తవమని పేర్కొంటూ, రాహుల్ గాంధీ ఇచ్చిన హామీ మేరకు తెలంగాణలో కుల సర్వే నిర్వహించామని తెలిపారు. ఈ సర్వేలో 56శాతం బీసీ జనాభా గుర్తించబడిందని చెప్పారు. బ్రిటిష్ కాలం తర్వాత ఇలాంటి సర్వే నిర్వహించిన ఏకైక రాష్ట్రం తెలంగాణ అని పేర్కొన్నారు.

ఈ నేపథ్యంలో స్థానిక సంస్థలు, విద్య, ఉద్యోగాల్లో 42శాతం బీసీ రిజర్వేషన్లకు రాష్ట్ర అసెంబ్లీ తీర్మానం ఆమోదించినట్లు తెలిపారు. అయితే బిల్లు ప్రస్తుతం కేంద్రం వద్ద పెండింగ్‌లో ఉందని, ఆమోదం వచ్చిన వెంటనే అమలు చేస్తామని స్పష్టం చేశారు. ముఖ్యమంత్రి రేవంత్ రెడ్డి నేతృత్వంలోని కేబినెట్ సామాజిక నిబద్ధతతో పాలన సాగిస్తోందని, ఫూలే ఆశయాలను అమలు చేస్తోందని చెప్పారు. ఫూలే కుల, లింగ వివక్షకు వ్యతిరేకంగా పోరాడి సామాజిక సంస్కర్తగా నిలిచారని గుర్తుచేశారు.

విద్య సమాన సమాజ నిర్మాణానికి ప్రధాన సాధనమని పేర్కొంటూ, మహిళలకు విద్య అందించడానికి ఫూలే చేసిన కృషిని వివరించారు. అదే స్ఫూర్తితో ప్రభుత్వం యంగ్ ఇండియా ఇంటిగ్రేటెడ్ రెసిడెన్షియల్ స్కూళ్లను ఏర్పాటు చేస్తోందని తెలిపారు. విద్యార్థుల సంక్షేమం కోసం డైట్ ఛార్జీలను 40శాతం, కాస్మెటిక్ ఛార్జీలను 200శాతం పెంచినట్లు చెప్పారు. జూన్ 2 నుంచి 20 లక్షల మందికి బ్రేక్‌ఫాస్ట్ పథకం అమలు చేస్తామని తెలిపారు. ప్రతి నియోజకవర్గంలో రూ.15 కోట్లతో తెలంగాణ పబ్లిక్ స్కూళ్లను ఏర్పాటు చేయనున్నట్లు ఆయ‌న వెల్లడించారు.

బడ్జెట్‌లో 13.5శాతం విద్యకు కేటాయించడం ద్వారా ప్రభుత్వం సమానత్వంపై తన నిబద్ధతను చాటుకుందని చెప్పారు. స్వాభిమాన భవనాల నిర్మాణం, వృత్తి ఆధారిత కులాల వారికి ఉచిత విద్యుత్ వంటి పథకాల ద్వారా సామాజిక న్యాయం సాధించేందుకు ప్రభుత్వం కట్టుబడి ఉందని ఆయ‌న తెలిపారు.