థాయ్-కంబోడియా సరిహద్దులో సైనిక ఘర్షణలు.. 10 మంది మృతి
ఆగ్నేయాసియా దేశాలైన థాయ్లాండ్, కంబోడియా మధ్య శతాబ్దాల నాటి సరిహద్దు వివాదం మళ్లీ తీవ్ర రూపం దాల్చింది. ఇటీవల డిసెంబర్ 7 (ఆదివారం) రాత్రి ప్రారంభమైన ఈ ఘర్షణలు మూడో రోజూ కూడా కొనసాగాయి. ఈ యుద్ధ వాతావరణం వల్ల సరిహద్దు ప్రాంతాల నుంచి లక్షల మంది పౌరులు తమ ఇళ్లను వదిలి సురక్షిత శిబిరాలకు తరలిపోతున్నారు.
ఎందుకు మొదలైంది?
గత జూలైలో ఇరు దేశాల మధ్య జరిగిన ఐదు రోజుల ఘర్షణ తర్వాత, అమెరికా అధ్యక్షుడు డొనాల్డ్ ట్రంప్ మధ్యవర్తిత్వంతో కాల్పుల విరమణ ఒప్పందం కుదిరింది. అయితే ఆ ఒప్పందం అమలులో లోపాలు ఉన్నాయి. సరిహద్దులో ల్యాండ్మైన్ల విషయంలో ఇరు దేశాలు పరస్పరం ఆరోపణలు చేసుకున్నాయి. కంబోడియా ప్రధానంగా థాయ్లాండ్పై 18 మంది తమ సైనికులను యుద్ధ ఖైదీలుగా ఉంచుకుందని ఆరోపిస్తోంది. థాయ్లాండ్ మాత్రం వివాదాస్పద ప్రాంతాల్లో కంబోడియా కొత్తగా ల్యాండ్మైన్లను అమర్చుతోందని, వీటి పేలుళ్ల వల్ల తమ సైనికులకు గాయాలు అవుతున్నాయని ఆరోపిస్తూ, క్షమాపణ చెప్పే వరకు శాంతి ఒప్పందాన్ని తాత్కాలికంగా నిలిపివేస్తున్నట్లు ప్రకటించింది. ఈ నేపథ్యంలో ఆదివారం రాత్రి కాల్పులు మొదలయ్యాయి.
ఇరు దేశాల ప్రతిస్పందన
తాజా ఘర్షణల్లో ముగ్గురు థాయ్ సైనికులు మరణించగా, కంబోడియా వైపు ఏడుగురు పౌరులు ప్రాణాలు కోల్పోయారు, 20 మంది గాయపడ్డారు. కంబోడియా మాజీ ప్రధాని, సెనేట్ అధ్యక్షుడు హున్ సేన్ థాయ్లాండ్పై తీవ్ర పోరాటం చేస్తామని శపథం చేశారు. తమ భూభాగాన్ని రక్షించుకోవడానికి, శత్రు బలగాలను బలహీనపరచడానికి ప్రతిదాడులు చేస్తామని ఆయన ప్రకటించారు. తమ వైపు నుంచే మొదట కాల్పులు జరిగాయనే ఆరోపణలను కంబోడియా ఖండించింది.
థాయ్ ప్రధాని అనుటిన్ చార్న్విరాకుల్ మాట్లాడుతూ, సరిహద్దు ఘర్షణలను ఆపడానికి కంబోడియా తమను సంప్రదించలేదని, దేశ సార్వభౌమాధికారం కోసం సైనిక కార్యకలాపాలను కొనసాగించడానికి తమ ప్రభుత్వం మద్దతు ఇస్తుందని తెలిపారు. తమ సైనిక స్థావరాలను లక్ష్యంగా చేసుకుని కంబోడియా ఫిరంగి, రాకెట్, డ్రోన్ దాడులు చేసిందని థాయ్ సైన్యం ఆరోపించింది.
సురక్షిత ప్రాంతాలకు ప్రజలు
ఈ ఘర్షణల వల్ల సరిహద్దు ప్రాంతాల్లో నివసిస్తున్న సామాన్య పౌరుల జీవితాలు తీవ్రంగా దెబ్బతిన్నాయి. థాయ్లాండ్ సరిహద్దు రాష్ట్రాల్లో దాదాపు 1,25,000 మందికి పైగా ప్రజల కోసం సుమారు 500 తాత్కాలిక శిబిరాలను ఏర్పాటు చేసింది. ప్రజలు భయం భయంగా తమ ఇళ్లను వదిలి సురక్షిత ప్రాంతాలకు పరుగులు తీస్తున్నారు. కంబోడియా వైపు కూడా దాదాపు 55,000 మందికి పైగా ప్రజలను సురక్షిత ప్రాంతాలకు తరలించారు. ఫ్యాక్టరీలలో పనిచేసేవారు, రైతులు.. ఇలా అన్ని వర్గాల ప్రజలు పేలుడు శబ్దాలకు భయపడి ఆశ్రయ కేంద్రాలకు వెళ్లారు.
ఐక్యరాజ్యసమితి ఆందోళన
ఈ సరిహద్దు ఘర్షణలపై ఐక్యరాజ్యసమితి ప్రధాన కార్యదర్శి అంటోనియో గుటెర్రెస్ ఆందోళన వ్యక్తం చేశారు. ఇరు పక్షాలు సంయమనం పాటించాలని, కాల్పుల విరమణకు కట్టుబడి ఉండాలని కోరారు. శాశ్వత పరిష్కారం కోసం చర్చలు జరపాలని, ఐరాస శాంతి, స్థిరత్వ ప్రయత్నాలకు మద్దతు ఇవ్వడానికి సిద్ధంగా ఉందని ఆయన ప్రకటించారు.