త్వరలో ప్రభుత్వ ఉద్యోగ ఖాళీలన్నీ భర్తీ చేస్తాం: సీఎం రేవంత్ రెడ్డి

తెలంగాణలో త్వరలోనే మరిన్ని ప్రభుత్వ ఉద్యోగాల భర్తీ చేపడతామని ముఖ్యమంత్రి ఏ. రేవంత్ రెడ్డి ప్రకటించారు. ప్రతిపక్షాల తప్పుడు ప్రచారాలను నమ్మి నిరుద్యోగ యువత మోసపోవద్దని ఆయన విజ్ఞప్తి చేశారు. శుక్రవారం హైదరాబాద్‌లో తెలంగాణ రాష్ట్ర పబ్లిక్ సర్వీస్ కమిషన్ (టీజీపీఎస్సీ) గ్రూప్, 3 ఎంపికైన 1,370 మంది అభ్యర్థులకు నియామక పత్రాలు అందజేసిన అనంతరం సీఎం ఈ వ్యాఖ్యలు చేశారు.

బీఆర్ఎస్ పార్టీ తన పదేళ్ల పాలనలో నిరుద్యోగ యువతను మోసం చేసిందని ఆయన ఆరోపించారు. మాజీ ముఖ్యమంత్రి కేసీఆర్ తన రాజకీయ జీవితం, కుటుంబం, పార్టీ ప్రయోజనాలకే అధిక ప్రాధాన్యం ఇచ్చారని, ప్రభుత్వ ఉద్యోగాల భర్తీని పూర్తిగా నిర్లక్ష్యం చేశారని విమర్శించారు. మునుపటి పాలకులకు మొదటి ప్రాధాన్యం కుటుంబం, రెండోది పార్టీ, మూడోది రాజకీయ భవిష్యత్. ప్రజల అవసరాలు వారికి పట్టలేదు అని రేవంత్ రెడ్డి వ్యాఖ్యానించారు.

ఉద్యోగాలు ఇవ్వడంలో విఫలమైన బీఆర్ఎస్ ప్రభుత్వానికి వ్యతిరేకంగా నిరుద్యోగ యువత తిరుగుబాటు చేసి కాంగ్రెస్ ప్రభుత్వాన్ని ఎన్నుకుందని సీఎం చెప్పారు. 2023లో అధికారంలోకి వచ్చిన తర్వాత టీజీపీఎస్సీని సమూలంగా సంస్కరించామని, మంచి ట్రాక్ రికార్డ్ ఉన్న వారిని కమిషన్ సభ్యులుగా నియమించామని తెలిపారు.

ప్రతిపక్షాలు కోర్టుల్లో పిటిషన్లు దాఖలు చేసి అడ్డంకులు సృష్టించినప్పటికీ గ్రూప్–1, 2, 3 పోస్టులను పారదర్శకంగా భర్తీ చేశామని సీఎం చెప్పారు. గత బీఆర్ఎస్ ప్రభుత్వం పరీక్ష పేపర్ లీకుల వల్ల పోటీ పరీక్షలు సక్రమంగా నిర్వహించలేకపోయిందని ఆరోపించారు. యూపీఎస్సీ విధానాలను అధ్యయనం చేసి టీజీపీఎస్సీని పునరుద్ధరించామని, కేవలం రెండు సంవత్సరాల్లోనే దాదాపు 70 వేల ప్రభుత్వ ఉద్యోగాలను భర్తీ చేశామని వెల్లడించారు.

ఉస్మానియా యూనివర్సిటీ, అశోక్‌నగర్ ప్రాంతాల్లో నిరుద్యోగుల ఆందోళనలపై తనకు అవగాహన ఉందని, ఖాళీల భర్తీ కోసం నిరంతరం ఉద్యోగ నోటిఫికేషన్లు జారీ చేస్తామని సీఎం హామీ ఇచ్చారు. ఇదే సందర్భంలో ప్రభుత్వ ఉద్యోగులు తమ తల్లిదండ్రులను నిర్లక్ష్యం చేస్తే చర్యలు తప్పవని హెచ్చరించారు. తల్లిదండ్రులను పట్టించుకోని ఉద్యోగుల జీతంలో నుంచి 10 నుంచి 15 శాతం నేరుగా వారి తల్లిదండ్రుల ఖాతాల్లో జమ చేస్తామని చెప్పారు. తల్లిదండ్రులను చూసుకోని వారు మానవులే కారు అని ఘాటుగా వ్యాఖ్యానించారు.

నాణ్యమైన విద్య, పోషకాహారం, నైపుణ్యాభివృద్ధి అత్యంత కీలకమని సీఎం రేవంత్ రెడ్డి పేర్కొన్నారు. నైపుణ్యాల కొరత వల్ల విద్యార్థులు అంతర్జాతీయ స్థాయిలో పోటీ పడలేకపోతున్నారని, ఈ దిశగా ప్రభుత్వం ఇప్పటికే చర్యలు తీసుకుంటోందని తెలిపారు. 2047 నాటికి దేశాన్ని 3 ట్రిలియన్ డాలర్ల ఆర్థిక వ్యవస్థగా తీర్చిదిద్దాలనే లక్ష్యంలో ప్రభుత్వ ఉద్యోగుల పాత్ర కూడా కీలకమని సీఎం పేర్కొన్నారు.