త్వ‌ర‌లోనే భార‌త్‌తో వాణిజ్య ఒప్పందం: ట్రంప్‌

భారత్-అమెరికా మధ్య చాలా కాలంగా పెండింగ్‌లో ఉన్న వాణిజ్య ఒప్పందం త్వరలోనే ఖరారవుతుందని, దీనిపై అతి త్వరలో సంతకాలు జరగనున్నాయని అమెరికా అధ్యక్షుడు డొనాల్డ్ ట్రంప్ బుధవారం స్పష్టం చేశారు. తన ఆసియా పర్యటనలో భాగంగా దక్షిణ కొరియాలో జరిగిన ఒక కార్యక్రమంలో ఆయన ఈ కీలక వ్యాఖ్యలు చేశారు. ట్రంప్ తాజా ప్రకటనతో ప్రపంచంలోని రెండు అతిపెద్ద ఆర్థిక వ్యవస్థల మధ్య సంబంధాలు మరింత బలోపేతం కావడం లాంఛనమేనని తెలుస్తోంది.

మోడీపై ట్రంప్ ప్రశంసలు

ట్రంప్ ప్రధాని నరేంద్ర మోడీపై ప్రత్యేకంగా ప్రశంసలు కురిపించారు. "నేను భారత్‌తో వాణిజ్య ఒప్పందం చేసుకుంటున్నాను. ప్రధాని నరేంద్ర మోడీ అంటే నాకు ఎంతో గౌరవం, ప్రేమ ఉన్నాయి. మా మధ్య గొప్ప సంబంధం ఉంది" అని ఆయన పేర్కొన్నారు. అయితే ట్రంప్ మోదీని పొగుడుతూనే "ప్రధాని మోడీ చాలా అందంగా కనిపించే వ్యక్తి.. కానీ చాలా కఠినుడు" అని వ్యాఖ్యానించారు. "ఆయన లాంటి తండ్రి ఉండాలని చాలామంది కోరుకుంటారు. ఆయన బలమైన నాయకుడు" అని ట్రంప్ కొనియాడారు.

టారిఫ్‌ల తగ్గింపు

రష్యా-ఉక్రెయిన్ యుద్ధం నేపథ్యంలో భారత్ రష్యా నుంచి చమురు కొనుగోలు చేయడం, టారిఫ్‌లకు సంబంధించిన వివాదాల కారణంగా గతంలో వాణిజ్య చర్చలు నిలిచిపోయాయి. ఇటీవల భారత్ రష్యా నుంచి చమురు కొనుగోళ్లను తగ్గించుకోవడానికి అంగీకరించడంతో, భారత్ వస్తువులపై విధిస్తున్న 50 శాతం టారిఫ్‌ను 16 శాతానికి తగ్గించడానికి అమెరికా అంగీకరించినట్లు వార్తలు వచ్చాయి. ఈ ఒప్పందంలో భాగంగా భారతదేశం అమెరికన్ జన్యుమార్పిడి చేయని మొక్కజొన్న, సోయామీల్ దిగుమతులను పెంచేందుకు అంగీకరించే అవకాశం ఉంది.

కాల్పుల విరమణ ఘనత నాదే: ట్రంప్

ఈ సందర్భంగా ట్రంప్ మరోసారి భారత్-పాకిస్థాన్ మధ్య మే 10న జరిగిన కాల్పుల విరమణ ఘనతను తన ఖాతాలో వేసుకున్నారు. "ఆ రెండు అణు దేశాలు తీవ్రంగా ఘర్షణ పడుతున్నాయి. ఏడు విమానాలు కూలిపోయాయని వార్తలు చూశాను. నేను వెంటనే ప్రధాని మోడీకి ఫోన్ చేసి, ‘మీరు పాకిస్థాన్‌తో యుద్ధం ప్రారంభిస్తే, మేం మీతో వాణిజ్య ఒప్పందం చేసుకోలేం’ అని చెప్పాను" అని ట్రంప్ వివరించారు.

"నేను ఫోన్ చేసిన రెండు రోజుల తర్వాత వారే ఫోన్ చేసి మేము అర్థం చేసుకున్నామని మోడీ అన్నారు. రెండు రోజుల తర్వాత యుద్ధం మానేశారు. ఇది అద్భుతం కాదా? బైడెన్ ఎప్పుడైనా ఇలా చేశాడా? నేను అనుకోను" అంటూ ట్రంప్ తన వ్యాఖ్యలను ముగించారు.

భారత వైఖరి ట్రంప్ ఈ వాదనను గతంలో అనేకసార్లు చేసినప్పటికీ, భారత్ మాత్రం దీనిని ఖండించింది. ఈ కాల్పుల విరమణ భారత్-పాక్ మధ్య ద్వైపాక్షిక చర్చలు, అంతర్జాతీయ మద్దతు వల్లనే సాధ్యమైందని భారత్ స్పష్టం చేసింది. ఈ విషయంలో ఎటువంటి విదేశీ నాయకుడి జోక్యం లేదని పేర్కొంది.

రాజకీయ, ఆర్థిక ప్రభావం

ట్రంప్ తాజా ప్రకటనలు రెండు దేశాల మధ్య వాణిజ్య సంబంధాలు కొత్త దశకు చేరుకోవడానికి సంకేతంగా నిలుస్తున్నాయి. ఈ ఒప్పందం కుదిరితే, భారతీయ వస్తువులపై టారిఫ్‌లు భారీగా తగ్గడంతో టెక్స్‌టైల్స్, ఫార్మా వంటి భారతీయ ఎగుమతులకు అమెరికా మార్కెట్ మరింత విస్తరిస్తుంది. రష్యన్ చమురు దిగుమతులు తగ్గించుకోవడం ద్వారా భారత్-అమెరికా మధ్య వ్యూహాత్మక సంబంధాలు మరింత బలోపేతమవుతాయని విశ్లేషకులు అంచనా వేస్తున్నారు. ట్రంప్ ఆసియా పర్యటన (మలేసియా, జపాన్, దక్షిణ కొరియా)లో ప్రధాని మోడీపై పదేపదే ప్రశంసలు కురిపించడం, రాబోయే ఒప్పందంలో మోడీతో ఉన్న బలమైన సంబంధం కీలక పాత్ర పోషించనుందని సూచిస్తుంది.

ఎవరికి లాభం, ఎవరికి నష్టం?

భారత్-అమెరికా వాణిజ్య ఒప్పందం వల్ల ఇరు దేశాలకు లాభాలు, నష్టాలు, ఎక్కువ ప్రయోజనం పొందే అవకాశం ఎవరికి ఉందో కొందరు రాజకీయ విశ్లేషకులు వివరించారు. అదేమిటంటే..

లాభాలు

భారత్: అమెరికా సుంకాలు (టారిఫ్‌లు) 50% నుంచి 16%కి తగ్గితే, భారతీయ వస్త్రాలు, ఫార్మాస్యూటికల్స్, తోలు ఉత్పత్తుల వంటి వాటి ఎగుమతులు పెరిగి, వేలాది ఉద్యోగాలు సృష్టించబడతాయి. అమెరికా: అమెరికా మొక్కజొన్న, సోయామీల్ వంటి వ్యవసాయ ఉత్పత్తులకు భారత మార్కెట్‌లో ఎక్కువ ప్రవేశం లభిస్తుంది.

నష్టాలు

భారత్: జన్యుమార్పిడి ఉత్పత్తులు, పాల ఉత్పత్తులపై సుంకాలు తగ్గిస్తే, తక్కువ ధరకే అమెరికన్ ఉత్పత్తులు భారత మార్కెట్‌ను ముంచెత్తి, దేశీయ రైతులు, పాడి పరిశ్రమ తీవ్రంగా దెబ్బతినే ప్రమాదం ఉంది. అమెరికా: ఒప్పందంపై సంతకాలు చేయకుంటే, 50% సుంకం కొనసాగి, అమెరికన్ కంపెనీలకు భారత మార్కెట్ కష్టమవుతుంది.

ఎక్కువ ప్రయోజనం ఎవరికి?

ఈ ఒప్పందం ద్వైపాక్షికంగా పరస్పర ప్రయోజనాలను దృష్టిలో ఉంచుకుని రూపొందించబడుతున్నప్పటికీ, అమెరికా తన ఉత్పత్తులకు భారత మార్కెట్‌లో ప్రవేశం కోసం ఒత్తిడి చేస్తోంది. భారత ప్రభుత్వం తమ రైతుల ప్రయోజనాలు, ఆహార భద్రతకు అధిక ప్రాధాన్యత ఇస్తూ, తమకు అనుకూలంగా ఉండేలా చర్చల్లో పట్టుబడితే భారత్‌కే ఎక్కువ దీర్ఘకాలిక ప్రయోజనం ఉండే అవకాశం ఉంది.