తైవాన్పై జపాన్ జోక్యం..చైనా హెచ్చరిక
తైవాన్పై ఏదైనా సంక్షోభంలో జపాన్ సైనికంగా జోక్యం చేసుకోవచ్చని కొత్త ప్రధానమంత్రి సనే తకాయిచి చేసిన వ్యాఖ్యలు బీజింగ్లో మంటలు పుట్టించాయి. జపాన్ నాయకత్వం చెప్పకూడని మాటలు చెప్పింది. రెడ్ లైన్ ను దాటింది అంటూ చైనా విదేశాంగ మంత్రి వాంగ్ యీ తీవ్రంగా ప్రతిస్పందించారు. జపాన్ ప్రధాని చేసిన వ్యాఖ్యలు దిగ్భ్రాంతికరమైనవి అని చైనా విదేశాంగ మంత్రిత్వ శాఖ వెబ్సైట్లో పోస్ట్ చేశారు. తకాయిచి ఈ నెల ప్రారంభంలో చైనా తైవాన్ను సముద్ర నిర్బంధం చేయాలన్నా, దాడి చేయాలన్నాఅది జపాన్ స్పందించాల్సిన పరిస్థితి అవుతుందని వ్యాఖ్యానించారు. ఇదే అంశాన్ని పట్టుకున్న చైనా ఇది సైనిక జోక్య సంకేతం షాకింగ్ విషయం అని మండిపడింది.
వాంగ్ యీ ఘాటు హెచ్చరిక
జపాన్ ప్రస్తుత నాయకులు తైవాన్ విషయంలో సైనిక జోక్యానికి ప్రయత్నిస్తామని బహిరంగంగా తప్పుడు సంకేతాలను పంపడం, వారు మాట్లాడకూడని విషయాలు మాట్లాడటం, రెడ్ లైన్ ను దాటడం వివాదస్పద విషయంగా వాంగ్ పేర్కోన్నారు.
ఇప్పటివరకు ఉద్రిక్తతలను పరిష్కరించిన అత్యంత సీనియర్ చైనా అధికారి అయిన వాంగ్, జపాన్ చర్యలకు చైనా దృఢంగా స్పందిస్తుంది. జపాన్ సైనికవాదం తిరిగి పుంజుకోకుండా నిరోధించాల్సిన బాధ్యత అన్ని దేశాలపై ఉందని అన్నారు. ఆ దేశ మిలిటరిజం మళ్లీ పెరగకుండా ప్రపంచ దేశాలందరూ బాధ్యత వహించాలి. వారి చర్యలకు మేం ఖచ్చితంగా ప్రత్యుత్తరం ఇస్తామన్నారు. తకాయిచి వ్యాఖ్యలు కొన్ని వారాలుగా రెండు దేశాల మధ్య ఉద్రిక్తతలకు దారితీశాయి. ఆమె అంతర్జాతీయ చట్టాన్ని, దౌత్య నిబంధనలను తీవ్రంగా ఉల్లంఘించారని విమర్శిస్తూ బీజింగ్ శుక్రవారం యూఎన్ సెక్రటరీ జనరల్ ఆంటోనియో గుటెర్రెస్కు ఒక లేఖ రాసింది.
యుఎన్లో చైనా రాయబారి ఫూ కాంగ్
జపాన్ క్రాస్-స్ట్రెయిట్ పరిస్థితిలో సాయుధ జోక్యానికి ప్రయత్నించడానికి ధైర్యం చేస్తే, అది దురాక్రమణ చర్య అవుతుందని చైనా యూఎన్ రాయబారి ఫు కాంగ్ ఆ లేఖలో రాశారు. చైనా యూఎన్ చార్టర్, అంతర్జాతీయ చట్టం ప్రకారం తన ఆత్మరక్షణ హక్కును దృఢంగా వినియోగించుకుంటుంది. దాని సార్వభౌమత్వాన్ని, ప్రాదేశిక సమగ్రతను దృఢంగా కాపాడుకుంటుందని తెలిపారు.
తైవాన్ మిత్ర దేశాలపై చైనా అసహనం
జపాన్కు చెందిన ఒకప్పటి కాలనీ అయిన తైవాన్ను బీజింగ్ తన సొంత భూభాగంగా భావిస్తోంది. అవసరమైతే బలవంతంగా స్వాధీనం చేసుకోవచ్చు. తైవాన్లో ఇతర దేశాలు ముఖ్యంగా ఆ ద్వీపం ప్రధాన ఆయుధాల సరఫరాదారు అయిన అమెరికా, అలాగే జపాన్, ఫిలిప్పీన్స్తో సహా ఆసియాలోని దేశాలు తైవాన్కు మద్దతు ఇవ్వడంపై బీజింగ్ అసహనం వ్యక్తం చేస్తోంది.
తకాయిచి వైఖరి మునుపటి జపాన్ ప్రధానుల కంటే మరింత బలంగా కనిపిస్తుంది. వారు తైవాన్కు చైనా ముప్పు గురించి ఆందోళన వ్యక్తం చేశారు. కానీ జపాన్ ఎలా స్పందిస్తుందో బహిరంగంగా చెప్పలేదు. ప్రధానమంత్రి తరువాత తన వ్యాఖ్యలను ఉపసంహరించుకోవడానికి నిరాకరించారు. కానీ భవిష్యత్తులో నిర్దిష్ట పరిస్థితుల గురించి మాట్లాడకుండా ఉంటానని చెప్పారు.