తెలంగాణలో బీజేపీ స్థానిక సంస్థల ఎన్నికలే లక్ష్యంగా ఎంపీల ఐక్య కార్యాచరణ

తెలంగాణలో భారతీయ జనతా పార్టీని క్షేత్రస్థాయిలో బలోపేతం చేసేందుకు రాబోయే స్థానిక సంస్థల ఎన్నికల్లో విజయకేతనం ఎగురవేసేందుకు ఆ పార్టీ ఎంపీలు నడుం బిగించారు. ముఖ్యంగా గ్రేటర్ హైదరాబాద్ మున్సిపల్ కార్పొరేషన్ (జీహెచ్‌ఎంసీ) ఎన్నికలు సహా అన్ని స్థానిక జిడ్పీటీసీ సంస్థల ఎన్నికల్లో విజయం సాధించేందుకు ప్రత్యేక వ్యూహంతో ముందుకు వెళ్లాలని తెలంగాణ బీజేపీ ఎంపీలు నిర్ణయించారు. ఈ మేరకు ఢిల్లీలో కేంద్ర బొగ్గు శాఖ మంత్రి, తెలంగాణ బీజేపీ నేత గంగాపురం కిషన్ రెడ్డి నివాసంలో సమావేశమయ్యారు.

ఈ సమావేశం ప్రాధాన్యతను సంతరించుకుంది. ఇటీవల దక్షిణ భారత రాష్ట్రాల బీజేపీ ఎంపీలతో జరిగిన సమావేశంలో ప్రధానమంత్రి నరేంద్ర మోదీ తెలంగాణలో పార్టీ పనితీరుపై అసంతృప్తి వ్యక్తం చేశారనే వార్తల నేపథ్యంలో ఈ భేటీ జరిగింది.పార్టీ పనితీరులో లోపాలున్నాయని, ఇకనైనా “షేప్ అప్” కావాలని మోదీ సూచించినట్లు మీడియా కథనాలు పేర్కొన్నాయి.

బీజేపీ వర్గాల సమాచారం ప్రకారం, కేంద్ర ప్రభుత్వ పథకాలను మరింత సమర్థంగా ప్రజల్లోకి తీసుకెళ్లడం, రాష్ట్ర అధ్యక్షుడు ఎన్. రాంచందర్ రావు మార్గదర్శకత్వంలో సమన్వయంతో పనిచేయడం వంటి అంశాలపై ఎంపీలు చర్చించారు. జీహెచ్‌ఎంసీ ఎన్నికలతో పాటు మున్సిపాలిటీలు, గ్రామీణ స్థానిక సంస్థలు, జిల్లా పరిషత్ టెరిటోరియల్ కన్‌స్టిట్యుయెన్సీలు (జిడ్పీటీసీలు) వంటి ఎన్నికల్లో పార్టీ విజయానికి ప్రత్యేక కార్యాచరణ అమలు చేయాలని తీర్మానించారు. ఈ సమావేశంలో కిషన్ రెడ్డితో పాటు కేంద్ర హోంశాఖ సహాయ మంత్రి బండి సంజయ్ కుమార్, ఎంపీలు ఈటల రాజేందర్, డీకే అరుణ, ధర్మపురి అరవింద్, ఎం. రఘునందన్ రావు, కొండా విశ్వేశ్వర్ రెడ్డి, గోదం నగేశ్, ఆర్. కృష్ణయ్య తదితరులు పాల్గొన్నారు.

మీడియా కథనాల ప్రకారం, గత వారం దక్షిణ రాష్ట్రాల ఎంపీలతో జరిగిన సమావేశంలో ప్రధాని మోదీ 1984లో బీజేపీ తరఫున గెలిచిన ఇద్దరు ఎంపీల్లో ఒకరు తెలంగాణ నుంచే ఉన్నారని గుర్తు చేశారు.అయితే ఆ తర్వాత వచ్చిన అవకాశాలను రాష్ట్ర నాయకత్వం సద్వినియోగం చేసుకోలేదని, పార్టీని సరైన దిశలో ముందుకు తీసుకెళ్లడంలో విఫలమైందని ఆయన వ్యాఖ్యానించినట్లు సమాచారం.

అలాగే, 2023 తెలంగాణ అసెంబ్లీ ఎన్నికల్లో ఓటమి తర్వాత కూడా కాంగ్రెస్ ప్రభుత్వం పట్ల ప్రధాన ప్రతిపక్షంగా బీజేపీ తనను తాను స్థిరపరచుకోలేకపోయిందన్న అసంతృప్తి కూడా ప్రధాని వ్యక్తం చేసినట్లు కథనాలు వెల్లడించాయి. ఇటీవల జరిగిన జూబ్లీహిల్స్ అసెంబ్లీ ఉపఎన్నికలో బీజేపీ డిపాజిట్ కోల్పోవడం, 2024లో జరిగిన సికింద్రాబాద్ కంటోన్మెంట్ ఉపఎన్నికలో ఓటమి వంటి అంశాలు కూడా ఈ అసంతృప్తికి కారణాలుగా పేర్కొనబడుతున్నాయి. అయితే, 2024 లోక్‌సభ ఎన్నికల్లో తెలంగాణలోని 17 స్థానాల్లో 8 స్థానాలను బీజేపీ గెలుచుకోవడం గమనార్హం.ఈ పరిస్థితుల నేపథ్యంలో, రానున్న స్థానిక సంస్థల ఎన్నికలను ప్రతిష్టాత్మకంగా తీసుకుని, పార్టీని బలోపేతం చేయడమే లక్ష్యంగా తెలంగాణ బీజేపీ ఎంపీలు సమిష్టి ప్రయత్నాలకు సిద్ధమయ్యారు.