తెలంగాణలో అంతర్జాతీయ ప్రమాణాల రోడ్లు నిర్మాణం కోసం రూ.10,547 కోట్లు
తెలంగాణ రాష్ట్ర రోడ్ల నెట్వర్క్ను అంతర్జాతీయ ప్రమాణాలకు అనుగుణంగా తీర్చిదిద్దేందుకు రాష్ట్ర ప్రభుత్వం సిద్ధమైంది. ఇందులో భాగంగా హైబ్రిడ్ యాన్యుటీ మోడల్ కింద రోడ్ల నిర్మాణ పనులను చేపట్టనుంది. ఈ ప్రతిష్టాత్మక ప్రాజెక్టులకు సంబంధించిన టెండర్లను గురువారం, అక్టోబర్ 22న ఆహ్వానించనున్నట్లు ప్రభుత్వం ప్రకటించింది.
రోడ్లు, భవనాల (ఆర్&బి) శాఖ ఈ నిర్మాణ పనులను పర్యవేక్షించనుంది. గత మంత్రివర్గ సమావేశంలో ఆమోదం పొందిన రోడ్లకు సంబంధించి ప్రభుత్వం జీవో (ప్రభుత్వ ఉత్తర్వు)ను విడుదల చేసింది. ఈ జీవో ప్రకారం, మొత్తం 5,566.15 కిలోమీటర్ల మేర రోడ్ల నిర్మాణం చేపట్టనున్నారు. దీనికి అంచనా వ్యయం రూ.10,547.38 కోట్లుగా నిర్ణయించబడింది.
32 ప్యాకేజీలలో పనులు అమలు
ఈ ప్రాజెక్టుల అమలు రాష్ట్రవ్యాప్తంగా వివిధ దశల్లో చేపడతారు. మొత్తం 32 ప్యాకేజీలలో రోడ్ల పనులను అమలు చేయాలని ఆర్&బి శాఖ నిర్ణయించింది. ఈ 32 ప్యాకేజీలకు గాను, మొదటి దశ టెండర్ నోటిఫికేషన్ను పూర్తి చేయనున్నారు.
రోడ్లు, భవనాల శాఖ మంత్రి కోమటిరెడ్డి వెంకట్ రెడ్డి ఈ సందర్భంగా మాట్లాడుతూ, కాంగ్రెస్ ప్రభుత్వం ప్రపంచ స్థాయి మౌలిక సదుపాయాలు సమర్థవంతమైన కనెక్టివిటీకి కట్టుబడి ఉందని పేర్కొన్నారు. ఈ చారిత్రక చర్యతో, త్వరలోనే తెలంగాణ రోడ్లు దేశానికే ఒక ఆదర్శంగా నిలుస్తాయని మంత్రి ధీమా వ్యక్తం చేశారు. హెచ్ఏఎమ్ విధానం ద్వారా రోడ్ల నాణ్యత, నిర్వహణ దీర్ఘకాలికంగా మెరుగ్గా ఉంటాయని ప్రభుత్వం ఆశిస్తోంది. ఈ భారీ ప్రాజెక్ట్ రాష్ట్ర ఆర్థిక అభివృద్ధికి, మెరుగైన రవాణా సౌకర్యాలకు దోహదపడుతుందని మంత్రి తెలిపారు. పట్టణ, గ్రామీణ మార్గాలు అంతర్జాతీయ ప్రమాణాలకి అనుగుణంగా రూపాంతరం చెందుతాయి. రవాణా సౌలభ్యం పెంపుతో పాటు వ్యాపార వృద్ధి, పరిశ్రమల అభివృద్ధికి కూడా ఈ ప్రాజెక్ట్ దోహదపడనుందని మంత్రి సూచించారు.ప్రభుత్వం ఆందోళన రహిత సురక్షిత అంతర్జాతీయ స్థాయి రోడ్ల నిర్మాణం ద్వారా తెలంగాణను రోడ్ల మోడల్ రాష్ట్రంగా మార్చే దిశగా కృషి చేస్తోంది అని మంత్రి కోమటిరెడ్డి చెప్పారు.