తూర్పు సముద్రంలోకి ఉత్తర కొరియా క్షిపణుల ప్రయోగం

ఉత్తర కొరియా మరోసారి క్షిపణి ప్రయోగాలతో ప్రపంచ దేశాలను ఉలిక్కిపడేలా చేసింది. కొరియా ద్వీపకల్పం, జపాన్ మధ్య ఉన్న సముద్ర తీరంలోకి మంగళవారం వరుసగా బాలిస్టిక్ క్షిపణులను ప్రయోగించి ఉద్రిక్తతలను పెంచింది. ఈ ప్రయోగాలతో అటు దక్షిణ కొరియా, ఇటు జపాన్ దేశాలు ఒక్కసారిగా ఉలిక్కిపడ్డాయి.

350 కిలోమీటర్ల దూరం ప్రయాణం

దక్షిణ కొరియా సైన్యం తెలిపిన వివరాల ప్రకారం, ఉత్తర కొరియా రాజధాని ప్యోంగ్యాంగ్‌కు ఈశాన్య ప్రాంతం నుండి ఈ క్షిపణులు నింగిలోకి ఎగిశాయి. ఇవి సుమారు 350 కిలోమీటర్ల దూరం ప్రయాణించి సముద్రంలో పడిపోయాయి. ఉత్తర కొరియా ఏ క్షణంలోనైనా దాడికి దిగే అవకాశం ఉందన్న అనుమానంతో దక్షిణ కొరియా, జపాన్ నిఘా వ్యవస్థలు హైఅలెర్ట్ ప్రకటించాయి.

జపాన్ తీవ్ర ఆగ్రహం

ఈ క్షిపణి ప్రయోగాలపై జపాన్ రక్షణ మంత్రిత్వ శాఖ తీవ్రంగా స్పందించింది. "ఉత్తర కొరియా చర్యలు జపాన్‌కే కాకుండా అంతర్జాతీయ శాంతికి ముప్పుగా పరిణమించాయి" అని హెచ్చరించింది. తమ సముద్ర జలాలకు సమీపంలో ఇలాంటి ప్రయోగాలు చేయడం ఏమాత్రం ఆమోదయోగ్యం కాదని, పొరుగు దేశాల భద్రతను ఉత్తర కొరియా గాలికొదిలేసిందని జపాన్ ఖండించింది.

దీటుగా సమాధానం ఇచ్చేందుకు సిద్ధం: ద.కొరియా

ఉత్తర కొరియా ఎన్ని కవ్వింపు చర్యలకు దిగినా, తాము దీటుగా సమాధానం ఇచ్చేందుకు సిద్ధంగా ఉన్నామని దక్షిణ కొరియా సైన్యం ప్రకటించింది. సరిహద్దుల్లో నిఘాను మరింత పెంచామని, అమెరికాతో కలిసి ఎప్పటికప్పుడు పరిస్థితిని సమీక్షిస్తున్నామని తెలిపింది. కిమ్ సైన్యం ఎలాంటి సాహసం చేసినా వెనక్కి తగ్గమని స్పష్టం చేసింది.

జనవరి తర్వాత మళ్లీ ఇప్పుడే..

ఈ ఏడాది జనవరిలో హైపర్ సోనిక్ క్షిపణులను పరీక్షించిన ఉత్తర కొరియా, మళ్లీ ఇన్నాళ్లకు మంగళవారం నాడు బాలిస్టిక్ మిసైళ్లను ప్రయోగించింది. గత డిసెంబర్‌లో కూడా అణ్వాయుధ సామర్థ్యం ఉన్న జలాంతర్గాములను, యాంటీ-ఎయిర్ క్షిపణులను ప్రదర్శించి తన సైనిక బలాన్ని ప్రపంచానికి చాటిచెప్పింది. ఇప్పుడు మళ్లీ అదే దూకుడు ప్రదర్శిస్తోంది.

చర్చల విఫలమే అసలు కారణం?

2019లో అమెరికాతో జరిగిన చర్చలు విఫలమైనప్పటి నుండి ఉత్తర కొరియా అధ్యక్షుడు కిమ్ జోంగ్ ఉన్ దూకుడు పెంచారు. తన దగ్గర ఎక్కువ ఆయుధాలు ఉంటేనే అమెరికా వంటి దేశాలు తన దారిలోకి వస్తాయని, అప్పుడే తనకు అనుకూలమైన ఒప్పందాలు కుదుర్చుకోవచ్చని కిమ్ భావిస్తున్నట్లు రాజకీయ విశ్లేషకులు చెబుతున్నారు.

పార్టీ మహాసభల ముందు ప్రచార యత్నం?

వచ్చే ఫిబ్రవరిలో ఉత్తర కొరియాలో 'వర్కర్స్ పార్టీ కాంగ్రెస్' అనే కీలక సమావేశం జరగనుంది. ఐదేళ్లకోసారి జరిగే ఈ మహాసభలో కిమ్ తన తర్వాతి ఐదేళ్ల ప్రణాళికను ప్రకటిస్తారు. ఆ సభకు ముందే ప్రజల్లో దేశభక్తిని నింపడానికి, తన సైనిక శక్తిని గొప్పగా చూపించుకోవడానికి కిమ్ ఈ క్షిపణి ప్రయోగాలు చేస్తున్నట్లు తెలుస్తోంది.

డ్రోన్ ఆరోపణలతో ముదురుతున్న గొడవ

దక్షిణ కొరియా తన భూభాగంలోకి నిఘా డ్రోన్లను పంపిస్తోందని ఉత్తర కొరియా ఇటీవల ఆరోపించింది. దీనిపై ప్రతీకారం తీర్చుకుంటామని కూడా హెచ్చరించింది. దక్షిణ కొరియా ఈ ఆరోపణలను కొట్టిపారేసినప్పటికీ, కిమ్ మాత్రం ఈ విషయాన్ని సాకుగా చూపి సరిహద్దుల్లో ఉద్రిక్తతలను పెంచుతున్నారు. దీనివల్ల కొరియా ద్వీపకల్పంలో ఎప్పుడు ఏం జరుగుతుందోనన్న ఆందోళన నెలకొంది .