తూత్తుకుడిలో భారీ నౌకానిర్మాణ క్లస్టర్

తమిళనాడులోని తూత్తుకుడి తీరంలో భారతదేశపు సముద్రయాన రంగాన్ని సరికొత్త శిఖరాలకు తీసుకెళ్లే దిశగా ఒక కీలక ముందడుగు పడింది. వీఓ చిదంబరనార్ పోర్ట్ అథారిటీ, తమిళనాడు ప్రభుత్వానికి చెందిన ‘సిప్‌కాట్’ సంస్థతో కలిసి ఒక భారీ నౌకానిర్మాణ క్లస్టర్‌ను ఏర్పాటు చేయడానికి సిద్ధమైంది. ఈ ప్రాజెక్టును అమలు చేయడానికి 'నేషనల్ షిప్‌బిల్డింగ్ & హెవీ ఇండస్ట్రీస్ పార్క్, తమిళనాడు' అనే పేరుతో 50:50 భాగస్వామ్యంతో ఒక ప్రత్యేక ప్రయోజన వాహనాన్ని అధికారికంగా ఏర్పాటు చేశారు.

ఈ ప్రతిష్టాత్మక ప్రాజెక్టుకు పునాది సెప్టెంబర్ 2025లో కేంద్ర ఓడరేవులు, షిప్పింగ్ జలమార్గాల శాఖ మంత్రి శర్బానంద సోనోవాల్ సమక్షంలో కుదిరిన అవగాహన ఒప్పందం ద్వారా పడింది. ఈ జాయింట్ వెంచర్ ప్రధానంగా భారతదేశ వాణిజ్య నౌకల తయారీ మరమ్మతు సామర్థ్యాన్ని అంతర్జాతీయ స్థాయికి పెంచడమే లక్ష్యంగా పెట్టుకుంది. కేంద్ర ప్రభుత్వం ప్రతిపాదించిన 'షిప్‌బిల్డింగ్ డెవలప్‌మెంట్ స్కీమ్' మద్దతుతో, ఈ క్లస్టర్ అత్యాధునిక సాంకేతిక పరిజ్ఞానాన్ని మౌలిక సదుపాయాలను వినియోగించుకోనుంది.

ఆర్థికంగా, పారిశ్రామికంగా ఈ ప్రాజెక్టు దక్షిణ భారతదేశానికి పెను మార్పులను తీసుకురానుంది. వీఓ చిదంబరనార్ పోర్ట్ అథారిటీ చైర్మన్ సుశాంత కుమార్ పురోహిత్ ఈ పరిణామాన్ని ఒక "చారిత్రాత్మక మైలురాయి"గా అభివర్ణించారు. ఈ క్లస్టర్ ద్వారా కేవలం ఓడల తయారీ మాత్రమే కాకుండా, భారీ పరిశ్రమలకు అవసరమైన విడిభాగాల తయారీ అనుబంధ సేవల రంగం కూడా అభివృద్ధి చెందుతుంది. ఇది స్థానికంగా భారీగా పెట్టుబడులను ఆకర్షించడంతో పాటు వేలాది మందికి ఉపాధి అవకాశాలను కల్పిస్తుందని అంచనా వేస్తున్నారు.

భారతదేశంలోని 12 ప్రధాన ఓడరేవులలో ఒకటైన వీఓసీ పోర్ట్, ఇప్పటికే కంటైనర్లు, బల్క్ కార్గో హ్యాండ్లింగ్‌లో కీలక పాత్ర పోషిస్తోంది. ఈ కొత్త షిప్‌బిల్డింగ్ పార్క్ ఏర్పాటుతో, తూత్తుకుడి నగరం గ్లోబల్ మారిటైమ్ మ్యాప్‌లో ఒక ప్రధాన కేంద్రంగా అవతరించనుంది. దేశీయంగా నౌకల తయారీ పెరగడం వల్ల విదేశీ మారక ద్రవ్యం ఆదా అవ్వడమే కాకుండా, 'మేక్ ఇన్ ఇండియా' లక్ష్యాలకు ఇది గొప్ప ఊతాన్ని ఇస్తుంది.

తూత్తుకుడి నౌకానిర్మాణ క్లస్టర్ - ఆర్థిక, ఉత్పత్తి వివరాలు

ఈ మెగా షిప్‌బిల్డింగ్ క్లస్టర్ సుమారు రూ.30,000 కోట్ల భారీ పెట్టుబడితో తూత్తుకుడిలో రూపుదిద్దుకోనుంది. ఇందులో భాగంగా కొచ్చిన్ షిప్‌యార్డ్, మజగాన్ డాక్ వంటి ప్రభుత్వ రంగ దిగ్గజాలు ఒక్కొక్కటి రూ.15,000 కోట్ల చొప్పున పెట్టుబడులు పెట్టనున్నాయి. సుమారు 2,000 ఎకరాల విస్తీర్ణంలో ఏర్పాటు కాబోతున్న ఈ ప్రాజెక్టుకు కేంద్ర ప్రభుత్వం ఇటీవల ప్రకటించిన రూ.19,989 కోట్ల 'షిప్‌బిల్డింగ్ డెవలప్‌మెంట్ స్కీమ్' కింద ఆర్థికప్రోత్సాహకాలు, మద్దతు లభిస్తాయి.

ఉత్పత్తి సామర్థ్యం పరంగా చూస్తే, ఈ క్లస్టర్ భారతదేశాన్ని ప్రపంచ నౌకానిర్మాణ రంగంలో అగ్రస్థానానికి చేర్చనుంది. ఏడాదికి సుమారు 1.2 మిలియన్ గ్రాస్ టన్నేజ్ సామర్థ్యంతో ఓడలను తయారు చేయడం ఇక్కడి ప్రధాన లక్ష్యం. తొలి పదేళ్లలో కనీసం 0.5 మిలియన్ గ్రాస్ టన్నేజ్ ఉత్పత్తిని సాధించాలని ప్రణాళికలు సిద్ధం చేశారు. ఇక్కడ కేవలం కొత్త నౌకల తయారీ మాత్రమే కాకుండా, అంతర్జాతీయ స్థాయి మరమ్మతు సౌకర్యాలు కూడా అందుబాటులోకి రానున్నాయి.

ఆర్థికంగా ఈ ప్రాజెక్టు తమిళనాడు రాష్ట్రానికి, దేశానికి భారీ రాబడిని తీసుకురానుంది. ఈ క్లస్టర్ ద్వారా సుమారు 55,000 మందికి (నేరుగా, పరోక్షంగా) ఉపాధి లభిస్తుందని అంచనా. స్థానికంగా ఉక్కు, పెయింట్, ఎలక్ట్రికల్ వంటి అనుబంధ పరిశ్రమలు వృద్ధి చెందడం ద్వారా రాష్ట్ర ప్రభుత్వానికి భారీగా పన్నుల ఆదాయం సమకూరుతుంది. అంతేకాకుండా, స్వదేశీ తయారీ వల్ల విదేశీ నౌకల కొనుగోలుపై ఖర్చయ్యే వేల కోట్ల రూపాయల విదేశీ మారక ద్రవ్యం ఆదా అవుతుంది.

తూత్తుకుడి భౌగోళిక ప్రాముఖ్యత

తూత్తుకుడిని "ముత్యాల నగరం" అని పిలుస్తారు. ఇది అంతర్జాతీయ నౌకాయాన మార్గాలకు చాలా దగ్గరగా ఉండటం దీనికి అతిపెద్ద ప్లస్ పాయింట్. ఇది తూర్పు-పశ్చిమ అంతర్జాతీయ సముద్ర మార్గాలకు సమీపంలో ఉంది, దీనివల్ల ఓడలు మరమ్మతుల కోసం లేదా కొత్త నౌకల డెలివరీ కోసం ఇక్కడికి రావడం సులభం. ఇక్కడ రోడ్డు, రైలు, విమాన మార్గాలు మెరుగ్గా ఉండటంతో భారీ యంత్రాల రవాణాకు అనుకూలంగా ఉంటుంది.

ఒక 'క్లస్టర్' అంటే కేవలం ఒక ఫ్యాక్టరీ మాత్రమే కాదు, అది ఒక పెద్ద పారిశ్రామిక నగరం లాంటిది. అందులో భారీ ఓడలను నీటి నుండి పైకి లేపి మరమ్మతులు చేయడానికి ఉపయోగించే డ్రై డాక్స్ వంటి నిర్మాణాలు ఉంటాయి. ఓడ విడిభాగాలను అమర్చే పెద్ద యూనిట్లు. నౌకల డిజైనింగ్ కోసం ఇంజనీరింగ్ కార్యాలయాలు, అనుబంధ పరిశ్రమలుగా ఉక్కు, పెయింట్, ఎలక్ట్రికల్ వైరింగ్, ఇంజిన్ విడిభాగాలను తయారు చేసే చిన్న, మధ్యతరహా పరిశ్రమలు చుట్టుపక్కల ఏర్పాటవుతాయి.