తుఫాన్ ప్రభావిత ప్రాంతాల్లో నేడు జగన్ పర్యటన
మోంతా తుఫాన్ బీభత్సంతో నష్టపోయిన రైతులను పరామర్శించేందుకు మాజీ ముఖ్యమంత్రి, వైఎస్సార్సీపీ అధ్యక్షుడు వైఎస్ జగన్ మోహన్ రెడ్డి మంగళవారం క్రిష్ణా జిల్లాలో పర్యటించనున్నారు. పార్టీ కేంద్ర కార్యాలయం విడుదల చేసిన షెడ్యూల్ ప్రకారం ఉదయం 9.30కి తాడేపల్లి నుంచి బయలుదేరి, పెనమలూరు సెంటర్–ఉయ్యూరు బైపాస్–పామర్రు బైపాస్ మార్గంగా గుడూరుకు చేరుకుంటారు. అక్కడ తుఫాన్ వల్ల దెబ్బతిన్న పంట పొలాలను పరిశీలించి, రైతులతో ప్రత్యక్షంగా మాట్లాడనున్నారు. అనంతరం అవనిగడ్డ హైవే మార్గంలో తిరిగి తాడేపల్లికి చేరుకుంటారు.
తుఫాన్ నిర్వహణపై సీఎం చంద్రబాబుపై జగన్ తీవ్రమైన వ్యాఖ్యలు చేశారు. చంద్రబాబు మాటలు వాస్తవ పరిస్థితులకు దూరంగా ఉన్నాయన్నారు. నిజమైన విపత్తు నిర్వహణ అంటే ఫోటోలకు ఫోజులివ్వడం, కెమెరాలు, ప్రచార ఆర్భాటాలు కాదని, పేద కుటుంబాలను రక్షించడం, రైతులను కష్టాల నుంచి కాపాడటం అని ఆయన చెప్పారు. రైతులకు శ్రీరామ రక్షగా నిలిచిన ఉచిత పంటల బీమా పథకాన్ని చంద్రబాబు నాయుడు రద్దు చేశారు. జీవనాధారాన్ని కత్తిరించి రైతులను వదిలివేయడం మీ సుపరిపాలనకు నిర్వచనమా?" అని ఆయన ప్రశ్నించారు.
వైసీపీ పాలనలో రైతులకు ఉచిత పంట బీమా, ఈ–క్రాప్ సిస్టమ్, ఇన్పుట్ సబ్సిడీ, రైతు భరోసా కేంద్రాలు , ధర స్థిరీకరణ నిధి వంటి పలు విప్లవాత్మక సంస్కరణలు అమలయ్యాయని గుర్తుచేశారు.అప్పుడు 84.8 లక్షల మంది రైతులకు బీమా ఉండేది. ఇప్పుడు కేవలం 19 లక్షల మందే ప్రీమియం చెల్లించి బీమా పొందుతున్నారు. మిగతావారిని ఎవరూ పట్టించుకోవడం లేదని జగన్ ఆగ్రహం వ్యక్తం చేశారు.
ఈ సంక్షోభంలో మిగిలిన రైతులను ఎవరు రక్షిస్తారు? ఉచిత పంటల బీమా విధానం కొనసాగి ఉంటే, నేడు ప్రతి రైతుకు భద్రత ఉండేది అని ఆయన అన్నారు. నాయుడు పాలనలో కేవలం 18 నెలల్లో, రైతులు దాదాపు 16 సార్లు ప్రతికూల వాతావరణ పరిస్థితులను ఎదుర్కొన్నారని, అయినప్పటికీ ఒక్క రూపాయి కూడా పరిహారంగా చెల్లించలేదని ఆయన గుర్తు చేశారు. రూ.600 కోట్ల బకాయిలు ఇప్పటికీ చెల్లించలేదు. రైతులను మోసం చేసి, అన్నదాత సుఖీభవ పథకంలో రూ.40,000 వాగ్దానం చేసి రూ.5,000 మాత్రమే ఇచ్చారు. ఇది పాలనా ప్రణాళికా? లేక మోసమా?’’ అని ఆయన నిలదీశారు. తుఫాన్లో ఎనిమిది మంది ప్రాణాలు కోల్పోవడాన్ని ప్రస్తావిస్తూ అన్ని బాగానే నిర్వహించామని చెబితే, ఆ ప్రాణనష్టం ఎలా జరిగింది? అని ప్రశ్నించారు. నిజమైన పాలన అనేది రైతును రక్షించే పాలన అని వైఎస్సార్సీపీ నేత స్పష్టం చేశారు.