తిరుప్పరన్కుండ్రం వివాదం: తమిళనాడు బీజేపీ చీఫ్తో సహా 113 మందిపై కేసు
తమిళనాడులో మదురై జిల్లాలోని తిరుప్పరన్కుండ్రం కొండపై దీపం వెలిగించే విషయంలో తలెత్తిన వివాదం చివరకు రాజకీయ, న్యాయపరమైన రగడకు దారితీసింది. మద్రాస్ హైకోర్టు ఆదేశాలు ఉన్నప్పటికీ, దీపం వెలిగించడానికి ప్రయత్నించినందుకు బీజేపీ రాష్ట్ర అధ్యక్షుడు నైనార్ నాగేంద్రన్ సహా 113 మందిపై పోలీసులు కేసు నమోదు చేశారు.
తిరుప్పరన్కుండ్రం కొండపై ఉన్న దీప స్తంభంపై కార్తీక దీపాన్ని వెలిగించాలని మద్రాస్ హైకోర్టు మదురై బెంచ్ సింగిల్ జడ్జి ఆదేశించింది. అలాగే ఈ ప్రాంతంలో విధించిన సెక్షన్ 144 నిషేధాజ్ఞలను కూడా కోర్టు రద్దు చేసింది. కోర్టు ఆదేశాలతో బీజేపీ రాష్ట్ర అధ్యక్షుడు నైనార్ నాగేంద్రన్, సీనియర్ నాయకుడు హెచ్. రాజా, హిందూ మున్నాని కార్యకర్తలతో సహా పలువురు గురువారం కొండపైకి వెళ్లడానికి ప్రయత్నించారు.
అయితే, కోర్టు ఆదేశాలు ఉన్నప్పటికీ, పోలీసులు వారిని కొండపైకి అనుమతించలేదు. హైకోర్టు ఆదేశాలపై తమిళనాడు ప్రభుత్వం సుప్రీంకోర్టులో అప్పీల్ చేయడానికి సిద్ధమవుతోందని పోలీసులు వారికి స్పష్టం చేశారు. నాయకులు అక్కడి నుంచి వెళ్లడానికి నిరాకరించడంతో నైనార్ నాగేంద్రన్, హెచ్. రాజా సహా 300 మందికి పైగా నిరసనకారులను పోలీసులు అదుపులోకి తీసుకుని, కొన్ని గంటల తర్వాత రాత్రి 11:20 గంటల ప్రాంతంలో విడుదల చేశారు. అదుపులోకి తీసుకున్న వారిపై శుక్రవారం శాంతి భద్రతలకు భంగం కలిగించడం, చట్టవిరుద్ధంగా గుమిగూడటం వంటి ఆరోపణలతో 113 మందిపై పోలీసులు కేసులు నమోదు చేశారు.
విపక్షాల విమర్శలు, ముఖ్యమంత్రి స్పందన
బీజేపీ నేత నైనార్ నాగేంద్రన్ను అరెస్టు చేయడాన్ని ఏఐఏడీఎంకే ప్రధాన కార్యదర్శి ఎడప్పాడి పళనిస్వామి తీవ్రంగా ఖండించారు. కోర్టు తీర్పులను కూడా డీఎంకే ప్రభుత్వం లెక్కచేయడం లేదని, స్టాలిన్ ప్రభుత్వం కోర్టు తీర్పులకు అతీతమా? అని ప్రశ్నించారు. ఈ అనవసర వివాదాన్ని సృష్టించడం ద్వారా డీఎంకే ప్రభుత్వం ఎన్నికల లబ్ధి పొందాలని చూస్తోందని ఆయన ఆరోపించారు.
మరోవైపు, తమిళనాడు ముఖ్యమంత్రి ఎం.కె. స్టాలిన్ ఈ వివాదంపై పరోక్షంగా బీజేపీని విమర్శించారు. మదురై ప్రజలు కోరుకుంటున్నది కేవలం అభివృద్ధి, ఉద్యోగాలే తప్ప, మతపరమైన రాజకీయాలు కాదని అన్నారు. "మదురైకి అవసరమైంది అభివృద్ధి రాజకీయాలా లేదా రాజకీయాలా అని ప్రజలే నిర్ణయిస్తారు" అంటూ ఆయన విమర్శనాత్మక వ్యాఖ్య చేశారు. అలాగే ఎంఎన్ఎం వ్యవస్థాపకుడు కమల్ హాసన్ కూడా మత సామరస్యాన్ని దెబ్బతీసే చర్యలకు ఎవరూ పాల్పడకూడదని కోరారు. మద్రాస్ హైకోర్టు సింగిల్ జడ్జి దీపం వెలిగించడానికి అనుమతి ఇచ్చినప్పటికీ, ఈ తీర్పును సవాలు చేస్తూ ప్రభుత్వం సుప్రీంకోర్టును ఆశ్రయించింది. ఈ పిటిషన్ త్వరలో విచారణకు వచ్చే అవకాశం ఉంది.
తిరుప్పరన్కుండ్రం దీపం వివాదం ఏంటి?
తిరుప్పరన్కుండ్రం వివాదం అనేది మదురై జిల్లాలోని ప్రసిద్ధ మురుగన్ ఆలయం ఉన్న కొండపై ప్రతి కార్తికై నెలలో దీపం వెలిగించే సంప్రదాయానికి సంబంధించింది. వందల ఏళ్లుగా వస్తున్న ఈ ఆచారాన్ని కొనసాగించడానికి హిందూ సంస్థలు ప్రయత్నించగా, గత కొన్నేళ్లుగా తమిళనాడు ప్రభుత్వం తరఫున ధర్మాదాయ శాఖ భద్రతా కారణాలు, పర్యావరణ పరిరక్షణ, అడవుల్లో అగ్ని ప్రమాదాల కారణాన్ని చూపిస్తూ దీపం వెలిగించడానికి అనుమతి నిరాకరిస్తోంది. దీనిని బీజేపీ, హిందూ మున్నాని వంటి సంస్థలు "హిందువుల మత స్వేచ్ఛపై దాడి"గా, మత వివక్షగా ఆరోపిస్తున్నాయి. ఈ ఏడాది కూడా అనుమతి నిరాకరించడంతో, బీజేపీ రాష్ట్ర అధ్యక్షుడు నైనార్ నాగేంద్రన్ ఈ విషయంలో మద్రాస్ హైకోర్టు మధురై బెంచ్ను ఆశ్రయించారు. దీనిపై విచారణ చేపట్టిన హైకోర్టు సింగిల్ జడ్జి, డిసెంబర్ 4న దీపం వెలిగించడానికి అనుమతి ఇస్తూ తీర్పు ఇచ్చింది.