తవ్వేసి.. చంపేస్తున్నాం!
సముద్రం ఒక అద్భుతమైన మర్మభూమి. దాని అలల కింద.. మన కళ్లకు అందని ఒక కొత్త ప్రపంచం ఉంది. అక్కడ వెలుతురు లేని గర్భంలో, జీవం మరో రూపంలో విరాజిల్లుతోంది. షార్క్లు, చీమేరాలు, రేలు లాంటివి మన ఊహకందని గాఢమైన నీటిలో తేలియాడుతున్నాయి. కాని ఇప్పుడు ఆ ప్రశాంత ప్రపంచం మీద చీకటి మబ్బులు కమ్ముకుంటున్నాయి. హవాయ్ యూనివర్సిటీ పరిశోధకుల తాజా అధ్యయనం ఒక భయంకరమైన నిజాన్ని బయటపెట్టింది. సముద్ర గర్భ తవ్వకాలు.. అంటే డీప్ సీ మైనింగ్, ఈ సుదూర జీవప్రపంచానికి మరణశబ్దంలా మారుతోంది. మెటల్, మినరల్స్, విలువైన లోహాల కోసం మనిషి సముద్ర గుండెను తవ్వడం ప్రారంభించాడు. కాని ప్రతి తవ్వకంతో ఒక జీవం కొండచరియల మధ్య నలిగిపోతోంది. ఈ పరిశోధన ప్రకారం సుమారు 30 రకాల షార్క్లతో పాటు ఇతర సముద్ర జీవులు అంతరించే అంచుల వద్ద నిలబడి ఉన్నాయి. వీటిలో చాలా జీవులు ఇప్పటికే మానవ చర్యల వల్ల ఆవాసం కోల్పోయాయి. వాతావరణ మార్పులువాటి జీవనరేఖను క్రమంగా చీల్చేసింది. ఇప్పుడు డీప్ సీ మైనింగ్ అనే కొత్త ముప్పు వాటి మిగిలిన ఆశలపైనా దాడి చేస్తోంది.
సముద్ర అడుగుభాగం మీద యంత్రాలు రగిలే ప్రతిసారీ, వేల ఏళ్లుగా అక్కడ నివసిస్తున్న జీవరాశుల ఇళ్లు ధ్వంసమవుతున్నాయి. నీటి లోతుల్లో నిశ్శబ్దంగా తేలుతున్న స్కేట్స్ అనే ఎగ్-లేయింగ్ జీవులు తమ గుడ్లను కోల్పోతున్నాయి. చీకటిలో మునిగిన చీమేరాలు, తమ భూభాగాన్ని రక్షించుకోలేని మౌన వేదనలో కరుగుతున్నాయి. ఈ ప్రభావం కేవలం తవ్వక ప్రాంతాలకు మాత్రమే పరిమితం కాదు.. నీటి ప్రవాహాలు, ధూళితో పాటు పలు ఎకోసిస్టమ్లను తాకి, జీవవైవిధ్యాన్ని చెరిపేస్తున్నాయి. ఇది కేవలం ఒక పర్యావరణ సమస్య కాదు. ఇది మనిషి స్వార్థానికి, ప్రకృతి సహనానికి మధ్య జరుగుతున్న ఒక భీకర యుద్ధం. డీప్ సీ మైనింగ్ అనేది భూమి గుండెను గాయపరచే సాంకేతిక విప్లవం. ఒకప్పుడు మనం సముద్రాన్ని దేవతగా భావించేవాళ్లం, ఇప్పుడు దాన్ని యంత్రాల కింద నలిపేస్తున్నాం.
ఈ ప్రక్రియను నియంత్రించకపోతే, షార్క్లు, రేలు, చీమేరాలు లాంటి జాతులు మన పుస్తకాలలో మాత్రమే మిగిలిపోతాయి. వాటి కథలు కేవలం సైన్స్ నోట్స్లో మాత్రమే వినిపిస్తాయి. అందుకే సముద్రాన్ని రక్షించాలి. ఎక్స్క్లూజన్ జోన్లు ఏర్పాటు చేయాలి. ప్రతి తవ్వకానికి ముందు ఆ ప్రాంతంలోని జీవరాశుల ఆస్తిత్వాన్ని అంచనా వేయాలి. అంతర్జాతీయ సముద్ర గర్భ సంస్థలకు, మైనింగ్ కాంట్రాక్టర్లకూ ఇది ఒక చివరి హెచ్చరిక. ఇప్పటికీ మనం ఆగకపోతే, ఈ గాధ ఒక శోకగీతంగా మారిపోతుంది. ప్రతి అల ఒక మృత జీవి జ్ఞాపకాన్ని మోస్తూ తీరానికి చేరుతుంది. చివరగా ఒక ప్రశ్న.. సముద్రం మనకు జీవాన్ని ఇచ్చింది. మరి మనం దానికిచ్చేది మరణమా? ప్రకృతిని గెలవాలనుకుంటున్న మనిషి.. చివరికి తన ఊపిరినే కోల్పోతాడేమో మరి.. మనిషే ఆలోచించుకోవాలి..!